|
ຈີນມີຄົນພິການ60ລ້ານຄົນ,ເຖິງວ່າກວມຍອດຈຳນວນປະຊາກອນ 1ຕື້300ລ້ານຄົນ ພຽງແຕ່4%ເທົ່ານັ້ນກໍຕາມ,ແຕ່ຄຸນນະພາບຊີວິດການເປັນຢູ່ຂອງພວກເຂົາເຈົ້າພັດແມ່ນຕົວເລກຄາດໝາຍສຳຄັນລາຍໜຶ່ງທີ່ສ່ອງແສງໃຫ້ເຫັນສະພາບການພັດທະນາສັງຄົມຂອງຈີນ.ລັດຖະບານຈີນໄດ້ເອົາໃຈໃສ່ນຳວຽກງານປົກປ້ອງສິດປະໂຫຍດຂອງຄົນພິການໂດຍຕະຫຼອດ.ໃນບົດລາຍງານວຽກງານລັດຖະບານສົກປີ2005,ທ່ານເວິນເຈຍປາວ ນາຍົກລັດຖະມົນຕີຈີນໄດ້ຊີ້ອອກວ່າ,ຕ້ອງເອົາໃຈໃສ່ແລະສະໜັບສະໜູນພາລະກິດຄົນພິການ.
ທ່ານນາງຈ່າງສຽວລິງ
ໃນງານກິລາໂອລິມປິກຄົນພິການອາແຕນປີ2004,ນັກກິລາຈີນໄດ້ຮັບຜົນງານດີຄືໄດ້ຫຼຽນຄຳຫຼາຍກວ່າໝູ່,ໄດ້ສະແດງໃຫ້ເຫັນກຳລັງແລະໂສມໜ້າຈິດໃຈຂອງຄົນພິການຈີນຕໍ່ຊາວໂລກ.ນາງຈ່າງສຽວລິງ ແມ່ນຜູ້ໄດ້ຫຼຽນຄຳຫຼຽນທີ100ຂອງຈີນໃນງານກິລາໂອລິມປິກຄົນພິການ.ຫວ່າງກ່ອນນີ້ບໍ່ດົນ,ນາງໄດ້ເຂົ້າຮ່ວມກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນຄັ້ງທີ3ສະໄໝທີ10ທີ່ຈັດຂຶ້ນຢູ່ປັກກິ່ງໃນນາມເປັນກຳມະການສະພາປຶກສາການເມືອງ.ນາງເປັນຄົນພິການທີ່ຂາເບື້ອງຂວາກຸດຈາກກົກຂາ,ນາງເອົາໃຈໃສ່ນຳພາລະກິດຄົນພິການເປັນພິເສດ,ຕັ້ງໜ້າຮຽກຮ້ອງໃຫ້ປົວແປງຊີວິດການເປັນຢູ່ຂອງຄົນພິການໃຫ້ດີຂຶ້ນ.ນາງເວົ້າວ່າ:
"ຍັດຕິທີ່ຂ້າພະເຈົ້າສະເໜີຕໍ່ກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນໃນທຸກປີທີ່ຜ່ານມາໄດ້ຮັບການຜັນຂະຫຍາຍໂດຍພື້ນຖານແລ້ວ,ໃນນັ້ນ,ສິ່ງທີ່ພົ້ນເດັ່ນກວ່າໝູ່ແມ່ນຂ້າພະເຈົ້າເຄີຍວາງຂໍ້ສະເໜີສະບັບໜຶ່ງກ່ຽວກັບການເບີກ0,8%ຂອງຫວຍສະຫວັດດີການທີ່ຈຳໜ່າຍໃນທົ່ວປະເທດນັ້ນໃຫ້ສະຫະພັນຄົນພິການເພື່ອໃຊ້ເຂົ້າໃນການສຶກສາອົບຮົມຝູງຊົນພິເສດ.ພາກສ່ວນທີ່ກ່ຽວຂ້ອງໄດ້ໃຫ້ຄວາມເອົາໃຈໃສ່ແລະຮັບເອົາຂໍ້ສະເໜີດັ່ງກ່າວ."
ເມື່ອປີ1990,ຈີນກໍໄດ້ສ້າງກົດໝາຍວ່າດ້ວຍການປົກປ້ອງຄົນພິການ.ກົດໝາຍສະບັບນີ້ໄດ້ເສີມຂະຫຍາຍບົດບາດສຳຄັນໃນດ້ານຕ່າງໆເຊັ່ນ,ປົກປ້ອງສິດປະໂຫຍດອັນຊອບກົດໝາຍຂອງຄົນພິການ,ຮັບປະກັນໃຫ້ຄົນພິການເຂົ້າຮ່ວມຊີວິດສັງຄົມ,ຊົມໃຊ້ໝາກຜົນດ້ານວັດຖຸແລະວັດທະນະທຳຂອງສັງຄົມຢ່າງສະເໝີພາບກັນແລະອື່ນໆ.ໃນຫຼາຍປີມໍ່ໆມານີ້,ພາລະກິດຄົນພິການຂອງຈີນໄດ້ພັດທະນາຢ່າງບໍ່ຢຸດຢັ້ງ,ໃນບັນດາຕົວເມືອງສຳຄັນທົ່ວປະເທດຈີນໄດ້ສ້າງສິ່ງກໍ່ສ້າງບໍ່ມີອຸປະສັກເຊັ່ນ,ທາງສຳລັບຄົນຕາບອດ,ທາງຄ້ອຍ,ທາງມ້າລາຍສຳລັບຄົນພິການເປັນຕົ້ນ.ໂທລະພາບບາງແຫ່ງໄດ້ຈັດລາຍການຂ່າວພາສາໃບ້,ບາງແຫ່ງຍັງໄດ້ຈັດການສຶກສາແລະການອົບຮົມທາງໄກທີ່ແນໃສ່ຄົນພິການ,ວິສາຫະກິດສະຫວັດດີການທີ່ຮັບເອົາຄົນພິການປະກອບອາຊີບໄດ້ຮັບການສະໜັບສະໜູນດ້ານນະໂຍບາຍຈາກລັດຖະບານແລະອື່ນໆ.ເວົ້າສຳລັບຄົນພິການແລ້ວ,ຖ້າຢາກປົວແປງສະພາບຢູ່ລອດໃຫ້ດີຂຶ້ນ,ບັນລຸຄຸນຄ່າແຫ່ງຊີວິດ,ບັນຫາອັນດັບໜຶ່ງກໍແມ່ນໄດ້ຮັບການສຶກສາ.ສະນັ້ນ, ເລີ່ມແຕ່ປີ1994ເປັນຕົ້ນມາ,ລັດຖະບານຈີນໄດ້ປະຕິບັດກົດຂໍ້ກຳນົດການສຶກສາຄົນພິການ,ເພື່ອປົກປ້ອງສິດໄດ້ຮັບການສຶກສາຂອງຄົນພິການ.
ທ່ານເຊ້ຍຢົງສຽງໃນໂຮງຮຽນຄົນຕາປອດຂອງເຂົາ
ທ່ານເຊ້ຍຢົງສຽງ ເປັນຄົນຕາບອດ,ປັດຈຸບັນ,ທ່ານດຳລົງຕຳແໜ່ງອະທິການບໍດີຂອງໂຮງຮຽນການສຶກສາພາສາອັງກິດຟີໂດຍທາງໄປສະນີທີ່ແນໃສ່ຄົນຕາບອດພຽງແຫ່ງດຽວຂອງຈີນ.ທ່ານເວົ້າວ່າ:"ທາງລັດສຸດທີ່ສະໜັບສະໜູນ ການສຶກສາຂອງຄົນຕາບອດ.ປັດຈຸບັນ,ຢູ່ມະສາວິທະຍາໄລສາງຊຸນ,ມະສາວິທະຍາໄລລຽນເຮີປັກກິ່ງ,ມະຫາວິທະຍາໄລຢາຈີນແລະປົວແບບຈີນນານກິ່ງເປັນຕົ້ນໄດ້ຈັດວິຊານວດສຳລັບຄົນຕາບອດ.ມະຫາວິທະຍາໄລສາງຊຸນໄດ້ຈັດວິຊາດົນຕີ,ມະຫາວິທະຍາໄລສ້າງຄູຊຽງໄຮ້ຍັງໄດ້ຈັດວິຊາພາສາອັງກິດ."
1 2
|
