ຕອນເຊົ້າວັນທີ 20 ພະຈິກນີ້ຢູ່ທໍານຽບປະທານາທິບໍດີເບຣຊິນທີ່ນະຄອນຫຼວງ ບຣາຊີເລຍ, ທ່ານ ສີຈິ້ນຜິງ ປະທານປະເທດຈີນ ແລະ ທ່ານ ລູອິສ ອິນາຊີໂອ ລູລາ ດາ ຊິນວາ ປະທານາທິບໍດີເບຣຊິນໄດ້ຮ່ວມກັນຖະແຫຼງຂ່າວຕໍ່ສື່ມວນຊົນພາຍຫຼັງພົບປະເຈລາຈາກັນ.

   ໃນໂອກາດນີ້, ທ່ານ ສີຈິ້ນຜິງ ຢືນຢັນວ່າ: ພວກເຮົາໄດ້ບັນລຸຄວາມເຫັນທີ່ເປັນເອກະພາບກັນດ້ານຍຸດທະສາດອັນໃໝ່ກ່ຽວກັບການພັດທະນາສາຍພົວພັນລະຫວ່າງຈີນ-ເບຣຊິນໃນອະນາຄົດ ເຊິ່ງພວກເຮົາເຫັນດີເປັນເອກະພາບກັນວ່າ: ຄວນສືບຕໍ່ລົງເລິກຄວາມໄວ້ເນື້ອເຊື່ອໃຈກັນດ້ານຍຸດທະສາດ, ໃຫ້ການສະໜັບສະໜູນເຊິ່ງກັນແລະກັນຢ່າງເດັດດ່ຽວກ່ຽວກັບບັນຫາໃຈກາງຕ່າງໆທີ່ກ່ຽວຂ້ອງກັບອະທິປະໄຕ, ຄວາມໝັ້ນຄົງ, ຜົນປະໂຫຍດການພັດທະນາ ແລະອື່ນໆ ເພື່ອຊຸກຍູ້ການພັດທະນາທີ່ມີຄຸນນະພາບສູງຂອງກັນແລະກັນ. ຄວນເຊື່ອມຕໍ່ຍຸດທະສາດການພັດທະນາລະຫວ່າງສອງປະເທດໃຫ້ດີ. ຈີນ-ເບຣຊິນຄວນສືບຕໍ່ຮັດແໜ້ນການປະສານງານພາຍໃນກົນໄກຫຼາຍຝ່າຍຕ່າງໆ ເຊັ່ນ: ອົງການສະຫະປະຊາຊາດ, ກຸ່ມ G20 ແລະ ບຣິກສ ເປັນຕົ້ນ, ຮ່ວມກັນຮັບມືກັບສິ່ງທ້າທາຍດ້ານຄວາມໝັ້ນຄົງແບບເກົ່າ ແລະ ແບບໃໝ່ ເພື່ອປະກອບກໍາລັງແຮງອັນໃໝ່ຂອງຈີນ-ເບຣຊິນເຂົ້າໃນພາລະກິດສັນຕິພາບ ແລະ ການພັດທະນາຂອງໂລກ.

   ທ່ານ ລູລາ ຢືນຢັນວ່າ: ການຮ່ວມມືລະຫວ່າງເບຣຊິນ-ຈີນມີຄວາມໝາຍດ້ານຍຸດທະສາດ ແລະ ມີອິດທິພົນຕໍ່ໂລກ, ເບຣຊິນ-ຈີນມີຈຸດຢືນເປັນເອກະພາບກັນໃນລະດັບສູງຕໍ່ບັນຫາສໍາຄັນ ເຊັ່ນ: ການພັດທະນາ ແລະ ຄວາມໝັ້ນຄົງສາກົນ ເປັນຕົ້ນ. ພວກເຮົາຈະຮັດແໜ້ນການແລກປ່ຽນ ແລະ ປະສານງານພາຍໃຕ້ກົນໄກຫຼາຍຝ່າຍເຊັ່ນ: ອົງການສະຫະປະຊາຊາດ, ກຸ່ມ G20 ແລະ ບຣິກສ ເປັນຕົ້ນ, ຮ່ວມກັນສົ່ງເສີມການປະຕິຮູບລະບົບບໍລິຫານໂລກ ເພື່ອສ້າງລະບົບສາກົນທີ່ມີຄວາມຍຸຕິທໍາ, ປະຊາທິປະໄຕ, ສະເໝີພາບ ແລະ ຍືນຍົງກວ່າເກົ່າ. ການຢ້ຽມຢາມຂອງທ່ານປະທານ ສີຈິ້ນຜິງ ໃນເທື່ອນີ້ໄດ້ເປີດປະຫວັດສາດໜ້າໃໝ່ແຫ່ງການພົວພັນລະຫວ່າງເບຣຊິນ-ຈີນ.