ວັນທີ 19 ພະຈິກນີ້ຢູ່ຫໍປະຊຸມອົງການປົກຄອງນະຄອນຣີໂອເດີຈາເນໂຣຂອງເບຣຊິນ, ທ່ານ ປາເອສ ເຈົ້າຄອງນະຄອນຣີໂອເດີຈາເນໂຣໄດ້ພົບປະກັບທ່ານ ເຊີ້ນໄຫສົງ ຮອງຫົວໜ້າຄະນະໂຄສະນາອົບຮົມສູນກາງພັກຄອມມູນິດຈີນ, ຜູ້ອໍານວຍການໃຫຍ່ວິທະຍຸໂທລະພາບສູນກາງຈີນ ຫຼື CMG. ສອງຝ່າຍໄດ້ແລກປ່ຽນຄວາມເຫັນຢ່າງເລິກເຊິ່ງກ່ຽວກັບການລົງເລິກການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ ແລະ ຊຸກຍູ້ໄມຕີຈິດມິດຕະພາບລະຫວ່າງຈີນ-ເບຣຊິນ.

   ໃນໂອກາດນີ້, ທ່ານ ເຊີ້ນໄຫສົງ ກ່າວວ່າ: CMG ຈະຖືເອົາກອງປະຊຸມສຸດຍອດກຸ່ມ G20 ຄັ້ງທີ 19 ແລະ ການສ້າງຕັ້ງສາຍພົວພັນທາງການທູດລະຫວ່າງຈີນ-ເບຣຊິນຄົບຄອບ 50 ປີເປັນໂອກາດທີ່ສໍາຄັນ, ລົງເລິກການແລກປ່ຽນ ແລະ ການຮ່ວມມືດ້ານວັດທະນະທໍາກັບນະຄອນຣີໂອເດີຈາເນໂຣ ເພື່ອຊຸກຍູ້ໃຫ້ມິດຕະພາບຈີນ-ເບຣຊິນສືບຕໍ່ໄດ້ຮັບການຍົກລະດັບສູງຂຶ້ນຢ່າງຕໍ່ເນື່ອງ.

   ທ່ານ ປາເອສ ໄດ້ສະແດງຄວາມຊົມເຊີຍ ແລະ ຄວາມຂອບໃຈຕໍ່ CMG ທີ່ໄດ້ປະກອບສ່ວນເຂົ້າໃນການສົ່ງເສີມມິດຕະພາບລະຫວ່າງເບຣຊິນ-ຈີນໃນຮອບຫຼາຍປີຜ່ານມາ, ພ້ອມທັງໄດ້ມອບ “ກະແຈເມືອງ”ຂອງນະຄອນຣີໂອເດີຈາເນໂຣໃຫ້ແກ່ທ່ານ ເຊີ້ນໄຫສົງ ເພື່ອສະແດງຄວາມຂອບໃຈ ແລະ ຄວາມເຄົາລົບນັບຖືຂອງອົງການປົກຄອງ ແລະ ຊາວນະຄອນຣີໂອເດີຈາເນໂຣທີ່ມີຕໍ່ CMG ກໍຄືຜູ້ອໍານວຍການໃຫຍ່ CMG.