|
(ພູຊິ່ງເຊີງຊ່ານແລະຝາຍຕູ່ຈ່ຽງອ້ຽນ)
ກິດຈະການຊົນລະປະທານທີ່ກໍ່ສ້າງເມື່ອສອງພັນກວ່າປີກ່ອນ,ນັບມາຮອດປະຈຸບັນຍັງເສີມຂະຫຍາຍບົດບາດທີ່ລະບາຍນ້ຳເຂົ້ານາສວນແລະປ້ອງກັນນ້ຳຖ້ວມ,ໃນໂລກນີ້ມີແຕ່ແຫ່ງດຽວ,ນັ້ນກໍຄືຝາຍຕູ່ຈ່ຽງອ້ຽນຂອງຈີນ.ປີ2000,ສິ່ງກໍ່ສ້າງອັນດີເລີດດັ່ງກ່າວຂອງມວນມະນຸດແລະພູຊິ່ງເຊີງຊ່ານ ບ່ອນຕັ້ງຝາຍຕູ່ຈ່ຽງອ້ຽນພ້ອມກັນຖືກຈັດເຂົ້າບັນຊີລາຍຊື່ມໍລະ ດົກໂລກ.
(ປະຕູຂອງພູຊິ່ງເຊີງຊ່ານ)
ພູຊິ່ງເຊີງຊ່ານຕັ້ງຢູ່ຫ່າງຈາກເມືອງຕູ່ຈ່ຽງອ້ຽນຂອງແຂວງເຊສວນ ພາກຕາເວັນຕົກຂອງຈີນໄປທິດຕາເວັນຕົກສຽງໃຕ້15ກິໂລແມັດ,ແຫ່ງນີ້ມີທິວທັດທຳມະຊາດສວຍງາມ,ແຕ່ບູ ຮານນະການມານີ້ກໍແມ່ນບ່ອນສົມຫວັງສຳລັບການທ່ອງທ່ຽວແລະດຳລົງຊີວິດ.ຄ.ສ.ປີ143, ທ່ານຈ່າງລີງໄດ້ປະດິດສ້າງສາສະໜາເຕົາສາສະໜາພື້ນເມືອງຂອງຈີນຢູ່ພູຊິ່ງເຊີງຊ່ານ, ໄດ້ສ້າງຖານະອັນສຳຄັນໃຫ້ພູຊິ່ງເຊີງຊ່ານໃນປະຫວັດສາສະໜາເຕົາຂອງຈີນ.ປະຈຸບັນນີ້,ພູຊິ່ງເຊີງຊ່ານມີຈຸ້ມສິ່ງກໍ່ສ້າງວັດສາສະໜາເຕົາທີ່ໂຮມສູນກັນຫຼາຍກວ່າໝູ່,ສິ່ງທີ່ຕ່າງກັນກັບພູອູຕ່າງຊ່ານ ເຊ່ິງເປັນປູຊະນີຍະສະຖານສາສະໜາເຕົານັ້ນແມ່ນ,ຈຸ້ມສິ່ງກໍ່ສ້າງສາສະໜາເຕົາຂອງພູຊິ່ງເຊີງຊ່ານເປັນແບບທຳມະຊາດແລະແບບບູຮານ,ມີສີສັນພິເສດອັນເຂັ້ມຂຸ້ນຂອງພາກຕາເວັນຕົກສຽງໃຕ້ຂອງຈີນ,ຈຸ້ມສິ່ງກໍ່ສ້າງສາສະໜາເຕົາຂອງພູອູຕ່າງຊ່ານພັດສະແດງໃຫ້ເຫັນສີສັນພິເສດທີ່ເປັນສິ່ງກໍ່ສ້າງພະລາຊະວັງ,ແລະມີປະຫວັດສັ້ນກວ່າພູຊິ່ງເຊີງຊ່ານ.
(ວັດຊ້າງຊິ່ງ)
ວັດສາສະໜາເຕົາຂອງພູຊິ່ງເຊີງຊ່ານຖືຖ້ຳທ່ຽນຊີ່ທີ່ທ່ານຈ່າງລີງເຄີຍພຳນັກຢູ່ນັ້ນເປັນແກນກາງ,ຍັງມີວັດອື່ນໆ10ກວ່າວັດເຊັ່ນ ວັດຈ້ຽນຟູແລະວັດຊ້າງຊິ່ງ.ສິ່ງກໍ່ສ້າງເຫຼົ່ານີ້ໄດ້ສ່ອງແສງໃຫ້ເຫັນແນວຄິດທີ່ສະແຫວງຫາທຳມະຊາດຂອງສາສະໜາເຕົາ,ສ້າງສິ່ງກໍ່ສ້າງ ນານາຊະນິດດ້ວຍຮູບການດັ້ງເດີມເຊັ່ນຢອງຢາຍກັນຢູ່ສອງຂ້າງເສັ້ນກາງຢ່າງກຳ້ເກິ່ງກັນ,ແລະອາໄສພູມສັນຖານຢ່າງສະຫຼາດຫຼັກແຫຼມ.ສິ່ງປະດັບປະດາສິ່ງກໍ່ສ້າງກໍສ່ອງແສງໃຫ້ເຫັນແນວຄິດທີ່ສະແຫວງຫາສິລິມຸງຄຸນ ອາຍຸໝັ້ນຂວັນຍືນແລະເປັນເທວະດາຂອງສາສະໜາເຕົາ,ມີມູນຄ່າປະຫວັດສາດແລະສິລະປະອັນສຳຄັນສຳລັບການລົງເລິກຄົ້ນຄວ້າແນວຄິດປັດຊະຍາສາສະໜາເຕົາໃນສະໄໝບູຮານຂອງຈີນ.ສິ່ງທີ່ໜ້າກ່າວເຖິງນັ້ນແມ່ນ,ໃນວັດເຫຼົ່ານີ້ມີຄະຕິຄູ່ຈຳນວນຫຼວງຫຼາຍ.ບໍ່ພຽງແຕ່ໄດ້ຍ້ອງຍໍຄວາມງາມຂອງພູຊ່ິງເຊີງຊ່ານທໍ່ນັ້ນ, ຍັງໄດ້ຍ້ອງຍໍແນວຄິດສາສະໜາເຕົາ ຄຳພີສາສະໜາເຕົາ,ໃນນັ້ນຈຳນວນບໍ່ໜ້ອຍແມ່ນບົດປະພັນຂຽນງາມອັນຍອດຢ້ຽມຂອງຈີນ.ນອກນີ້,ຢູ່ຕີນພູຕາເວັນອອກຂອງພູຊິ່ງເຊີງຊ່ານມີຮ່ອງຮອຍເມືອງມາງເຊີງຂອງທ້າຍຍຸກເຄື່ອງມືຫີນໃໝ່ທີ່ໄກຈາກປະຈຸບັນປະມານ4500ປີ,ຮ່ອງຮອຍເມືອງບູຮານໃນຍຸກດຽວກັນແມ່ນເຫັນໜ້ອຍທີ່ສຸດຢູ່ຈີນ.ວັດຖຸບູຮານຈຳນວນຫຼວງຫຼາຍທີ່ຂຸດອອກຈາກບ່ອນນີ້ມີຄວາມໝາຍສຳຄັນສຳລັບການເປີດເຜີຍອາລະຍະທຳບູຮານຂອງທ້ອງຖິ່ນດັ່ງກ່າວ.ນອກນີ້,ຍ້ອນມີສິ່ງແວດລ້ອມຊີວະພາບອັນດີງາມ,ພູຊິ່ງເຊີງຊ່ານຈຶ່ງມີໝີແພນດາແຈກຢາຍຢູ່ຫຼາຍ.
(ທຳມະພິທີສາສະໜາເຕົາຢູ່ພູຊິ່ງເຊີງຊ່ານ)
1 2 3
|
