|
ຕາມກົດບັນຍັດການສຶກສາທີ່ກ່ຽວຂ້ອງຂອງຈີນ,ເດັກນ້ອຍທີ່ຢູ່ໃນໄວຮຽນທັງໝົດລ້ວນແຕ່ມີສິດຮັບການສຶກສາພາກບັງຄັບ.ຜູ່ຊ່ຽວຊານການສຶກສາຊີ້ອອກວ່າ,ຍ້ອນກໍລະນີພິເສດຂອງເດັກນ້ອຍທຸກຈົນ.ອົງການປົກຄອງແລະສັງຄົມຄວນໃຫ້ຄວາມເອົາໃຈໃສ່ແລະຄວາມຮັກແພງຍິ່ງຫຼາຍກວ່າເກົ່າແກ່ພວກເຂົາເຈົ້າ,ແລະສ້າງສະພາບແວດລ້ອມອັນດີງາມໃຫ້ພວກເຂົາເຈົ້າເຕີບໃຫຍ່ຢ່າງປອດໄສ.
ຫຼາຍປີກ່ອນ,ສາວນ້ອຍຕິ່ງຢາເວິນພ້ອມກັນກັບພໍ່ແມ່ໄດ້ຍ້າຍຈາກຕ່າງຖິ່ນມາປັກກິ່ງ.ຍ້ອນຕົວເມືອງຈຳນວນໜຶ່ງໄດ້ວາງຂໍ້ຈຳກັດຕ່າງໆຕໍ່ການເຂົ້າຮຽນຂອງນັກຮຽນເຊັ່ນການເຂົ້າຮຽນຕ້ອງມີສຳມະໂນຄົວເປັນຕົ້ນ.ເດັກນ້ອຍຫຼາຍຄົນທີ່ບໍ່ມີສຳມະໂນຄົວປັກກິ່ງຄືກັນກັບນາງຕິ່ງຢາເວິນຢາກເຂົ້າຮຽນຢູ່ປັກກິ່ງຈິ່ງຍາກຫຼາຍ.ປະຈຸບັນ,ຫົວໜ່ວຍທີ່ກ່ຽວຂ້ອງຢູ່ແຫ່ງຕ່າງໆຂອງຈີນເຊັ່ນພະແນກຄຸ້ມຄອງການສຶກສາແລະພະແນກຄຸ້ມຄອງສຳມະໂນຄົວເປັນຕົ້ນໄດ້ຍົກເລີກການຈຳກັດດັ່ງກ່າວຕາມໆກັນ.ບາງຕົວເມືອງຍັງໄດ້ສ້າງໂຮງຮຽນໂດຍຈຳເພາະສຳລັບລູກເຕົ້າຂອງຄົນຕ່າງຖິ່ນທີ່ເຮັດວຽກຢູ່ຕົວເມືອງ.ສອງປີກ່ອນ,ນາງຕິ່ງຢາເວິນທີ່ມີອາຍຸ10ຂວບໄດ້ເຂົ້າໂຮງຮຽນຢ່າງສະດວກ.ປະຈຸບັນ,ນາງພວມຮຽນຢູ່ໂຮງຮຽນປະຖົມຖະໜົນຢູສວນປັກກິ່ງ.ນາງເວົ້າວ່າ:
"ຄູອາຈານຢູ່ແຫ່ງນີ້ປະຕິບັດຕໍ່ພວກເຮົາເໝືອນດັ່ງລູກຂອງຕົນ.ເມື່ອພວກເຮົາເຈັບເປັນແລ້ວ,ຄູກໍເຕືອນໃຫ້ພວກເຮົາກິນຢາຕາມເວລາກຳນົດ,ພວກເຮົາບາດເຈັບແລ້ວ,ຄູກໍພາພວກເຮົາໄປຫານາຍໝໍ.ຄັນການຮ່ຳຮຽນບໍ່ທັນໝູ່,ຄູກໍສະຫຼະເວລາພັກຜ່ອນຂອງຕົນມາສອນພວກເຮົາຕື່ມ.ເມື່ອເລີກຮຽນແລ້ວ,ທາງໂຮງຮຽນຍັງຈັດລົດສ່ົງພວກເຮົາເມືອເຮືອນ.ຢູ່ແຫ່ງນີ້,ພວກເຮົາບໍ່ພຽງແຕ່ຮຽນໄດ້ຄວາມຮູ້ວັດທະນະທຳວິທະຍາສາດທໍ່ນັ້ນ,ພວກເຮົາຍັງຮຽນຮູ້ຄວາມຮັກແພງອີກດ້ວຍ."
ຕາມສະຖິຕິລາຍໜື່ງຂອງກົມສະຖິຕິແຫ່ງຊາດຈີນ,ໃນ10ປີຂ້າງໜ້ານີ້,ແຕ່ລະປີ,ຈະມີແຮງງານ15ລ້ານຄົນຍ້າຍຈາກຊົນນະບົດເຂົ້າສູ່ຕົວເມືອງ,ມີເດັກນ້ອຍປະມານ1ລ້ານຄົນພ້ອມກັນກັບພໍ່ແມ່ເຂົ້າສູ່ຕົວເມືອງ.ທ່ານນາງກູ້ຊິວຫຼຽນຮອງປະທານຄະນະປະຈຳສະພາປະຊາຊົນແຫ່ງຊາດຈີນ,ປະທານສະຫະພັນແມ່ຍິງແຫ່ງຊາດຈີນກ່າວວ່າ,ເວົ້າໃນລະດັບອັນແນ່ນອນແລ້ວ.ລະດັບຮັບການສຶກສາຂອງປະຊາກອນຕ່າງຖິ່ນໃນຕົວເມືອງພ້ອມກັບລູກເຕົ້າຂອງພວກເຂົາເຈົ້າໄດ້ຕັດສິນລະດັບຮັບການສຶກສາກວມລວມຂອງພົນລະເມືອງຈີນແລະການພັດທະນາສະພາບແວດລ້ອມສັງຄົມຢ່າງມີອາລະຍະທຳແລະປອດໄສ.ສະນັ້ນ,ອົງການປົກຄອງແຫ່ງຕ່າງໆຄວນເອົາໃຈໃສ່ຫຼາຍກວ່າເກົ່າຕໍ່ປະຊາກອນເຄື່ອນທີ່ແລະປະຊາກອນທີ່ຊີວິດການເປັນຢູ່ທຸກຍາກ,ເອົາໃຈໃສ່ນຳລູກເຕົ້າຂອງພວກເຂົາເຈົ້າ,ເຮັດໃຫ້ເດັກນ້ອຍເຫຼົ່ານີ້ໄດ້ຮັບການສຶກສາຢ່າງສະເໝີພາບກັນ.ທ່ານນາງກູ້ຊິວຫຼຽນເວົ້າວ່າ:
"ເດັກນ້ອຍເຄື່ອນທີ່ຄືກັນກັບເດັກນ້ອຍທັງໝົດ,ຄວນມີສິດສະເໝີພາບໃນການຢູ່ລອດ,ການປົກປ້ອງ,ການພັດທະນາແລະການເຂົ້າຮ່ວມ.ການເຮັດວຽກງານການສຶກສາຂອງເດັກນ້ອຍເຄື່ອນທີ່ໃຫ້ດີແລະປົກປ້ອງສິດປະໂຫຍດຊອບກົດໝາຍຂອງພວກເຂົາເຈົ້າມີຄວາມໝາຍສຳຄັນທີ່ສຸດຕໍ່ການຊຸກຍູ້ການພັດທະນາເສດຖະກິດ,ສັງຄົມມີສະຖຽນລະພາບ,ຄວາມກ້າວໜ້າດ້ານອາລະຍະທຳຂອງຈີນ.ທົ່ວສັງຄົມຕ້ອງເອົາໃຈໃສ່ນຳເດັກນ້ອຍເຄື່ອນທີ່,ໃຫ້ຄວາມຮັກແພງຍິ່ງຫຼາຍກວ່າເກົ່າແກ່ພວກເຂົາເຈົ້າ."
ການເຮັດໃຫ້ເດັກນ້ອຍຢູ່ໃນໄວຮຽນຮັບການສຶກສາພາກບັງຄັບ9ປີແມ່ນໜ້າທີ່ຮັບຜິດຊອບຍາວນານຂອງລັດຖະບານຈີນ.ປະຈຸບັນ,ລັດຖະບານຈີນແລະວົງການຕ່າງໆໃນສັງຄົມໄດ້ຮ່ວມກັນແບກຫາບໜ້າທີ່ຮັບຜິດຊອບດັ່ງກ່າວ.ພະຍາຍາມເຮັດໃຫ້ເດັກນ້ອຍຢູ່ໃນໄວຮຽນທັງໝົດໃນຄອບຄົວທຸກຍາກໃນຊົນນະບົດແລະຕົວເມືອງສາມາດໄດ້ເຂົ້າໂຮງຮຽນໝົດ.
1 2
|
