|
ໃນໂອກາດທີ່ບຸນສົງການວຽນມາເທິງນີ້, ໃນຕອນຄ່ຳວັນທີ 12 ເມສາ, ສະຖານທູດລາວປະຈຳຈີນໄດ້ຈັດງານລ້ຽງຮັບຮອງ, ສະຫຼອງບຸນປີໃໝ່ລາວຕາມປະເພນີຂອງປະຊາຊົນລາວ.
ເຖິງວ່ານະຄອນປັກກິ່ງໃນເດືອນເມສາກໍມີແສງແດດເຮືອງຮຸ່ງ, ທັດສະນີຍະພາບລະດູບານໃໝ່ກໍສວຍງາມຫຼາຍກໍ່ຕາມ, ແຕ່ຈະເຮັດບຸນສົງການແບບຫົດນ້ຳໃສ່ກັນຄືຢູ່ລາວແທ້ບໍ່ໄດ້ເທື່ອ, ເພາະຍັງໜາວຢູ່. ແຕ່ວ່າ, ກໍ່ບໍ່ຂັດຂ້ອງພີ່ນ້ອງຊາວລາວຢູ່ປັກກິ່ງສະຫຼອງວັນບຸນສິລິມຸງຄົນຂອງຕົນດ້ວຍຄວາມມ່ວນຊື່ນ. ໃນຕອນຄ່ຳວັນທີ 12 ເມສາ, ສະຖານທູດລາວປະຈຳຈີນໄດ້ຈັດງານລ້ຽງຮັບຮອງອັນຄຶກຄື້ນ, ພະນັກງານສະຖານທູດພ້ອມກັບເພື່ອນຈີນໄດ້ພ້ອມກັນສະຫຼອງບຸນປະເພນີນີ້ດ້ວຍຄວາມມ່ວນຊື່ນ.
ທ່ານວິຈິດ ຊິນດາວົງ ເອກອັກຄະລັດຖະທູດລາວປະຈຳຈີນໄດ້ເປັນເຈົ້າພາບຈັດງານລ້ຽງຮັບຮອງຄັ້ງນີ້. ແຂກຈີນ 30 ກວ່າຄົນທີ່ມາຈາກຫົວໜ່ວຍຕ່າງໆ, ເຊັ່ນ, ທ່ານລີວຮົງຊາຍ ຮອງຫົວໜ້າຄະນະພົວພັນກັບຕ່າງປະເທດຂອງສູນກາງພັກກອມມູນິດຈີນແລະຜູ້ຮັບຜິດຊອບທີ່ກ່ຽວຂ້ອງຈາກກະຊວງາການຕ່າງປະເທດ ສະມາຄົມມິດຕະພາບກັບຕ່າງປະເທດຂອງປະຊາຊົນຈີນແລະກະຊວງສຶກສາທິການຈີນເປັນຕົ້ນໄດ້ເຂົ້າຮ່ວມງານລ້ຽງຮັບຮອງຕາມຄຳເຊີນ. ພະນັກງານພະແນກພາສາລາວຂອງວິທະຍຸພວກເຮົາກໍ່ໄດ້ຮັບເຊີນເຂົ້າຮ່ວມ.
ງານລ້ຽງຮັບຮອງໃນວັນທີ 12 ເມສາແມ່ນເລີ່ມຕົ້ນໃນພິທີສູ່ຂວັນ, ທີ່ພວມຟັງຢູ່ນີ້ແມ່ນພະນັກງານຢູ່ສະຖານທູດລາວປະຈຳຈີນແລະແຂກຈີນຜູ້ມີກຽດພວມກ່າວຄວາມອວຍພອນແກ່ກັນໃນເວລາການສູ່ຂວັນ.
ພາຍຫຼັງພິທີສູ່ຂວັນສິ້ນສຸງລົງແລ້ວ, ທ່ານວິຈິດ ຊີນດາວົງ ເອກອັກຄະລັດຖະທູດລາວປະຈຳຈີນໄດ້ຂຶ້ນກ່າວຄຳປາໄສທີ່ເຕັມໄປດ້ວຍຄວາມດູດດື່ມ. ທ່ານເວົ້າວ່າ, ເພື່ອປະຢັດເວລາ, ຂ້າພະເຈົ້າເວົ້າເປັນພາສາຈີນເລີຍໂລດ.
ໃນກ່າວຄຳປາໄສ, ທ່ານເອກອັກຄະລັດຖະທູດວິຈິດໄດ້ສະເໜີຜົນສຳເລັດຂອງລາວໃນພາລະກິດທຸກລາຍໃນປີທີ່ຜ່ານມາ.
ທ່ານເວົ້າວ່າ, "ປີນີ້, ພວກຂ້າພະເຈົ້າໄດ້ຕ້ອນຮັບປີໃໝ່ລາວໃນທ່າມກາງບັນຍາກາດສອງຢ່າງ, ໜຶ່ງແມ່ນທົ່ວພັກ ທົ່ວກອງທັບແລະປະຊາຊົນທົ່ວປະເທດລາວພວມຂ້ຽວເລັ່ງລັດເຮັດວຽກເພື່ອຕ້ອນຮັບວັນທີ່ມີຄວາມໝາຍສຳຄັນໃນປະຫວັດສາດ, ຄື, ວັນສ້າງຕັ້ງພັກປະຊາຊົນປະຕິວັດລາວຄົບຮອບ 50 ປີແລະວັນສະຖາປະນາສາທາລະນະລັດປະຊາທິປະໄຕປະຊາຊົນລາວຄົບຮອບ 30 ປີ, ພ້ອມກັນນັ້ນກໍ່ກຽມຕ້ອນຮັບກອງປະຊຸມໃຫຍ່ຂອງພັກພວກເຮົາຄັ້ງທີ 8 ທີ່ຈະຈັດຂຶ້ນໃນປີໜ້າ."
1 2
|
