ກອງປະຊຸມສຸດຍອດ ກຸ່ມ 20 ປະເທດຫຼື G20 ຄັ້ງທີ 19 ໄດ້ຈັດຂຶ້ນຢູ່ນະຄອນຣີໂອເດີຈາເນໂຣປະເທດເບຣຊິນລະຫວ່າງວັນທີ 18-19 ພະຈິກນີ້,ໂດຍປິ່ນອ້ອມຫົວຂໍ້ “ການສ້າງໂລກທີ່ຍຸຕິທຳ ແລະ ໜ່ວຍໂລກທີ່ຍືນຍົງ”, ທ່ານສີຈິ້ນຜິງ ປະທານປະເທດຈີນໄດ້ຮ່ວມກັບຜູ້ນຳຂອງບັນດາປະເທດ ກໍຄືຂອງສະຫະພາບອາຟຣິກາເປິກສາຫາລືແຜນການຮ່ວມມືເພື່ອການພັດທະນາ.

ກຸ່ມ G20 ສ້າງຕັ້ງຂຶ້ນເມື່ອປີ1999, ໂດຍປະກອບມີຈີນ, ອາກຊັງຕິນ, ອົດສະຕຣາລີ, ເບຣຊິນ, ການາດາ, ຝຣັ່ງ, ເຢຍລະມັນ, ອິນເດຍ, ອິນໂດເນເຊຍ, ອີຕາລີ, ຍີ່ປຸ່ນ, ສ ເກົາຫຼີ, ເມັກຊິກ, ຣັດເຊຍ, ອາຣັບບີຊາອຸດິດ, ອາຟຣິກກາໃຕ້, ຕູຣາເຄຍ, ອັງກິດ, ອາເມຣິກາ, ສະຫະພາບເອີຣົບ ແລະ ສະຫະພາບອາຟຣິກາ. ສະມາຊິກກຸ່ມ G20 ໄດ້ປົກຄຸມຢ່າງກວ້າງຂວາງ, ມີລັກສະນະເປັນຕົວແທນລະດັບສູງ ເຊິ່ງລວມທັງກຸ່ມເສດຖະກິດສຳຄັນທີ່ພັດທະນາແລ້ວ ແລະ ກຸ່ມເສດຖະກິດທີ່ເປັນຕະຫຼາດຈະເລີນໃໝ່, ໄດ້ເສີມຂະຫຍາຍບົດບາດສຳຄັນທີ່ສຸດຢູ່ໃນວຽກງານສາກົນ ແລະໄດ້ກາຍເປັນກົນໄກຫຼາຍຝ່າຍທີ່ມີປະສິດທິຜົນແຫ່ງການຮ່ວມກັນຮັບມືກັບບັນຫາທົ່ວໂລກ.

ວັນທີ 3 ກັນຍາ 2016, ໃນເວລາກ່າວຄຳປາໄສພາຍໃຕ້ຫົວຂໍ້ຫຼັກຕໍ່ພິທີເປີດກອງປະຊຸມສຸດຍອດອຸດສາຫະກຳການຄ້າກຸ່ມ G20, ທ່ານສີຈິ້ນຜິງໄດ້ຊີ້ໃຫ້ເຫັນວ່າ: ຈິດໃຈຄູ່ຮ່ວມຄືຊັບສິນອັນປະເສີດທີ່ສຸດຂອງກຸ່ມG20 ທັງເປັນທາງເລືອກຂອງບັນດາປະເທດເພື່ອຮ່ວມກັນຮັບມືກັບສິ່ງທ້າທາຍທົ່ວໂລກ.

ດັ່ງທີ່ທ່ານສີຈິ້ນຜິງເຄີຍຍົກເອົາຄຳບູຮານຈີນມາກ່າວວ່າ: “ຍົກນ້ຳໜັກຜູ້ດຽວຈະຍົກຂຶ້ນໄດ້ຍາກ,ຍ່າງຫຼາຍຄົນຈະໄປໄດ້ໄວກວ່າ”. ໃນຍຸກເສດຖະກິດໂລກາພິວັດ, ແມ່ນບໍ່ມີບ່ອນໃດທີ່ສາມາດຢູ່ຫ່າງເຫີນຈາກໂລກພາຍນອກປຽບເໝືອນເກາະດຽວໄດ້. ຖ້າຢາກສ້າງໂລກທີ່ຍຸຕິທຳ ແລະ ໜ່ວຍໂລກທີ່ຍືນຍົງ, ການຮ່ວມກັນຜ່ານຜ່າຄວາມຫຍຸ້ງຍາກ, ຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດແມ່ນເປັນທາງເລືອກອັນຈຳເປັນຂອງບັນດາປະເທດ. ຈຸດນີ້ແມ່ນເນື້ອໃນໃຈຄວາມສຳຄັນທີ່ສຸດທີ່ທ່ານສີຈິ້ນຜິງເນັ້ນໜັກມາໂດຍຕະຫຼອດວ່າ ກຸ່ມ G20 ຄວນມີຈິດໃຈຄູ່ຮ່ວມ.

ທ່ານສີຈິ້ນຜິງສະເໜີຄຳວ່າ ຈິດໃຈຄູ່ຮ່ວມ ໂດຍແນໃສ່ເສດຖະກິດສາກົນ ແລະ ສະພາບການໃນພາກພື້ນເກີດມີການປ່ຽນແປງຢ່າງເລິກເຊິ່ງ ກໍຄືສະພາບການໃໝ່ ແລະ ສິ່ງທ້າທາຍໃໝ່ທີ່ທົ່ວໂລກພວມປະເຊີນຢູ່, ເພື່ອສຸມໃສ່ປົກປັກຮັກສາລະບົບການຄ້າເສລີ ແລະ ລະບົບເສດຖະກິດແບບເປີດກວ້າງຂອງໂລກ, ສົ່ງເສີມໃຫ້ບັນດາປະເທດຢູ່ໃນໂລກລົງເລິກການຮ່ວມມືດ້ານເສດຖະ ກິດ, ສະແຫວງຫາການພັດທະນາຮ່ວມກັນ, ເຊິ່ງ ຫຼັກການພື້ນຖານແມ່ນສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ, ເປົ້າໝາຍສຳຄັນແມ່ນຮ່ວມມືກັນແບບຕ່າງຝ່າຍຕ່າງໄດ້ຮັບຜົນປະໂຫຍດນຳກັນ.

ທ່ານສີຈິ້ນຜິງໄດ້ຖືເອົາຄຳວ່າ “ຊັບສິນອັນປະເສີດທີ່ສຸດ” ເປັນຄຳປຽບທຽບຄຸນຄ່າສຳຄັນ ແລະ ຄວາມປະເສີດຂອງຈິດໃຈຄູ່ຮ່ວມ ເຊິ່ງເປັນຄຳປຽບທຽບທີ່ ແທດເໝາະ ແລະ ມີຊີວິດຊີວາຫຼາຍ.

ພາຍຫຼັງມາ, ເພິ່ນໄດ້ຂະຫຍາຍຂໍ້ລິເລີ່ມຈິດໃຈຄູ່ຮ່ວມໄປເຖິງການສ້າງລະບົບບໍລິຫານໂລກຄືນໃໝ່ ໂດຍຮຽກຮ້ອງໃຫ້ຈິດໃຈຄູ່ຮ່ວມກາຍເປັນໜ້າທີ່ຮັບຜິດຊອບຂອງບັນດາປະເທດເພື່ອຮ່ວມກັນຮັບມືກັບສິ່ງທ້າທາຍທົ່ວໂລກ. ສາມາດເວົ້າໄດ້ວ່າ: ຈິດໃຈຄູ່ຮ່ວມບໍ່ພຽງແຕ່ເປັນຊັບສິນອັນປະເສີດທີ່ສຸດຂອງກຸ່ມ G20ເທົ່ານັ້ນ, ຍັງເປັນຊັບສິນອັນປະເສີດຂອງບັນດາປະເທດຢູ່ໃນໂລກອີກດ້ວຍ.

ເວົ້າສຳລັບກຸ່ມ G20 ແລ້ວ, ສະມາຊິກຂອງກົນໄກນີ້ບໍ່ພຽງແຕ່ມີກຸ່ມເສດຖະກິດສຳຄັນທີ່ພັດທະນາແລ້ວເທົ່ານັ້ນ, ຍັງມີກຸ່ມເສດ ຖະກິດທີ່ເປັນຕະຫຼາດຈະເລີນໃໝ່ນຳອີກ. ບັນດາປະເທດແລະເຂດແຄວ້ນແມ່ນມີຄວາມແຕກຕ່າງກັນບໍ່ວ່າໃນດ້ານສະພາບແຫ່ງຊາດ, ໄລຍະການພັດທະນາ ຫຼື ສິ່ງທ້າທາຍຕົວຈິງທີ່ພວມປະເຊີນຢູ່. ໃນຖານະເປັນປະເທດພວມພັດທະນາໃຫຍ່ທີ່ສຸດຂອງໂລກ, ຈີນໄດ້ຈັດຕັ້ງປະຕິບັດຈິດໃຈຄູ່ຮ່ວມມາໂດຍຕະຫຼອດ, ໄດ້ຮ່ວມມືກັບສະມາຊິກກຸ່ມ G20 ເພື່ອບັນລຸການພັດທະນາຮ່ວມກັນ.

ຈາກການສະເໜີໃຫ້ “ຊຸກຍູ້ການພັດທະນາແບບກວມລວມ ແລະຮ່ວມສຳພັນຊ່ວຍຊູຍູ້ໜູນກັນ” ຮອດ ການຮ່ວມກັນສະເໜີ “ຂໍ້ລິເລີ່ມວ່າດ້ວຍກຸ່ມ G20 ສະໜັບສະໜູນອາຟຣິກາ ແລະປະເທດດ້ອຍພັດທະນາທີ່ສຸດຫັນເປັນອຸດສາຫະກຳ” ຕະຫຼອດຮອດການຈັດຕັ້ງປະຕິບັດຂໍ້ລິເລີ່ມວ່າດ້ວຍກຸ່ມ G20 ເລື່ອນເວລາການຊຳລະໜີ້ຢ່າງຮອບດ້ານ… ສ່ວນໃນກອງປະຊຸມສຸດຍອດກຸ່ມ G20 ຄັ້ງທີ 19 ທີ່ຈັດຂຶ້ນເມື່ອວັນທີ 18 ພະຈິກ2024ຢູ່ປະເທດເບຣຊິນ, ທ່ານສີຈິ້ນຜິງ ປະທານປະເທດຈີນໄດ້ປະກາດແຜນດຳເນີນງານ8ດ້ານກ່ຽວກັບຈີນສະໜັບສະໜູນການພັດທະນາທົ່ວໂລກຄື: ໜຶ່ງ, ຮ່ວມກັນສ້າງ “ໜຶ່ງແລວໜຶ່ງເສັ້ນທາງ”ທີ່ມີຄຸນນະພາບສູງ. ສອງ, ຈັດຕັ້ງປະຕິບັດຂໍ້ລິເລີ່ມການພັດທະນາທົ່ວໂລກ.ສາມ, ສະໜັບສະໜູນການພັດທະນາອາຟຣິກາ. ສີ່, ສະໜັບສະໜູນການຮ່ວມມືສາກົນເພື່ອຫຼຸດຜ່ອນຄວາມທຸກຍາກແລະຄວາມໝັ້ນຄົງດ້ານສະບຽງອາຫານ. ຫ້າ, ຈີນ ເບຣຊິນ, ອາຟຣິກໃຕ້ ແລະ ສະ ຫະພາບອາຟຣິກາໄດ້ຮ່ວມກັນລິເລີ່ມຂໍ້ລິເລີ່ມ “ການຮ່ວມມືສາກົນດ້ານວິທະຍາສາດແບບເປີດກວ້າງ”, ຫົກ ສະໜັບສະໜູນກຸ່ມ G20ດຳເນີນການຮ່ວມມືຕົວຈິງເພື່ອສ້າງຜົນປະໂຫຍດໃຫ້ແກ່ເຂດໂລກໃຕ້. ເຈັດ,ຈັດຕັ້ງປະຕິບັດແຜນດຳເນີນງານຂອງກຸ່ມ G20 ກ່ຽວກັບການຕ້ານການສໍ້ບາດບັງຫຼວງ. ແປດ, ຈີນຈະບູລະນະໂຄງປະກອບແລະກົນໄກການເປີດປະຕູສູ່ພາຍນອກໃນລະດັບສູງ, ເປີດກວ້າງການເປີດປະຕູສູ່ພາຍນອກພຽງຝ່າຍດຽວຕໍ່ປະເທດດ້ອຍພັດທະນາທີ່ສຸດ.ຄືດັ່ງທ່ານສີຈິ້ນຜິງໄດ້ກ່າວວ່າ: ເສີມຂະຫຍາຍຈິດໃຈຄູ່ຮ່ວມແບບຮ່ວມກັນຜ່ານຜ່າຄວາມຫຍຸ້ງຍາກ, ຜ່ານຈາກການເຄື່ອນໄຫວຂອງພວກເຮົາ, ພະຍາຍາມສູ້ຊົນສ້າງໃຫ້ເປັນສະພາບການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດທີ່ການເຕີບໂຕຂອງບັນດາປະເທດຊ່ວຍຊູຍູ້ໜູນກັນເພື່ອພັດທະນາຮ່ວມກັນ.

ຖ້າເບິ່ງໃນຂອບເຂດທົ່ວໂລກແລ້ວເຫັນວ່າ: ໄປຄຽງຄູ່ກັບເສດຖະກິດໂລກເລັ່ງພັດທະນາໄວຂຶ້ນ ແລະ ການຄ້າທົ່ວໂລກເຊື່ອມໂຍງເຂົ້າເປັນອັນໜຶ່ງອັນດຽວກັນ, ຜົນປະໂຫຍດຂອງບັນດາປະເທດແມ່ນພົວພັນກັນຢ່າງສະໜິດແໜ້ນ, ຮ່ວມຊາຕາກຳແບບເພິ່ງພາອາໄສກັນ, ສະນັ້ນ, ການຂະຫຍາຍກຸ່ມເພື່ອນມິດໃຫ້ກວ້າງອອກເລື້ອຍໆໄດ້ກາຍເປັນກະແສຂອງຍຸກສະໄໝ. ຕໍ່ກັບເລື່ອງນີ້, ທ່ານສີຈິ້ນຜິງໄດ້ເນັ້ນໜັກວ່າ: “ຂະບວນການເຕີບໂຕດ້ານເສດຖະກິດໂລກໃນຊຸມປີຜ່ານມາໄດ້ສະແດງໃຫ້ເຫັນເທື່ອແລ້ວເທື່ອອີກວ່າ ໃນຍຸກເສດຖະກິດໂລກາພິວັດ ບໍ່ມີປະເທດໃດສາມາດຄົງຕົວໄດ້ພຽງລຳພັງ, ການປະສານງານຮ່ວມມືກັນເປັນທາງເລືອກອັນຈຳເປັນຂອງພວກເຮົາ.”

ທ່ານສີຈິ້ນຜິງເຄີຍກ່າວວ່າ: “ໃຫ້ຄຳໝັ້ນສັນຍາພັນເທື່ອ ບໍ່ເທົ່າກັບຈັດຕັ້ງປະຕິບັດສິ່ງໜຶ່ງໃຫ້ເປັນຮູບປະທຳ.” ປີ2021, ທ່ານສີຈິ້ນຜິງໄດ້ສະເໜີຂໍ້ລິເລີ່ມການພັດທະນາທົ່ວໂລກເປັນຄັ້ງທຳອິດ. ເຊິ່ງຂໍ້ລິເລີ່ມນີ້ໄດ້ແທດເໝາະທີ່ສຸດກັບເປົ້າໝາຍແລະທິດທາງຈຸດສຸມຂອງກຸ່ມ G20 ໃນການຊຸກຍູ້ການພັດທະນາທົ່ວໂລກ,ເນື່ອງຈາກຂໍ້ລິເລີ່ມດັ່ງກ່າວແມ່ນມີຈຸດປະສົງເພື່ອຊຸກຍູ້ການພັດທະນາທົ່ວໂລກທີ່ໃຫ້ຜົນປະໂຫຍດຢ່າງທົ່ວເຖິງກວ່າເກົ່າ.

 ໃນໄລຍະ3ປີຜ່ານມາ, ຂໍ້ລິເລີ່ມການພັດທະນາທົ່ວໂລກໄດ້ຮັບການສະໜັບສະໜູນຈາກ100ກວ່າປະເທດແລະອົງການຈັດຕັ້ງສາກົນ ໂດຍໄດ້ດຳເນີນໂຄງການຮ່ວມມືຫຼາຍກວ່າ1100ໂຄງການ ເຊິ່ງໄດ້ຂຽນເລື່ອງລາວຈຳນວນຫຼາຍກ່ຽວກັບການຮ່ວມມືແບບຕ່າງຝ່າຍຕ່າງມີຜົນປະໂຫຍດ.

ປັດຈຸບັນ, ລວມຍອດເສດຖະກິດຂອງສະມາຊິກກຸ່ມ G20ໄດ້ກວມເອົາຫຼາຍກວ່າ80%ຂອງໂລກ. ເມື່ອປະເຊີນໜ້າກັບສະພາບ ການໃໝ່ແລະສິ່ງທ້າທາຍໃໝ່, ບັນດາປະເທດມີພຽງແຕ່ຍຶດໝັ້ນຈິດໃຈຄູ່ຮ່ວມແບບຮ່ວມກັນຜ່ານຜ່າຄວາມຫຍຸ້ງຍາກເທົ່ານັ້ນຈຶ່ງຈະສາມາດກ້າວເດີນໄປຂ້າງໜ້າຢ່າງອົງອາດກ້າຫານທ່າມກາງຟ້າຝົນລົມແຮງຂອງເສດຖະກິດໂລກ ເພື່ອເປີດຂະບວນການພັດທະນາຄັ້ງໃໝ່ໄດ້.