ວັນທີ 23 ພະຈິກນີ້, ທ່ານ ກ່ວນຈື້ເອົ່າ ຫົວໜ້າອົງການປ່າໄມ້ ແລະທົ່ງຫຍ້າແຫ່ງຊາດຈີນແນະນຳໃນກອງປະຊຸມປ່າໄມ້ໂລກ 2024 ທີ່ຈັດຂຶ້ນຢູ່ນະຄອນນານນີງ ເຂດປົກຄອງຕົນເອງເຜົ່າຈວ້າງ ກວາງຊີ ຂອງຈີນໃຫ້ຮູ້ວ່າ: ນັບມາຮອດທ້າຍປີ 2023, ອັດຕາປົກຄຸມປ່າໄມ້ຂອງຈີນໄດ້ຫຼາຍກວ່າ 25%, ປະລິມານສະສົມປ່າໄມ້ທັງໝົດບັນລຸຫຼາຍກວ່າ 20 ຕື້ແມັດກ້ອນ, ຍອດປະລິມານກຳຈັດກາກບອນຕໍ່ປີບັນລຸຫຼາຍກວ່າ 1ຕື້ 200 ລ້ານໂຕນ, ເນື້ອທີ່ປ່າປູກແມ່ນອັນດັບ 1 ໃນທົ່ວໂລກ, ກາຍເປັນປະເທດທີ່ມີສີຂຽວເພີ່ມຂຶ້ນຫຼາຍທີ່ສຸດໃນໂລກ.

    ທ່ານ ກ່ວນຈື້ເອົ່າ ກ່າວຕື່ມວ່າ: ຍອດມູນຄ່າການຜະລິດຂອງຂະແໜງການປ່າໄມ້ ແລະທົ່ງຫຍ້າຂອງຈີນຫຼາຍກວ່າ 9.000 ຕື້ຢວນ, ກາຍເປັນປະເທດໃຫຍ່ທີ່ສຸດໃນດ້ານການຄ້າ, ການຜະລິດ ແລະ ການບໍລິໂພກຜະລິດຕະພັນປ່າໄມ້ຕົ້ນຕໍ.

    ກອງປະຊຸມດັ່ງກ່າວມີຫົວຂໍ້ວ່າ “ຂະແໜງການປ່າໄມ້ຮ່ວມມືກັນສ້າງພາລະກິດ: ນຳພາຂະແໜງການປ່າໄມ້ພັດທະນາຢ່າງມີຄຸນນະພາບສູງດ້ວຍການປະດິດສ້າງໃໝ່”, ບຸກຄົນ, ນັກວິຊາການ ແລະຊ່ຽວຊານທີ່ມາຈາກພາກສ່ວນປ່າໄມ້, ອົງການຈັດຕັ້ງສາກົນ ແລະວິສາຫະກິດທີ່ມີຊື່ສຽງໃນສາກົນໃນດ້ານຂະແໜງການປ່າໄມ້ໄດ້ເຂົ້າຮ່ວມກອງປະຊຸມ, ມີວິສາຫະກິດເກືອບ 1.100 ແຫ່ງເຂົ້າຮ່ວມກິດຈະກຳທີ່ກ່ຽວຂ້ອງ.