ຄົນພິການຄັນຢາກຊົງຕົວຢູ່ໃນສັງຄົມ,ບັນຫາໂດຍກົງທີ່ຕ້ອງປະເຊີນນັ້ນກໍແມ່ນການປະກອບອາຊີບ.ກົດໝາຍປ້ອງກັນຄົນພິການຂອງຈີນໄດ້ກຳນົດໄວ້ວ່າ,ລັດປົກປ້ອງສິດອອກແຮງງານຂອງຄົນພິການ.ອົງການປົກຄອງປະຊາຊົນທຸກຂັ້ນຕ້ອງວາງແຜນເປັນເອກະພາບກັນກ່ຽວກັບການອອກແຮງງານປະກອບອາຊີບຂອງຄົນພິການ,ສ້າງເງື່ອນໄຂປະກອບອາຊີບໃຫ້ແກ່ຄົນພິການ.ໃນຫຼາຍປີມໍ່ໆມານີ້,ແຫ່ງຕ່າງໆຂອງຈີນໄດ້ຮັບປະສິດທິຜົນດີສົມຄວນໃນດ້ານຈັດວາງຄົນພິການປະກອບອາຊີບຕາມອັດຕາສ່ວນ.
ຕໍ່ເລື່ອງນີ້,ທ່ານນາງຈ່າງສຽວລິງ ຜູ້ໄດ້ຫຼຽນຄຳໃນງານກິລາໂອລິມປິກຄົນພິການທີ່ມາຈາກເຂດກວາງຊີຈີນໄດ້ສະເໜີສະພາບຂອງນະຄອນນານນິງເຂດກວາງຊີສູ່ຟັງ.ທ່ານນາງເວົ້າວ່າ:
"ຢູ່ນະຄອນນານນິ່ງ,ພວກເຮົາອະນຸຍາດໃຫ້ຄົນພິການທີ່ມີຄວາມສາມາດຂັບລົດນັ້ນເຮັດທຸລະກິດຂັບລົດ.ແຕ່ລະອາທິດ,ສະຫະພັນຄົນພິການໄດ້ຈັດຕັ້ງຜູ້ຂັບລົດທີ່ເປັນຄົນພິການຮ່ຳຮຽນກົດຈະລາຈອນ,ນະໂຍບາຍແລະເອກະສານດ້ານຈະລາຈອນ,ດຳເນີນການຝຶກອົບຮົມ.ຈັດວາງຄົນພິການເຮັດວຽກຕາມຄວາມສາມາດຂອງຕົນ,ຈັດວາງໃຫ້ພວກເຂົາເຈົ້າໄດ້ຮັບເງິນເດືອນຄືກັນກັບພາລະກອນ."
ການແກ້ໄຂບັນຫາປະກອບອາຊີບຂອງຄົນພິການແມ່ນກິດຈະການຢ່າງເປັນລະບົບ.ທ່ານນາງຈ່າງສຽວລິງເວົ້າວ່າ,ເພື່ອຍົກອັດຕາປະກອບອາຊີບຂອງຄົນພິການໃຫ້ສູງຂຶ້ນຢ່າງແທ້ຈິງ,ຕໍ່ໄປພາຍໜ້າ,ຕ້ອງທຳຄວາມພະຍາຍາມໃນດ້ານຍົກສູງຄວາມສາມາດເຕັກນິກອອກແຮງງານຂອງຄົນພິການ,ເປີດກວ້າງຂອບເຂດປະກອບອາຊີບຂອງຄົນພິການເປັນຕົ້ນ.
ຄົນພິການແຕ່ລະຄົນກໍມີຄວາມຈຳເປັນຕ້ອງສ້າງຕົນເອງໃຫ້ເຂັ້ມແຂງຂຶ້ນຢ່າງບໍ່ຢຸດຢັ້ງ,ຜ່ານຜ່າຄວາມຫຍຸ້ງຍາກ,ບັນລຸອຸດົມການຂອງຕົນ.ເມື່ອກ່າວເຖິງເລື່ອງນີ້,ທ່ານນາງຈ່າງຫາຍຕີ ຮອງປະທານສະຫະພັນຄົນພິການຈີນທີ່ເປັນອຳມະພາດໜັກເວົ້າວ່າ:
ທ່ານນາງຈ່າງຫາຍຕີ
"ບໍ່ມີຄວາມຫຍຸ້ງຍາກໃດທີ່ພວກເຮົາຜ່ານຜ່າບໍ່ໄດ້,ບາງທີຄວາມຫຍຸ້ງຍາກແມ່ນເລື່ອງຊົ່ວຄາວ,ແຕ່ພວກເຮົາຕ້ອງເຊື່ອໝັ້ນປະເທດຊາດພວກເຮົາ,ຕ້ອງເຊື່ອງໝັ້ນລັດຖະບານພວກເຮົາ, ຈະຜ່ານການທຳຄວາມພະຍາຍາມຮ່ວມ,ເຊິ່ງລວມທັງຮຽກຮ້ອງຢ່າງຕັ້ງໜ້າ,ສະພາບດຳລົງຊີວິດຂອງພວກເຮົາກໍຍ່ອມຈະໄດ້ຮັບການປົວແປງໃຫ້ດີຂຶ້ນ."
ວັນທີ10ມີນາ,ທ່ານນາງຈ່າງຫາຍຕີປະກອບຄຳຄິດຄຳເຫັນໃນກອງປະຊຸມສະ
ພາປຶກສາການເມືອງປະຊາຊົນແຫ່ງຊາດຈີນຄັ້ງທີ3ສະໄໝທີ10ທີ່ຈັດຂຶ້ນຢູ່ປັກກິ່ງ
ທ່ານນາງຈ່າງຫາຍຕີໄດ້ສຳເລັດການສຶກສາພື້ນຖານໂດຍຮຽນດ້ວຍຕົນເອງ,ເສັງໄດ້ປະລິນຍາໂທດ້ວຍມານະຈິດອັນເຂັ້ມແຂງ.ປັດຈຸບັນ,ທ່ານນາງດຳລົງຕຳແໜ່ງຮອງປະທານສະມາຄົມນັກປະພັນແຂວງຊານຕົ່ງຂອງຈີນ, ທ່ານນາງໄດ້ແຕ່ງແລະພິມຈຳໜ່າຍບົດປະພັນພິເສດເຫຼັ້ມໜຶ່ງຊູ່ປີ.ນາງເຫັນວ່າ,ຄົນພິການສາມາດດຳລົງຊີວິດຄືກັນກັບຄົນປົກກະຕິໂດຍຜ່ານຄວາມພະຍາຍາມຂອງຕົນ.
1 2
|
