|
ທີ່ນີ້, ວິທະຍຸສາກົນແຫ່ງປະເທດຈີນ. ສະບາຍດີ, ທ່ານຜູ່ຟັງທີ່ເຄົາລົບ, ຂ້າພະເຈົ້າແມ່ນສົມບູນ, ໃນລາຍການນັດພົບໃນວັນອາທິດພາກນີ້, ທ່ານຈະໄດ້ຟັງເພງປະມວນໜຶ່ງທີ່ຂັບຮ້ອງໂດຍນາງເມີງເກີ ນັກຮ້ອງເພງໄວໜຸ່ມຂອງຈີນ.
ທ່ານຜູ່ຟັງທີ່ໂຄລົບ, ທີ່ທ່ານພວມຟັງຢູ່ນີ້ແມ່ນເພງ ອີຈົງສິງ ຄວາມຮັກແພງໃນສາຍຝົນ ເຊິ່ງຂັບຮ້ອງໂດຍນາງເມີງເກີ. ສຽງຂອງນາງເມີງເກີອ່ອນນວນ, ມີຈິດອາລົມລະອຽດ, ໄດ້ສະແດງອອກເຖິງຄວາມຮັກອັນລະມ່ອມລະໄມລະຫວ່າງຄູ່ຮັກ.ເນື້ອເພງມີຄວາມໝາຍວ່າ, " ຝົນຕົກຄ່ອຍໆ, ລົມພັດອ່ອນໆ, ອ້າຍກັ້ງຄັນຮົ່ມຂ້ອຍເມືອ, ຍ່າງຂ້າມຂົວຫີນ, ຍ່າງເຂົ້າທາງຮ່ອມ,ຝົນຮຳເສື້ອອ້າຍປຽກເຄິ່ງຄີງ. ໂອ, ຝົນເອີຍ, ເຈົ້າຈົ່ງຢ່າເອື້ອນເທື່ອ, ໃຫ້ຂ້ອຍຢູ່ໃນຄວາມໂອບອ້ອມຂອງຄວາມຮັກໃນສາຍຝົນ."
ປີ 1966 , ນາງເມີງເກີເກີດຢູ່ໃນຄອບຄົວວິສະວະກອນຢູ່ແຂວງຫູໜານ ພາກກາງຂອງຈີນ. ແມ່ຂອງນາງແມ່ນຜູ້ມັກດົນຕີ, ຍ້ອນໄດ້ຮັບຜົນສະທ້ອນຈາກແມ່, ນາງເມີງເກີຈິ່ງເລີ່ມຮຽນຮ້ອງເພງແຕ່ອາຍຸ 4 ປີ, ຮອດອາຍຸ 8 ປີກໍໄດ້ສະແດງ ເຖິງເວທີ, ອາຍຸ13 ປີກໍເສັງເຂົ້າຄະນະສິລະປາກອນເມືອງຊ່າງຊາ. ປີ 1984, ນາງເມີງເກີໄດ້ນຳເອົາຄວາມຝັນຂອງຕົນມາຮອດປັກກິ່ງ, ເພື່ອເລີ່ມຊອກຫາເສັ້ນທາງພັດທະນາສິລະປະໃໝ່. ໃນເວລານັ້ນ, ນາງເມີງເກີໄດ້ໄປຂໍຮຽນນຳຄູອາຈານຫຼາຍທ່ານ, ແລະມານະພະຍາຍາມທີ່ສຸດ, ແລ້ວໄດ້ເສັງເຂົ້າຮຽນຂະແໜງວິຊາຂັບຮ້ອງວິທະຍາຄານດົນຕີຈີນ. ຫຼັງຈາກຮຽນຈົບແລ້ວ, ນາງໄດ້ເຂົ້າເຮັດວຽກໃນຄະນະສິລະປາກອນກົມໃຫຍ່ການເມືອງກອງທັບປົດປ່ອຍປະຊາຊົນຈີນ, ແລ້ວກາຍເປັນນັກຮ້ອງຜູ້ໜຶ່ງຂອງກອງທະຫານ.
ການຂັບຮ້ອງເພງຂອງນາງເມີງເກີໄດ້ຮັກສາລັກສະນະທຳມະຊາດຂອງເພງພື້ນເມືອງ, ແລະໄດ້ໃຊ້ວິທີອອກສຽງຂອງນັກຮ້ອງຝ່າຍເອີລົບໃຫ້ພໍດ້ານພໍດີ, ຮຽນວິທີຂັບຮ້ອງຂອງງິ້ວແລະວິທີຂັບຮ້ອງແບບເພງຊົນຊາດ, ອັນໄດ້ຈໍ່ຕົວເປັນລັກສະນະພິເສດຂອງຕົນ. ຕໍ່ໄປ, ເຊີນຟັງເພງພື້ນເມືອງແຂວງຫູປາຍຂອງຈີນ ເພງເຮືອມັງກອນ ເຊິ່ງຂັບຮ້ອງໂດຍນາງເມີງເກີ. ເພງນີ້ວາດພາບນາງສາວຜູ້ໜຶ່ງຢາກຂ້າມຝັ່ງໄປຢາມພີ່ນ້ອງໃນຍາມປີໃໝ່, ອ້າຍພາຍເຮືອທີ່ໃຈດີກໍສົ່ງນາງຂ້າມຟາກໄປ.
ໃນຖານເປັນນັກຮ້ອງຂອງກອງທະຫານຜູ້ໜຶ່ງ, ນາງເມີງເກີໄດ້ໄປສະແດງໃຫ້ນັກລົບຟັງເລື້ອຍໆ. ສຽງເພງຂອງນາງດັງກ້ອງໄປທົ່ວປ້ອມຍາມປ້ອງກັນຊາຍແດນ ເທິງກ່ຳປັ່ນຕາມເກາະດອນກາງທະເລແລະລະຫວ່າງທ້ອງຟ້າສີຄາມແລະປອນເມກສີຂາວເລື້ອຍໆ. ຢູ່ໝູ່ເກາະໜານຊາ ພາກໃຕ້ຂອງຈີນ, ນາງເຄີຍຮ້ອງເພງໃຫ້ທະຫານຍາມຜູ້ດຽວທີ່ປ້ອງກັນຊາຍແດນນັ້ນຟັງ, ເລື່ອງນີ້ຈົນໄດ້ເລົ່າລືກັນໃນໝູ່ທະຫານ. ນ້ຳໃຈຂອງທະຫານປ້ອງກັນຊາຍແດນທີ່ສູ້ທຸກທົນຍາກແລະຍິນຍອມປະກອບສ່ວນນັ້ນກໍໄດ້ກະຕຸ້ນໃຈນາງເມີງເກີຈົນນັບເທື່ອບໍ່ໄດ້, ລະດົມໃຈໃຫ້ນາງເມີງເກີຮ້ອງເພງຊູ່ເພື່ອນຮ່ວມລົບທີ່ໜ້າຮັກເຫຼົ່ານີ້ຟັງຢ່າງບໍ່ເຫັນແກ່ຕົວ. ເມື່ອຫຼາຍປີກ່ອນ, ນາງເມີງເກີຍັງຫ້າງຫາເງິນທຶນເອົາເອງ, ອັດປະມວນເພງຈຳເພາະທີ່ໃຫ້ຊື່ວ່າ ຂໍມອບແດ່ເພື່ອນຮ່ວມລົບທີ່ຮັກແພງ, ແລ້ວແຈກໃຫ້ນັກລົບທັງຫຼາຍ. ນາງເມີງເກີເວົ້າວ່າ, ຄວາມປາຖະໜາແຮງກວ່າໝູ່ຂອງຕົນກໍແມ່ນຮ້ອງເພງມ່ວນໆຊູ່ນັກລົບຟັງ. ທ່ານຜູ້ຟັງທີ່ໂຄລົບ, ຕໍ່ໄປ, ເຊີນຟັງເພງທີ່ສັນລະເສີນທະຫານປ້ອງກັນຊາຍແດນຂອງຈີນ ປ່ຽນຈ່າງເຕີສຽນສຸ້ຍຊິ່ງອິ້ວຊຸນ ນ້ຳບໍ່ຊາຍແດນເສາະໃສບໍລິສຸດ ເຊິ່ງຂັບຮ້ອງໂດຍນາງເມີງເກີ:
ເນື້ອເພງຮ້ອງວ່າ, "ນ້ຳບໍ່ຊາຍແດນເສາະໃສບໍລິສຸດ, ສຽງເພງຊາຍແດນຟັງແລ້ວເຮັດໃຫ້ຮູ້ສຶກອົບອຸ່ນ, ນ້ຳບໍ່ເສາະໃສໄຫຼລິນຢູ່ບໍ່ຂາດ, ຮ້ອງເພງສັນລະເສີນຍາດພີ່ນ້ອງ, ຍາດພີ່ນ້ອງກໍຄືທະຫານປ້ອງກັນຊາຍແດນ, ທະຫານກັບປະຊາຊົນຮັກແພງກັນປານປາກັບນ້ຳ."
1 2
|
