ວັນທີ 25 ພະຈິກນີ້, ເພື່ອຕອບສະໜອງຕໍ່ຂໍ້ກ່າວຫາເລື່ອງການປົນເປື້ອນຂອງສານປະກອບຟລູອີຣິນອິນຊີ, ຍີ່ປຸ່ນໄດ້ເລີ່ມກວດເລືອດໃຫ້ປະຊາຊົນ ທີ່ເມືອງ ຄິບິຊູໂອະ ແຂວງ ໂອກະຢະມະ ດ້ວຍງົບປະມານລັດຖະບານ. ກະຊວງສິ່ງແວດລ້ອມຍີ່ປຸ່ນກ່າວວ່າ: ນີ້ແມ່ນຄັ້ງທຳອິດທີ່ໄດ້ດຳເນີນການກວດເລືອດໃຫ້ປະຊາຊົນ ໂດຍໃຊ້ງົບປະມານລັດຖະບານ.

   ເດືອນຕຸລາປີ 2023, ມີການເປີດເຜີຍວ່າ ໂຮງຜະລິດນ້ຳປະປາແຫ່ງໜຶ່ງຢູ່ ເມືອງ ຄິບິຊູໂອະ ຖືກກວດພົບວ່າ: ມີການປົນເປື້ອນຂອງສານປະກອບຟລູອີຣິນອິນຊີ ທີ່ສູງກວ່າມາດຕະຖານໃນນ້ຳປະປາຢ່າງຫຼາຍ ໂດຍນັບມາແຕ່ປີ 2020 ເປັນຕົ້ນມາ, ແຕ່ອົງການປົກຄອງທ້ອງຖິ່ນພັດກ່າວອ້າງວ່າ ຄຸນນະພາບຂອງນ້ຳປະປາຖືກຕ້ອງຕາມມາດຕະຖານແລ້ວ ແລະຍັງຄົງສະໜອງນ້ຳທີ່ປົນເປື້ອນມົນລະພິດນີ້ໃຫ້ປະຊາຊົນໃນທ້ອງຖິ່ນມາໂດຍຕະຫຼອດ.

   ຫຼັງຈາກຂ່າວດັ່ງກ່າວຖືກເປີດເຜີຍ, ອົງກອນເອກະຊົນແຫ່ງໜຶ່ງໄດ້ເອົາຕົວຢ່າງເລືອດຂອງປະຊາຊົນໃນເມືອງທີ່ມີອາຍຸລະຫວ່າງ 2-80 ປີ ລວມ 27 ຄົນໄປກວດ. ຜົນກວດເລືອດພົບວ່າ: ເລືອດຂອງ 27 ຄົນນີ້ ມີລະດັບສານປະກອບຟລູອີຣິນອິນຊີ ສູງເກີນກວ່າມາດຕະຖານ. ຜູ້ຊ່ຽວຊານກ່າວວ່າ: ຖ້າວ່າບໍລີໂພກນ້ຳປະປາທີ່ປົນເປື້ອນສານນີ້ໃນປະລິມານຫຼາຍແລະເປັນເວລາຍາວນານ ຈະມີຜົນສະທ້ອນຕໍ່ສຸຂະພາບແລະການຈະເລີນເຕີບໂຕຂອງເດັກ ແລະຍັງນຳໄປສູ່ການເປັນມະເຮັງໄດ້.