|
|
 |
| (GMT+08:00)
2004-09-06 16:42:16
|
 |
|
ທ້າວJAYກັບດົນຕີR&Bຂອງລາວ(ພາບ) (ສຽງ)
cri
ໃນລາຍການມື້ນີ້, ຂ້າພະເຈົ້າຈະແນະນຳທ້າວ周杰伦ຄືທ້າວJAY ນັກຮ້ອງທີ່ມາຈາກໄຕ້ຫວັນ, ດຽວນີ້ ຊາວຈີນພວມນິຍົມທ້າວJAY ຫລາຍຍ້ອນທຳນອງດົນຕີ R&B ຂອງລາວ.
ປີ 2000, ທ້າວ JAY ອາຍຸພຽງ 20 ປີ, ກໍໄດ້ອັດຈຳໜ່າຍແຜ່ນCDຊື່ JAY ທຳນອງ R&B, ຈົນໄດ້ໄດ້ພາໃຫ້ເວທີດົນຕີສະໄໝນິຍົມສະເທືອນ. ຄົນທັງຫລາຍຄຶດບໍ່ອອກວ່າ, ຊາວໜຸ່ມຜູ່ນ້ອຍໆ ເປັນຫຍັງຈຶ່ງມີຄວາມສາມາດປານນີ້. ແຕ່ກໍຈຳເປັນຕ້ອງຮັບຮູ້ວ່າ, ທ້າວ JAY ເປັນຄົນເກ່ັງແທ້. ເພງໃນແຜ່ນCD ຂອງລາວສ່ວນຫລາຍແມ່ນລາວແຕ່ງເອງ, ສ່ວນເອກະລັກດົນຕີຂອງລາວກໍແມ່ນ R&B ແທ້ໆທີ່ພວມນິຍົມກັນຫລາຍບົນເວທີເພງສະໄໝນິຍົມຢູ່ເອີລົບອາເມລິກາໃນຄາວນັ້ນ. ເວົ້າສຳລັບດົນຕີສະໄໝນິຍົມຂອງຈີນໃນຄາວນັ້ນແລ້ວ, ບໍ່ຕ່າງຫຍັງກັບໄດ້ມີລົມເຢັນສະບາຍພັດມາຮູດໜຶ່ງ. ສະນັ້ນ, ແຜ່ນCD ຂອງລາວໄດ້ຮັບຄວາມຊົມເຊີຍຫລາຍກໍ່ເປັນເລ່ືອງທຳມະດາ. ນອກນັ້ນ, ທ້າວ JAY ມີວາດຊົງບູ້ໆ, ສີໜ້າເຍືອກເຢັນແບບບໍ່ອໍ້ແອ້ກັບໃຜ, ພໍດີເຂົ້າກັບເອກະລັກຂອງ ດົນຕີ, ອັນໄດ້ສ້າງພື້ນຖານໃຫ້ທ້າວ JAY ກາຍເປັນດາລາເພງລຸ້ນໃໝ່. ທີ່ທ່ານພວມຟັງຢູ່ນີ້ແມ່ນເພງJiandanai ຮັກແບບງ່າຍໆ.
ການພິມຈຳໜ່າຍແຜ່ນCDແຜ່ນທຳອິດຢ່າງສຳເລັດຜົນບໍ່ໄດ້ເຮັດໃຫ້ທ້າວJAY ຜ່ອນຊ້າບາດກ້າວສະແຫວງຄວາມກ້າວໜ້າທາງດ້ານດົນຕີ. ປີ 2001, ທ້າວ JAY ໄດ້ອັດຈຳໜ່າຍແຜ່ນCD ແຜ່ນທີສອງທີ່ໃຫ້ຊື່ວ່າ: FANTASY, ຖ້າເວົ້າວ່າ, CDແຜ່ນທຳອິດໄດ້ສ້າງຖານະດາລາເພງລຸ້ນໃໝ່ໃຫ້ລາວແລ້ວ, ແຜ່ນCD"FANTASY", ກໍ່ໄດ້ເຮັດໃຫ້ຖານະດາລາເພງ R&B ຂອງທ້າວ JAY ຍິ່ງໝັ້ນຄົງຢ່າງບໍ່ຫວັ່ນໄຫວຄອນແຄນຈັດເມັດ. ພໍແຜ່ນCDດັ່ງກ່າວນຳອອກຈຳໜ່າຍ, ກໍ່ໄດ້ຮັບຄວາມຊົມເຊີຍຢ່າງເປັນກະແສ, ຈຳໜ່າຍຢູ່ອາຊີໄດ້ເກືອບ 1 ລ້ານແຜ່ນ, ໄດ້ຢູ່ແຖວໜ້າຂອງການລຽນລຳດັບຈຳໜ່າຍແຜ່ນສຽງໃນປີນັ້ນ. ແຟນເພງຫລວງຫລາຍ, ໂດຍສະເພາະແມ່ນແຟນເພງໃນແຜ່ນດິນໃຫຍ່ຈີນແມ່ນໄດ້ຟັງແຜ່ນCDດັ່ງກ່າວແລ້ວຈຶ່ງໄດ້ຮູ້ຄວາມສາມາດຂອງທ້າວJAY ໃນດ້ານດົນຕີຢ່າງແທ້ຈິງ. ທຳນອງ R&B ທີ່ມ່ວນແບບຕ່າງໝູ່ແລະນັບມື້ນັບສຸກງອມໄດ້ຖືກອົກຖືກໃຈຊາວໜຸ່ມຫລາຍຈົນນັບບໍ່ຖ້ວນ, ເພງຂອງທ້າວ JAY ແມ່ນເພງທີ່ມີຜູ່ຂໍຟັງຫລາຍກວ່າໝູ່ໃນວິທະຍຸຫຼືໂທລະພາບ. ຕໍ່ໄປ, ພວກເຮົາມາຟັງເພງShuangjiegun ໄມ້ສອງທ້ອນ.
1 2
|
|
|
