|
ໃນຫລາຍປີມານີ້, ນັກຮ້ອງຊົນເຜົ່າສ່ວນໜ້ອຍໄດ້ໂປໂລເດັ່ນຂຶ້ນບົນເວທີເພງສະໄໝນິຍົມຂອງຈີນ, ທ້າວຢົງຈົ່ງເອີຈາ ນັກຮ້ອງເຜົ່າຕິເບດກໍແມ່ນຜູ້ໜຶ່ງ. ສຽງເພງຂອງລາວດັງກ້ອງກັງວານແລະມີອາລົມເລິກເຊິ່ງ, ມີສີສັນທ້ອງຖິ່ນແລະມີລັກສະນະຊົນເຜົ່າອັນເຂັ້ມຂຸ້ນ. ໃນລາຍການມື້ນີ້, ທ່ານຈະໄດ້ຮູ້ຈັກຄວາມສາມາດທາງດ້ານສິລະປະຂອງນັກຮ້ອງເຜົ່າຕິເບດຜູ້ນີ້ຈາກສຽງເພງຂອງທ່ານ.
ທີ່ທ່ານພວມຟັງຢູ່ນີ້ແມ່ນເພງShenqidejiuzhai ບ້ານຈີວຈ້າຍທີ່ງາມອັດສະຈັນ ຂັບຮ້ອງໂດຍທ້າວຢົງຈົ່ງເອີຈາ. ເພງນີ້ອາດເວົ້າໄດ້ວ່າແມ່ນເພງທີ່ເຮັດໃຫ້ທ້າວຢົງຈົ່ງເອີຈາຂຶ້ນຊື່ລືນາມ. ໃນການແຂ່ງຂັນນັກຮ້ອງໜຸ່ມລະດັບຊາດທາງໂທລະພາບຄັ້ງທີ 9 ປີ 2000, ທ້າວຢົງຈົ່ງເອີຈາໄດ້ຮ້ອງເພງນີ້ແລ້ວໄດ້ຮັບລາງວັນຂັນເງິນໃນການຂັບຮ້ອງເພງສະໄໝນິຍົມແລະລາງວັນນັກຮ້ອງຊາຍທີ່ໄດ້ຮັບຄວາມຊົມເຊີຍກວ່າໝູ່. ແຕ່ນັ້ນມາ, ຄຽງຄູ່ກັບເພງນີ້ນິຍົມກັນຮ້ອງໃນແຫ່ງຕ່າງໆຂອງຈີນ, ຄົນທັງຫລາຍກໍຄ່ອຍໆຮູ້ຈັກທ້າວຢົງຈົ່ງເອີຈາ, ແລະມັກຟັງເພງຂອງລາວ.
ບ້ານຈີວຈ້າຍຕັ້ງຢູ່ແຂວງເຊສວນ ທາງພາກຕາເວັນຕົກສຽງໃຕ້ຂອງຈີນ, ໄດ້ຊື່ຍ້ອນຢູ່ຮ່ອມພູແຫ່ງນີ້ມີບ້ານເຜົ່າຕິເບດ 9 ບ້ານ. ເພງນີ້ມີເນື້ອຮ້ອງມ່ວນປານກາບກອນ ທຳນອງເພງກໍອ່ອນໂຍນອອນຊອນ ສັນລະເສີນຄວາມງາມຂອງບ້ານຈິວຈ້າຍແລະປາຖະໜາຢາກໄປເບິ່ງໄປຊົມ.
ທ້າວຢົງຈົ່ງເອີຈາເກີດໃນຄອບຄົວຊາວລ້ຽງສັດເຜົ່າຕິເບດຢູ່ແຂວງເຊສວນຂອງຈີນ, ມັກດົນຕີມາແຕ່ຍາມຍັງນ້ອຍ. ອາຍຸ 16 ປີ, ທ້າວຢົງຈົ່ງເອີຈາກໍຂຶ້ນຮ້ອງເພງເທິງເວທີເປັນເທື່ອທຳອິດ, ເວລານັ້ນລາວກໍມີຄວາມປາຖະໜາຢາກຮຽນສິລະປະແລ້ວ. ປີ 1994, ທ້າວຢົງຈົ່ງເອີຈາເປັນນັກຮ້ອງເອກໃນຄະນະສິລະປາກອນຊົນເຜົ່າຈິວຈ້າຍ, ພາຍລຸນມາ, ລາວໄດ້ໄປຮຽນບຳລຸງຢູ່ໂຮງຮຽນດົນຕີຕ່າງໆຄືວິທະຍາຄານດົນຕີເຊສວນເປັນຕົ້ນ, ແລ້ວໄດ້ໄປປັກກິ່ງຮຽນຄວາມຮູ້ແຕ່ງເພງນຳທ່ານວາງຟູ້ລິນ ນັກແຕ່ງເພງທີ່ມີຊື່ສຽງຂອງຈີນ. ທ້າວຢົງຈົ່ງເອີຈາເລີ່ມແຕ່ງເພງເມື່ອປີ 1991, ມາຮອດປັດຈຸບັນ ລາວໄດ້ແຕ່ງເພງຮ້ອຍກວ່າເພງແລ້ວ. ເພງທີ່ລາວແຕ່ງແລະຂັບຮ້ອງແມ່ນໄດ້ເອົາດົນຕີດັ້ງເດີມຂອງເຜົ່າຕິເບດເຊື່ອມໂຍງກັບດົນຕີສະໄໝ, ຈຶ່ງມີເອກະລັກພິເສດຂອງຕົນຢູ່ບົນເວທີເພງຈີນ.
1 2
|
