|
|
 |
| (GMT+08:00)
2005-03-14 22:13:33
|
 |
|
ນິຕິບັນຍັດທ້ອງຖິ່ນໄດ້ສະໜອງສິ່ງຄ້ຳປະກັນທາງກົດໝາຍໃຫ້ແກ່ການພັດທະນາເສດຖະກິດສັງຄົມແຫ່ງຕ່າງໆຂອງຈີນ(ສຽງ)
cri
Author: q
ແຂວງກຸ້ຍໂຈ່ວ ກໍແມ່ນຕັ້ງຢູ່ພາກຕາເວັນຕົກສຽງໃຕ້ຂອງຈີນ,ໃນປີ2002,ເມືອງກຸ້ຍຢາງ ເມືອງເອກແຂວງກຸ້ຍໂຈ່ວຖືກກຳນົດຈາກກົມໃຫຍ່ອະນຸລັກສິ່ງແວດລ້ອມແຫ່ງຊາດຈີນໃຫ້ເປັນຈຸດທົດລອງສ້າງຕົວເມືອງຊີວະພາບດ້ວຍເສດຖະກິດໝູນວຽນແຫ່ງທຳອິດຂອງຈີນ.ສະພາປະຊາຊົນເມືອງກຸ້ຍຢາງໄດ້ມອບໝາຍໃຫ້ສະຖາບັນຄົ້ນຄວ້າວິທະຍາສາດສິ່ງແວດລ້ອມຈີນ,ຮ່າງກົດຂໍ້ກຳນົດເມືອງກຸ້ຍຢາງ ສ້າງຕົວເມືອງຊີວະພາບດ້ວຍເສດຖະກິດໝູນວຽນ,ແລະໄດ້ດັດແກ້ຫຼາຍເທື່ອຕາມສະພາບຕົວຈິງຂອງເມືອງກຸ້ຍຢາງ.ກົດຂໍ້ກຳນົດດັ່ງກ່າວໄດ້ປະຕິບັດຢ່າງເປັນທາງການແຕ່ວັນທີ1ພະຈິກປີ2004ເປັນຕົ້ນມາ,ເຊິ່ງໄດ້ກາຍເປັນກົດບັນຍັດທ້ອງຖິ່ນກ່ຽວກັບເສດຖະກິດໝູນວຽນສະບັບທຳອິດຂອງຈີນ.ທ່ານຊຸນໂກສຽງ ຫົວໜ້າຄະນະກຳມະການການພັດທະນາແລະການປະຕິຮູບແຂວງກຸ້ຍໂຈ່ວກ່າວວ່າ:
"ເສດຖະກິດໝູນວຽນແມ່ນເສັ້ນທາງພັດທະນາແບບຍືນຍົງທີ່ສອດຄ່ອງກັບສະພາບຕົວຈິງທີ່ສຸດໃນປະຈຸບັນ.ເຖິງວ່າກົດບັນຍັດທ້ອງຖິ່ນກ່ຽວກັບເສດຖະກິດໝູນວຽນຂອງພວກເຮົາແມ່ນຄຸ້ມຄອງວຽກງານທ້ອງຖີ່ນກໍຕາມ,ແຕ່ມັນມີຄວາມໝາຍເປັນແວ່ນແຍງໃຫ້ແກ່ສະພາປະຊາຊົນແຫ່ງຊາດສ້າງກົດໝາຍລະດັບຊາດທີ່ກ່ຽວຂ້ອງ."
ແຕ່ປີ1998ມານີ້,ສະພາປະຊາຊົນແຂວງກຸ້ຍໂຈ່ວໄດ້ສ້າງແລະອະນຸມັດກົດບັນຍັດທ້ອງຖິ່ນແລະກົດຂໍ້ກຳນົດສະເພາະສຳລັບທ້ອງຖິ່ນລວມ98ສະບັບ,ກວມ43%ຂຶ້ນໄປຂອງຍອດຈຳນວນກົດບັນຍັດທ້ອງຖິ່ນແລະກົດຂໍ້ສະເພາະສຳລັບທ້ອງຖິ່ນທີ່ມີຜົນສັກສິດໃນປັດຈຸບັນ.ກົດຂໍ້ກຳນົດປ່າໄມ້,ກົດຂໍ້ກຳນົດຄຸ້ມຄອງທີ່ດິນ,ກົດຂໍ້ກຳນົດຄຸ້ມຄອງຊັບພະຍາກອນບໍ່ແຮ່ເປັນຕົ້ນທີ່ແຂວງກຸ້ຍໂຈ່ວວາງອອກໃນຫຼາຍປີມໍ່ໆມານີ້ໄດ້ຮັບປະສິດທິຜົນຢ່າງເດັ່ນຊັດ.ຕົວຢ່າງ,ຄືກົດຂໍ້ກຳນົດການສຶກສາກິ່ງແຂວງພາກຕາເວັນຕົກສຽງໃຕ້ແຂວງກຸ້ຍໂຈ່ວເຜົ່າປູອີເຜົ່າມົ້ງປົກຄອງຕົນເອງ,ໄດ້ຫຼຸດຜ່ອນການຈຳກັດອະຍຸເຂົ້າໂຮງຮຽນປະຖົມຂອງຊົນເຜົ່າສ່ວນໜ້ອຍຢູ່ເຂດພູດອຍຫ່າງໄກສອກຫຼີກ ເຖິງອາຍຸ9ປີ.ແລະໄດ້ຈັດເອົາເນື້ອໃນຕ່າງໆເຊັ່ນຈັດຫ້ອງຊົນເຜົ່າ,ຫ້ອງເດັກຍິງແລະການສຶກສາສອງພາສາເປັນຕົ້ນເຂົ້າໃນກົດຂໍ້ກຳນົດ.ເຮັດໃຫ້ອັດຕາເດັກນ້ອຍຊົນເຜົ່າສ່ວນໜ້ອຍເຂົ້າໂຮງຮຽນຂອງເຂດດັ່ງກ່າວໄດ້ຍົກສູງຂຶ້ນຮອດ96%.
ໃນກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນປີນີ້,ຜູ້ແທນສະພາປະຊາຊົນແຫ່ງຊາດຫຼາຍທ່ານກ່າວວ່າ,ຫວັງໃຫ້ ລັດແລະທ້ອງຖິ່ນຈົ່ງຮັບຟັງຄວາມເຫັນຂອງຜູ້ແທນສະພາປະຊາຊົນຢ່າງກວ້າງຂວາງກວ່າເກົ່າໃນການສ້າງກົດໝາຍໃນພາຍໜ້າ,ເຮັດໃຫ້ກົດໝາຍຍິ່ງສົມບູນກວ່າເກົ່າ.ໃນເວລາຕິດຕາກວດກາການປະຕິບັດກົດໝາຍ,ຄວນໃຫ້ຜູ້ແທນສະພາປະຊາຊົນເຂົ້າຮ່ວມການຕິດຕາກວດກາການປະຕິບັດກົດໝາຍຂອງແຫ່ງຕ່າງໆໃຫ້ຫຼາຍກວ່າເກົ່າ,ເຮັດໃຫ້ກົດໝາຍໄດ້ຮັບການໂຄສະນາແລະການປະຕິບັດໄດ້ດີກວ່າເກົ່າ.
1 2
|
|
|
