|
ຄວາມເປັນມາຂອງບຸນໄຫວ້ພະຈັນຂອງຈີນ(ພາບ)(ສຽງ)
cri
Author: zs
ມື້ນີ້ແມ່ນບຸນໄຫວ້ພະຈັນຂອງຈີນ.ຕາມປະຕິທິນຈັນທະຄະຕິຂອງຈີນແມ່ນກົງກັບມື້ເພັງ15ຄຳ່ເດືອນ8,ເດືອນ8ຈັນທະຄະຕິພໍດີແມ່ນເຄິ່ງກາງຂອງລະດູໃບໄມ້ລົ່ນ,ມື້ເພັງ15ຄຳ່ກໍຄ້ອມພໍດີແມ່ນກາງເດືອນ8ອີກ,ສະນັ້ນ,ຄົນຈີນຈຶ່ງເອີ້ນບຸນໄຫວ້ພະຈັນເປັນບຸນ "ຈົ່ງຊິ່ວເຈ" ໝາຍຄວາມວ່າບຸນກາງລະດູໃບໄມ້ລົ່ນ.
ໃນມື້ບຸນໄຫວ້ພະຈັນ,ປະຊາຊົນຈີນມີຮີດຄອງກິນເຂົ້າໜົມເປ້ຍໄຫວ້ ພະຈັນ.ຕາມເລົ່າລືກັນວ່າ,ເມື່ອ300ກວ່າປີກ່ອນ,ເຈົ້າຈັກກະພັດສຽນຫຼົງແຫ່ງລາດຊະວົງເຊັ່ງໄປກວດລາດຊະການຢູ່ພາກໃຕ້,ໃນເວລາເພ່ິນສະເດັດໄປເຖິງເມືອງຮາງໂຈ່ວນັ້ນພໍດີແມ່ນມື້ບຸນໄຫວ້ພະຈັນ,ປັນຍາຊົນໝູ່ໜ່ຶງຖະຫວາຍເຂົ້າໜົມເປ້ຍໃຫ້ພະອົງສະເຫວີຍ,ພະອົງຊົມພະຈັນໄປນຳ, ສະເຫວີຍເຂົ້າໜົມໄປນຳ,ແລ້ວຊົມເຊີຍວ່າ, "ພະຈັນງາມ ເຂົ້າໜົມກໍແຊບ!" ແຕ່ນັ້ນມາ,ເຂົ້າ ໜົມເປ້ຍກໍເລີຍກາຍເປັນເຂົ້າໜົມໄຫວ້ພະຈັນ.ທີ່ຈິ່ງແລ້ວ,ຮີດຄອງກິນເຂົ້າໜົມໄຫວ້ພະຈັນນັ້ນເມື່ອ1000ປີກ່ອນສະໄໝລາດຊະວົງຊົ້ງກໍມີແລ້ວ.
ເຂົ້າໜົມໄຫວ້ພະຈັນທີ່ຄົນຈີນເຮັດນັ້ນມີຫຼາຍຢ່າງຫຼາຍ ແນວ,ໃນເວລາເຮັດເຂົ້າໜົມ,ຊ່າງເຮັດເຂົ້າໜົມມັກປັ້ນແຕ່ງຮູບໂສມສິລະປະນາງຟ້າຊາງເອີເຫາະເຫີນຂຶ້ນສູ່ດວງພະຈັນໃນເທບນິຍາຍອັນໜ້າສະອອນ.ຕາມເລ່ົາລືກັນວ່າ,ໃນສະໄໝດຶກດຳບັນ,ຢູ່ເທິງຟ້າມີຕາເວັນ10ດວງ,ຮ້ອນແຜດເຜົາ,ຈົນນ້ຳທະເລເຫີຍເຫືອດແຫ້ງໄປໝົດ,ປະຊາຊົນໄຮ້ທາງທຳມາຫາກິນ.ໃນຄາວນັ້ນ,ມີວິລະຊົນຜູ່ໜ່ຶງຊື່ວ່າໂຮ້ອີ້,ມີກຳລັງແຂງແຮງຢ່າງບໍ່ມີໃຜປຽບປານ,ທ້າວໂຮ້ອີ້ໄດ້ໃຊ້ທະນູຍິງຕາເວັນ9ດວງໃຫ້ຕົກລົງມາ,ຈົ່ງໄວ້ດວງໜຶ່ງເພື່ອສ້າງຄວາມສຸກໃຫ້ແກ່ປະຊາຊົນ.ແຕ່ນັ້ນມາ,ຊື່ຂອງໂຮ້ອີຊ່າລືທົ່ວໃຕ້ຟ້າເມືອງຄົນ,ຜູ່ໃດກໍເຄົາລົບນັບຖືເຂົາ.ພາຍລຸນມາ,ທ້າວໂຮ້ອີ້ໄດ້ເອົາເມຍຜູ່ອ່ອນໂຍນສວຍງາມຊື່ວ່າຊາງເອີ.ມີມື້ໜຶ່ງ,ເທວະດາອົງໜ່ຶງເອົາຢາອາຍຸຍືນຫໍ່ໜ່ຶງໃຫ້ທ້າວໂຮ້ອີ້ແລະບອກວ່າ,ຖ້າກິນແລ້ວ,ກໍຈະເຫາະຂຶ້ນເທິງຟ້າກາຍເປັນເທວະດາ.ບໍ່ນຶກບໍ່ຝັນວ່າ,ໃນມື້ເພັງ15ຄຳ່ເດືອນ8,ນາງຊາງເອີທີ່ປະຫຼາດໃຈໄດ້ລັກກິນຢາອາຍຸຍືນຫໍ່ນັ້ນ,ເລີຍເຫາະຂຶ້ນເທິງຟ້າໄປເປັນເທວະນາລີຢູ່ໃນວັງພະຈັນ.ແຕ່ວ່າຢ່ໃນວັງພະຈັນງຽບເຫງົາເຍືອກເຢັນ,ມີແຕ່ຕົ້ນດອກແຄຕົ້ນດຽວແລະກະຕ່າຍໂຕດຽວເປັນເພື່ອນນາງ.
1 2 3
|
|
