|
|
 |
| (GMT+08:00)
2005-02-01 10:34:37
|
 |
|
ທະນາຄານທຶນຕ່າງປະເທດເລັ່ງລັດການພັດທະນາຢູ່ຈີນ(ສຽງ)
cri
Author: q
ຕາມໄດ້ຊາບ,ພາຍໃນເວລາບໍ່ຮອດສອງເດືອນຫຼັງຈາກຈີນປະກາດລາຍຊື່ຕົວເມືອງງວດຫຼ້າສຸດທີ່ໄຂຕະຫຼາດທຸລະກິດເງິນຢວນ,ຄະນະກຳມະການຕິດຕາມຄຸ້ມຄອງຂະແໜງການການທະນາຄານຈີນໄດ້ອະນຸມັດທະນາຄານທຶນຕ່າງປະເທດ8ແຫ່ງເຮັດທຸລະກິດເງິນຢວນຈີນຢູ່ຕົວເມືອງໄຂປະຕູໃໝ່,ເຮັດໃຫ້ຍອດຈຳນວນອົງການທະນາຄານທຶນຕ່າງປະເທດທີ່ໄດ້ຮັບອະນຸຍາດເຮັດທຸລະກິດເງິນຢວນຢູ່ຈີນໄດ້ບັນລຸ116ແຫ່ງ.ຕົວເລກສະຖິຕິຫຼ້າສຸດສະແດງໃຫ້ເຫັນວ່າ,ປະຈຸບັນ,ຍອດມູນຄ່າຊັບສິນຂອງທະນາຄານທຶນຕ່າງປະເທດຢູ່ຈີນໄດ້ລື່ນກາຍ65ຕື້ໂດລາສະຫະລັດ,ກວມປະມານ1,8%ຂອງຍອດມູນຄ່າຊັບສິນອົງການການເງິນຂອງຂະແໜງການການທະນາຄານຈີນ.
ນອກຈາກຕັ້ງສາຂາອົງການ ຢູ່ຈີນແລ້ວ,ທະນາຄານທຶນຕ່າງປະເທດຍັງໃຊ້ຮູບການເຂົ້າຮ່ວມຫຸ້ນສ່ວນທະນາຄານທຶນຈີນຂະໜາດນ້ອຍແລະຂະໜາດກາງເພື່ອພັດທະນາທຸລະກິດຢູ່ຈີນ.ປະຈຸບັນ,ໄດ້ມີ9ທະນາຄານທຶນຈີນໄດ້ຮັບເອົາ ຫຸ້ນສ່ວນຂອງທຶນຕ່າງປະເທດ.ທະນາຄານທຶນຕ່າງປະເທດໄດ້ອີງໃສ່ທະນາຄານທຶນຈີນທີ່ໄດ້ສ້າງຕາໜ່າງ ທຸລະກິດທະນາຄານຢ່າງກວ້າງຂວາງ,ເຂົ້າສູ່ຕະຫຼາດຈີນແລະເປີດກວ້າງໂກຕາຂອງຕົນ. ທ່ານລີຢາງ ຫົວໜ້າສະຖາບັນຄົ້ນຄວ້າການທະນາຄານຂອງສະພາບັນດິດວິທະຍາສາດສັງຄົມຈີນໄດ້ຕີລາຄາວ່າ: "ທະນາຄານທຶນຕ່າງປະເທດໄດ້ເຫັນແລ້ວວ່າຈີນໄດ້ກາຍເປັນແລະໃນໄລຍະໜຶ່ງໃນພາຍໜ້າຍັງຄົງກາຍເປັນຈຸດເພີ່ມຜົນກຳໄລ່ສຳຄັນຈຸດໜຶ່ງໃນທົ່ວໂລກ.ສະນັ້ນ,ພວກເຂົາເຈົ້າຈິ່ງໄດ້ເພີ່ມຄວາມແຮງໃນການພັດທະນາທຸລະກິດຢູ່ຈີນ."
ເມື່ອປະເຊີນກັບການແກ່ງແຍ່ງຂອງທະນາຄານທຶນຕ່າງປະເທດ,ທະນາຄານຈີນຫຼາຍແຫ່ງກໍໄດ້ຕັ້ງໜ້າເຄື່ອນໄຫວ,ຍົກກຳລັງແກ່ງແຍ່ງຂອງຕົນໃຫ້ສູງຂຶ້ນຢ່າງບໍ່ຢຸດຢັ້ງ.ຕົວຢ່າງ,ຫຼາຍທະນາຄານຈີນໄດ້ວາງຜະລິດຕະພັນປະດິດສ້າງໃໝ່ຕ່າງໆເພື່ອດູດດຶງເອົາລູກຄ້າ,ນີ້ກໍແມ່ນມາດຕະການສຳຄັນລາຍໜຶ່ງຂອງພວກເຂົາເຈົ້າ.ຕາມໄດ້ຊາບ,ເລີ່ມແຕ່ວັນທີ10ມັງກອນປີ2005ເປັນຕົ້ນມາ,ພົນລະເມືອງຈີນທີ່ຖືບັດທະນາຄານເງິນຢວນຈີນທີ່ມີເຄື່ອງໝາຍໄຊນາຢູນຽນເພທີ່ທະນາຄານເຂດໃນຈີນຈຳໜ່າຍນັ້ນ,ກໍສາມາດຊົມໃຊ້ໂດຍກົງຢູ່ສ.ເກົາຫຼີ,ໄທແລະສິງກະໂປໄດ້.ການໃຫ້ຊາວຈີນໃຊ້ບັດທະນາຄານຈີນຢູ່ຕ່າງປະເທດ,ເວົ້າສຳລັບທະນາຄານຈີນແລ້ວ,ຄວາມໝາຍສຳຄັນກວ່າໝູ່ແມ່ນທະນາຄານຈີນສາມາດສວຍໂອກາດນີ້ສະໜອງການບໍລິການໂດຍກົງແລະຍິ່ງມີລັກສະນະທົ່ວໃຫ້ແກ່ລູກຄ້າທີ່ຖືບັດທະນາຄານຊະນິດນີ້.ທ່ານຊູເຄີ ຮອງຜູ້ອຳນວຍການໃຫຍ່ຂອງຂະແໜງການທຸລະກິດທະນາຄານສ່ວນບຸກຄົນຂອງທະນາຄານການກໍ່ສ້າງຈີນເວົ້າວ່າ:"ການບໍລິການໃຊ້ບັດທະນາຄານຈີນຢູ່ຕ່າງປະເທດ,ທີ່ຈິງແລ້ວໄດ້ອຳນວຍໂອກາດໃຫ້ແກ່ບັນດາທະນາຄານຈີນຂະຫຍາຍການບໍລິການໃຫ້ລູກຄ້າຂອງຕົນ."
ບຸກຄົນຂະແໜງການການທະນາຄານເວົ້າວ່າ,ທະນາຄານທຶນຕ່າງປະເທດພັດທະນາຢ່າງໄວວາຢູ່ຈີນ,ໄດ້ນຳເອົາການແກ່ງແຍ່ງມາໃຫ້ທະນາຄານຂອງຈີນ,ທັງໄດ້ຊຸກຍູ້ທະນາຄານຂອງຈີນ,ໂດຍປະເຊີນກັບຕະຫຼາດທີ່ໄຂປະຕູຕໍ່ພາຍນອກຢ່າງບໍ່ຢຸດຢັ້ງ,ຂະແໜງການການທະນາຄານຂອງຈີນຈະກ້າວໄປສູ່ຄວາມສຸກງອມເປັນກ້າວໆໃນການແກ່ງແຍ່ງ,ການປະຕິຮູບແລະການປະດິດສ້າງ.
1 2
|
|
|
