|
ວັນທີ10ກັນຍາ,ງານສິລະປະຈີນຄັ້ງທີ7ໄດ້ໄຂຂຶ້ນຢູ່ເມືອງຮາງໂຈ່ວແຂວງເຈີ້ຈ່ຽງ ພາກໃຕ້ຂອງຈີນ.ໃນເວລາເຄິ່ງເດືອນປາຍ,ງານສິລະປະຄັ້ງນີ້ໄດ້ຈັດການສະແດງເກືອບຮ້ອຍເທື່ອແລະຈັດການເຄື່ອນໄຫວຕ່າງໆເຊັ່ນງານສຳມະນາແລະການວາງສະແດງເປັນຕົ້ນ,ໄດ້ໂຮມສູນວາງສະແດງໝາກຜົນຫຼ້າສຸດແຫ່ງການພັດທະນາພາລະກິດສິລະປະວັດທະນະທຳຂອງຈີນ.ຕໍ່ໄປເຊີນຟັງບົດແຈ້ງຂ່າວຂອງນັກຂ່າວວິທະຍຸພວກເຮົາ.
ທີ່ທ່ານພວມຟັງຢູ່ນີ້ແມ່ນອັດສຽງຂອງງານລາຕີພິທີໄຂງານສິລະປະຄັ້ງນີ້.
ງານສິລະປະຈີນແມ່ນງານສິລະປະແຫ່ງຊາດທີ່ມີລະດັບສູງກວ່າໝູ່ແລະມີຂະໜາດໃຫຍ່ກວ່າໝູ່ຂອງຈີນ.ແຕ່ສ້າງຕັ້ງຂຶ້ນເມື່ອປີ1987ເປັນຕົ້ນມາ,ໄດ້ຈັດ6ຄັ້ງຢ່າງສຳເລັດຜົນ,ແລະໄດ້ກາຍເປັນປ່ອງຢ້ຽມອັນສຳຄັນທີ່ສ່ອງແສງໃຫ້ເຫັນການສະແດງຂອງວົງການສິລະປະ ວັດທະນະທຳຂອງຈີນແລະສະແດງໃຫ້ເຫັນທິດຂະຫຍາຍຕົວຂອງສິລະປະຈີນ.ງານສິລະປະທຸກຄັ້ງໄດ້ດູດດຶງຜູ່ຊົມຈຳນວນຫຼວງຫຼາຍດ້ວຍລາຍການອັນຍອດຢ້ຽມຢ່າງຫຼວງຫຼາຍ,ແລະມີສີສັນພິເສດແຫ່ງຍຸກສະໄໝອັນພົ້ນເດັ່ນ,ໄດ້ກາຍເປັນງານວັດທະນະທຳຂອງປະຊາຊົນຈີນທຸກຊົນເຜ່ົາ.ໃນພິທີໄຂງານ,ທ່ານເຊິນສຽວກວ່າງ ຮອງລັດຖະມົນຕີກະຊວງວັດທະນະທຳຈີນ ຫົວໜ້າຄະນະກຳມະການຈັດຕັ້ງງານສິລະປະຈີນຄັ້ງທີ7ກ່າວຄຳປາໄສວ່າ:"ງານສິລະປະຈີນແມ່ນງານສິລະປະທີ່ໃຫຍ່ໂຕມະໂຫລານ,ແມ່ນວັນບຸນຂອງປະຊາຊົນ,ມັນໄດ້ກາຍເປັນຮູບການອັນສຳຄັນທີ່ສ້າງພາລະກິດສິລະປະວັດທະນະທຳໃຫ້ຈະເລີນດ້ວຍສີສັນພິເສດຕ່າງໆ ເຊັ່ນການເຄື່ອນໄຫວສິລະປະທີ່ມີຫຼາຍສີຫຼາຍສັນແລະມີເນື້ອໃນອຸດົມສົມບູນ,ການສະແດງອັນຍອດຢ້ຽມໜ້າຊົມ,ການເຂົ້າຮ່ວມຢ່າງກວ້າງຂວາງຂອງປະຊາຊົນແລະການເຄື່ອນໄຫວວັດທະນະທຳຂອງປວງຊົນທີ່ມີຫຼາຍຮູບຫຼາຍແບບ."
ຕາມການສະເໜີ,ງານສິລະປະຈີນຄັ້ງທີ7ມີຂະໜາດໃຫຍ່ກວ່າໝູ່ ມີຜູ່ເຂົ້າຮ່ວມຫຼາຍກວ່າໝູ່ແລະມີລາຍການສະແດງຫຼາຍກວ່າໝູ່ເມື່ອທຽບໃສ່ທຸກຄັ້ງທີ່ຜ່ານມາ.ມີ50ກວ່າລາຍ ການທີ່ມາຈາກ20ກວ່າແຂວງ ກຳແພງນະຄອນແລະເຂດປົກຄອງຕົນເອງຂອງຈີນໄດ້ເຂົ້າຮ່ວມການສະແດງ.ໃນນັ້ນລວມທັງຮູບການສິລະປະຕ່າງໆເຊັ່ນລະຄອນຟ້ອນ ລະຄອນເສົ້າ ງິ້ວປັກກິ່ງ ລະຄອນຮ້ອງແລະງິ້ວທ້ອງຖິ່ນເປັນຕົ້ນ.ໂດຍສະເພາະແມ່ນລາຍການງິ້ວທີ່ຕາງໜ້າສີສັນຊົນເຜົ່າຂອງຈີນ,ມີງິ້ວທ້ອງຖິ່ນ20ກວ່າຊະນິດໄດ້ເຂົ້າຮ່ວມການສະແດງ. ງິ້ວທ້ອງຖິ່ນທຸກຊະນິດລ້ວນແຕ່ໄດ້ສະແດງລາຍການທີ່ດີກວ່າໝູ່ຂອງຕົນ,ອາດເວົ້າໄດ້ວ່າ,ງານສິລະປະຄັ້ງນີ້ໄດ້ໂຮມສູນການສະແດງຍອດຢ້ຽມດ້ານສິລະປະທີ່ຂົງເຂດສິລະປະເວທີສະແດງຂອງຈີນແຕ່ງອອກມາໃນຫຼາຍປີມານີ້.ຕົວຢ່າງຄືລະຄອນດົນຕີເລື່ອງ《ຫ້ານາງສາວ》ໄດ້ເອົາລະຄອນດົນຕີທີ່ແຜ່ລາມເຂົ້າມາຈີນຈາກຝ່າຍຕາເວັນຕົກປະສານກັນກັບເພງພື້ນເມືອງຈີນປະສານກັນທີ່ມີກິ່ນອາຍຊົນນະບົດ,ເຮັດໃຫ້ຄົນຮູ້ສຶກໃໝ່ອ່ຽມທີ່ສຸດ.
1 2
|
