ຕອນຄໍ່າວັນທີ 21 ພະຈິກນີ້, ທ່ານ ວະລາດີເມຍ ປູຕິນ ປະທານາທິບໍດີຣັດເຊຍໄດ້ກ່າວຄໍາປາໄສຜ່ານທາງໂທລະພາບວ່າ: ກອງທັບຣັດເຊຍໄດ້ດໍາເນີນການໂຈມຕີແບບປະສົມຕໍ່ສິ່ງກໍ່ສ້າງອຸດສາຫະກໍາການທະຫານຂອງອູແກຣນໃນມື້ດຽວກັນ, ນອກນີ້, ທ່ານ ປູຕິນ ໄດ້ເຕືອນອີກເທື່ອໜຶ່ງໃຫ້ປະເທດຕາເວັນຕົກຈົ່ງນັບຮູ້ເຖິງຜົນຂອງການເຮັດໃຫ້ການປະທະກັນລະຫວ່າງຣັດເຊຍ-ອູແກຣນຮຸນແຮງຂຶ້ນຕື່ມ.

   ໃນໂອກາດນີ້, ທ່ານ ປູຕິນ ຢືນຢັນວ່າ: ກ່ອນໜ້ານີ້, ອາເມຣິກາ ແລະ ປະເທດພັນທະມິດກຸ່ມນາໂຕໄດ້ປະກາດອະນຸມັດໃຫ້ນໍາໃຊ້ລະບົບອາວຸດຍຸດໂທປະກອນແບບແມ່ນຢໍາໄລຍະໄກໂຈມຕີຜືນແຜ່ນດິນຂອງຣັດເຊຍ ເຊິ່ງເຮັດໃຫ້ສະຖານະການປະທະກັນເຄັ່ງຕຶງຂຶ້ນຕື່ມອີກ. ປະເທດທີ່ທໍາລາຍລະບົບຄວາມໝັ້ນຄົງສາກົນນັ້ນແມ່ນອາເມຣິກາແຕ່ບໍ່ແມ່ນຣັດເຊຍ. ການກະທໍາຂອງອາເມຣິກາທີ່ສະແຫວງຫາ ແລະ ສືບຕໍ່ຮັກສາລັດທິເຈົ້າອໍານາດນັ້ນພວມເຮັດໃຫ້ການປະທະກັນແຜ່ຂະຫຍາຍອອກໄປໃນທົ່ວໂລກ.