|
ຈີນປະຕິບັດລະບອບການສຶກສາພາກບັງຄັບ9ປີ,ການຮັບປະກັນໃຫ້ເດັກນ້ອຍໝົດທຸກຄົນໂດຍສະເພາະແມ່ນເດັກນ້ອຍຜູ່ທຸກຈົນລ້ວນແຕ່ໄດ້ຮັບໂອກາດສຶກສາຮ່ຳຮຽນແມ່ນວຽກງານຈຸດໜັກອັນໜຶ່ງຂອງຂະແໜງການການສຶກສາຂອງຈີນ.
ເລີ່ມແຕ່ຊຸມປີ90ສະຕະວັດແລ້ວນີ້ເປັນຕົ້ນມາ,ຢູ່ຈີນ,ປະຊາກອນຊົນນະບົດຈຳນວນຫຼວງຫຼາຍເລີ່ມໄຫຼເຂົ້າຕົວເມືອງ.ໃນນັ້ນ,ເດັກໜ້ອຍຜູ່ຢູ່ໃນໄວຮຽນຈຳນວນຫຼວງຫຼາຍທີ່ເຂົ້າເມືອງຕາມພໍ່ແມ່ຈິ່ງເຊົາຮຽນຍ້ອນຊອກຫາໂຮງຮຽນອັນເໝາະສົມບໍ່ໄດ້.ນອກນີ້,ເດັກນ້ອຍໃນຄອບຄົວທຸກຈົນໃນຕົວເມືອງແລະຊົນນະບົດຈຳນວນໜຶ່ງກໍປະເຊີນກັບການເຊົາຮຽນຍ້ອນມູນເຫດຕ່າງໆເຊັ່ນທຸກຈົນເປັນຕົ້ນ.ໂດຍແນໃສ່ບັນຫາເດັກນ້ອຍເຊົາຮຽນ,ອົງການປົກຄອງທຸກຂັ້ນຂອງຈີນໄດ້ຊອກຫາທຸກວິທີແກ້ໄຂໂດຍຕະຫຼອດ.10ກວ່າປີກ່ອນ,ອົງການປົກຄອງທຸກຂັ້ນແລະອົງການຈັດຕັ້ງສັງຄົມຝ່າຍພົນລະເຮືອນຂອງຈີນຜ່ານຈາກຮູບການບໍລິຈາກເປັນຕົ້ນ,ປະຕິບັດກິດຈະການຄວາມຫວັງ,ແຜນການຊຸນໄລແປວ່າ "ແຜນການດອກຈູມລະດູບານໃໝ່"ທີ່ແນໃສ່ຊ່ວຍເຫຼືອເດັກນ້ອຍຜູ່ທຸກຈົນຂອງຊົນນະບົດເຂົ້າຮຽນ,ອັນໄດ້ຮັບປະສິດທິຜົນຢ່າງໃຫຍ່ຫຼວງ.ປະຈຸບັນ,ອົງການປົກຄອງທຸກຂັ້ນເລີ່ມປະຕິບັດກິດຈະການກອບກູ້ທີ່ຍົກເວັ້ນຄ່າສຶກສາ3ລາຍຄືຄ່າປຶ້ມຮຽນ,ຄ່າອຸປະກອນການຮຽນແລະຄ່າຮຽນຕ່າງໆໃຫ້ແກ່ເດັກນ້ອຍຜູ່ທຸກຈົນ,ເພື່ອຮັບປະກັນໃຫ້ເດັກນ້ອຍຍິ່ງຫຼາຍກວ່າເກົ່າທີ່ອາດຈະເຊົາຮຽນສາມາດສຳເລັດການຮຽນ.
ເມືອງຄຸນມິງຕັ້ງຢູ່ພາກຕາເວັນຕົກສຽງໃຕ້ຂອງຈີນ,ເປັນເທດສະບານແຂວງຢຸນນານ.ຫວ່າງມໍ່ໆນີ້,ອົງການປົກຄອງເມືອງຄຸນມິງໄດ້ວາງກິດຈະການກອບກູ້ດ້ວຍເງິນຈຳເພາະເພື່ອຍົກເວັ້ນຄ່າສຶກສາ3ລາຍໂດຍແນໃສ່ນັກຮຽນຜູ່ທຸກຈົນໃນຕົວເມືອງ.ອົງການການເງິນເມືອງຄຸນມິງໄດ້ເບີກເງິນ6ລ້ານຢວນເປັນເງິນກອບກູ້ໂດຍຈຳເພາະເພື່ອສະໜອງການສຶກສາທີ່ຍົກເວັ້ນຄ່າປຶ້ມຮຽນ,ຄ່າອຸປະກອນການຮຽນແລະຄ່າຮຽນຕ່າງໆໃຫ້ແກ່ນັກຮຽນມັດທະຍົມຕົ້ນ2ໝື່ນຄົນແລະນັກຮຽນປະຖົມ5000ຄົນ.ການປະຕິບັດການສຶກສາທີ່ຍົກເວັ້ນຄ່າສຶກສາ3ລາຍດັ່ງກ່າວໄດ້ລົບລ້າງປະກົດການທີ່ເດັກນ້ອຍຢູ່ໃນໄວຮຽນຂອງທ້ອງຖິ່ນເຊົາຮຽນ.ທ່ານຈ້າວປາວເຊິ້ງ ຊາວນາຜູ່ໜຶ່ງທີ່ໄດ້ເຮັດວຽກຢູ່ເມືອງຄຸນມິງໄດ້ຫຼາຍປີບອກນັກຂ່າວວ່າ,ແຕ່ກ່ອນ,ຄ່າໃຊ້ຈ່າຍໃນການຮຽນຂອງລູກແມ່ນລາຍຈ່າຍກ້ອນໃຫຍ່ຂອງຄອບຄົວເຂົາໂດຍຕະຫຼອດ.ດຽວນີ້,ລູກຖືກຈັດເຂົ້າໃນກິດຈະການກອບກູ້ການສຶກສາທີ່ຍົກເວັ້ນຄ່າສຶກສາ3ລາຍ,ຄ່າໃຊ້ຈ່າຍໃນການຮຽນຂອງລູກໄດ້ຫຼຸດລົງຢ່າງຫຼວງຫຼາຍ,ທັງນີ້ເຮັດໃຫ້ໝົດຄອບຄົວຂອງທ່ານຈ້າວປາວເຊິ້ງດີໃຈຫຼາຍ.ທ່ານເວົ້າວ່າ:
"ພວກເຮົາມາເຮັດວຽກຢູ່ເມືອງຄຸນມິງ,ຂາຍຜັກ,ຂາຍຂອງເລັກໜ້ອຍ,ແຕ່ກ່ອນຄ່າຮຽນຂອງລູກຕ້ອງພັນກວ່າຢວນຕໍ່ປີ,ປະຈຸບັນ,ນະໂຍບາຍຍົກເວັ້ນຄ່າສຶກສາ3ລາຍໄດ້ຫຼຸດຜ່ອນຄວາມແບກຫາບຂອງຄອບຄົວເຮົາ,ຈັ່ງແມ່ນດີຫຼາຍ."
ພ້ອມກັນນັ້ນ,ອົງການປົກຄອງເມືອງຄຸນມິງຍັງຮຽກຮ້ອງໃຫ້ອົງການປົກຄອງບັນດາເຂດແລະເມືອງທີ່ຢູ່ໃຕ້ການຄຸ້ມຄອງຂອງຕົນພ້ອມກັນຈັດການເຄື່ອນໄຫວ,ເບີກເງິນຈຳເພາະ,ເປີດກວ້າງເປົ້າໝາຍກອບກູ້ຊ່ວຍເຫຼືອ.ທ່ານທຽນເວິຍຕົ່ງ,ເຈົ້າໜ້າທີ່ພະແນກການສຶກສາເມືອງຄຸນມິງກ່າວວ່າ,ເປົ້າໝາຍຂອງກິດຈະການກອບກູ້ຊ່ວຍເຫຼືອລວມທັງລູກກຳພ້າກຳພອຍທີ່ພວມຮຽນຢູ່ໂຮງຮຽນປະຖົມແລະມັດທະຍົມຢູ່ເມືອງຄຸນມິງ,ລູກເຕົ້າຂອງຜູ່ຫວ່າງງານໃນຕົວເມືອງ,ລູກເຕົ້າຂອງຄອບຄົວທຸກຈົນຢູ່ຊົນນະບົດເປັນຕົ້ນ.ທ່ານເຫັນວ່າ,ອົງການປົກຄອງປະຕິບັດການສຶກສາທີ່ຍົກເວັ້ນຄ່າສຶກສາ3ລາຍໃຫ້ແກ່ເດັກນ້ອຍຂອງຄອບຄົວທີ່ທຸກຈົນເຫຼົ່ານີ້ໄດ້ຫຼຸດຜ່ອນກຳລັງໜີບແລະຄວາມແບກຫາບຂອງຄອບຄົວ,ໂຮງຮຽນແລະອົງການຮາກຖານ.ສະນັ້ນ,ເມື່ອກິດຈະການກອບກູ້ຊ່ວຍເຫຼືອດັ່ງກ່າວຫາກໍ່ປະຕິບັດ,ກໍໄດ້ຮັບຄວາມຊົມເຊີຍຈາກມວນຊົນທັງຫຼາຍ.ທ່ານເວົ້າວ່າ:
"ຖ້າວ່າບໍ່ປະຕິບັດການສຶກສາທີ່ຍົກເວັ້ນຄ່າຮຽນ3ລາຍ,ຄ່າປຶ້ມຮຽນ,ຄ່າອຸປະກອນການຮຽນ,ທັງໝົດເຫຼົ່ານີ້ລ້ວນແຕ່ຕ້ອງການເງິນ,ສຳລັບເດັກນ້ອຍຂອງຄອບຄົວທຸກຈົນ,ພໍ່ແມ່ພວກເຂົາເຈົ້າພັດບໍ່ມີເງິນ,ເດັກນ້ອຍເຫຼົ່ານີ້ຈິ່ງເຂົ້າຮຽນບໍ່ໄດ້.ປະຈຸບັນ,ທາງອົງການປົກຄອງຊ່ວຍຈ່າຍເງິນເຫຼົ່ານີ້,ພໍ່ແມ່ປະຊາຊົນແມ່ນຊົມເຊີຍທີ່ສຸດ."
1 2
|
