|
ຈີນແມ່ນປະເທດໃຫຍ່ດ້ານກະສິກຳ,ປະຊາກອນສະກິກຳກວມຍອດຈຳນວນປະຊາກອນ70%.ເພື່ອແກ້ໄຂບັນຫາປົວພະຍາດຂອງຊາວນາ,ໃນສອງປີກ່ອນ,ຈີນເລີ່ມທົດລອງສ້າງລະບອບຮ່ວມມືປິ່ນປົວແບບໃໝ່ຢູ່ເຂດຊົນນະບົດສ່ວນໜຶ່ງ.ໃນລາຍການການປະຕິຮູບຂອງຈີນພາກນີ້,ພວກເຮົາຈະພາທ່ານໄປແຂວງຈິລິນ ທາງພາກຕາເວັນອອກສຽງເໜືອຂອງຈີນ,ໄປເບິ່ງສະພາບທົດລອງລະບອບດັ່ງກ່າວ.
ທ່ານອູຈຸນຈ່າງແມ່ນຊາວນາຂອງເມືອງກົ່ງຈູຫຼິ້ງແຂວງຈີລິນຂອງຈີນ,ຫວ່າງກ່ອນນີ້ບໍ່ດົນ,ໃນອຸບັດເຫດເທື່ອໜຶ່ງ,ກະດູກກ້ານຄໍບາດເຈັບໜັກຍ້ອນລົ້ມ.ນາງຊິວຢາເຈິ່ນ ເມຍ ຂອງເພິ່ນບອກນັກຂ່າວວ່າ,ໂຊກດີພວກເຂົາເຈົ້າໄດ້ເຂົ້າຮ່ວມລະບອບຮ່ວມມືປິ່ນປົວ,ຖ້າບໍ່ດັ່ງນັ້ນ,ຄ່າປິ່ນປົວຈຳນວນຫຼວງຫຼາຍຍ່ອມຈະພາໃຫ້ເສດຖະກິດໃນຄອບຄົວຕົກຢູ່ໃນສະພາບອັດຕະຄັດ.ນາງເວົ້າວ່າ:
"ຂ້ອຍຈົນບໍ່ນຶກບໍ່ຝັນວ່າ,ເມື່ອເຂົ້າຮ່ວມການຮ່ວມມືປິ່ນປົວແລ້ວ,ກໍໄດ້ຜົນປະໂຫຍດໄວປານນີ້.ໃນຫົວທີທີ່ເຂົ້າຮ່ວມການຮ່ວມມືປິ່ນປົວ,ພວກເຮົາມີແຕ່ພິຈາລະນາວ່າ,ຜູ້ອື່ນເຂົ້າຮ່ວມ,ພວກເຮົາກໍເຂົ້າຮ່ວມນຳ,ຄັນວ່າເຈັບໄຂ້ໄດ້ພະຍາດ,ໄປຫາໝໍກໍຈະໄດ້ຄ່າເກື້ອກູນຈຳນວນໜຶ່ງ.ພາຍລຸນມາ,ບໍ່ນຶກບໍ່ຝັນວ່າ,ຜົວລົ້ມຈົນບາດເຈັບໜັກປານນີ້,ມູນນິທິຮ່ວມມືປິ່ນປົວໄດ້ເບີກຄ່າເກື້ອກູນ3000ກວ່າຢວນໃຫ້ພວກເຮົາ.ຖ້າບໍ່ດັ່ງນັ້ນ,ພວກເຮົາຈະຈຳເປັນຕ້ອງຕິດໜີ້,ອາດຈະຮອດປັດຈຸບັນກໍຍັງບໍ່ທັນໃຊ້ແທນໝົດເທື່ອ."
ຢູ່ແຂວງຈີລິນໃນຊູ່ມື້ນີ້,ຊາວນາທີ່ໄດ້ຜົນປະໂຫຍດຈາກການເຂົ້າຮ່ວມລະບອບຮ່ວມມືປິ່ນປົວແບບໃໝ່ຄືກັນກັບທ່ານອູຈຸນຈ່າງນັ້ນນັບມື້ນັບຫຼາຍຂຶ້ນ.ວິທີເຮັດລະອຽດຂອງລະບອບດັ່ງກ່າວມີດັ່ງນີ້: ຊາວນາແຕ່ລະຄົນທີ່ສະໝັກເຂົ້າຮ່ວມລະບອບນີ້ເສຍເງິນ10ຢວນຕໍ່ປີ,ພ້ອມກັນນັ້ນ, ອົງການປົກຄອງໃຫ້ຄ່າເກື້ອກູນ20ຢວນໃຫ້ແຕ່ລະຄົນ,ເງິນຈຳນວນນີ້ຈັດເປັນກອງທຶນຮ່ວມມືປິ່ນປົວ,ຝາກໄວ້ໃນບັນຊີເງິນຝາກຈຳເພາະໃນທະນາຄານທ້ອງຖິ່ນ.ຖ້າວ່າຊາວນາທີ່ເຂົ້າຮ່ວມການຮ່ວມມືປິ່ນປົວເຈັບເປັນແລ້ວສາມາດໄປປິ່ນປົວຢູ່ອົງການປິ່ນປົວຕາມກຳນົດໃນທ້ອງຖິ່ນ,ແລ້ວອີງຕາມບັດຮ່ວມມືປິ່ນປົວເອົາຄືນຄ່າປິ່ນປົວສ່ວນໜຶ່ງຕາມອັດຕາສ່ວນໂດຍກົງ.
ເພື່ອເຮັດໃຫ້ຊາວນາໄດ້ຮັບການບໍລິການຄຸນນະພາບດີ,ເຂດທົດລອງລະບອບຮ່ວມມືປິ່ນປົວແບບໃໝ່ຂອງຈີນໄດ້ເລືອກເອົາໂຮງໝໍຈຸດກຳນົດຢ່າງເຄັ່ງຄັດທີ່ສຸດ.ທ່ານລີສ້ຽວຊຸນ ຫົວໜ້າພະແນກສາທາລະນະສຸກເມືອງກົ່ງຈູຫຼິ້ງສະເໜີໃຫ້ຮູ້ວ່າ:
"ພະແນກສາທາລະນະສຸກເມືອງເຮົາໄດ້ເລືອກເອົາຫົວໜ່ວຍປິ່ນປົວຂັ້ນເມືອງ8ແຫ່ງທີ່ມີເງື່ອນໄຂພື້ນຖານດີແລະລະດັບເຕັກນິກສູງແລະໂຮງໝໍຂັ້ນຕາແສງ22ແຫ່ງເປັນອົງການກຳນົດແຫ່ງການຮ່ວມມືປິ່ນປົວແບບໃໝ່ໃນຊົນນະບົດ.ຮຽກຮ້ອງໃຫ້ໂຮງໝໍຂັ້ນຕາແສງຕັ້ງບ່ອນປິ່ນປົວຢູ່ບ້ານຫ່າງໄກສອກຫຼີກ,ຍຶດໝັ້ນລົງໄປບໍລິການຊາວນາຢູ່ບ່ອນປິ່ນປົວອາທິດລະສອງເທື່ອ."
ນັກຂ່າວໄດ້ຊາບວ່າ,ເພື່ອຮັບປະກັນໃຫ້ກອງທຶນຮ່ວມມືປິ່ນປົວໃຊ້ເຂົ້າໃນການປິ່ນປົວຊາວນາຢ່າງແທ້ຈິງ,ເມືອງກົ່ງຈູຫຼິ້ງຍັງໄດ້ຕັ້ງຄະນະກຳມະການຕິດຕາມຄຸ້ມຄອງທີ່ປະກອບດ້ວຍຜູ້ຮັບຜິດຊອບທີ່ກ່ຽວຂ້ອງຂອງພາກສ່ວນກວດກາວິໄນ,ພາກສ່ວນຕິດຕາມກວດກາ,ພາກສ່ວນການເງິນເປັນຕົ້ນ,ເພື່ອດຳເນີນການຕິດຕາມກວດກາຕໍ່ສະພາບນຳໃຊ້ກອງທຶນເປັນປະຈຳ.ນອກນີ້,ເພື່ອເພີ່ມຄວາມໂປ່ງໃສໃນການໃຊ້ເງິນ.ເມືອງດັ່ງກ່າວຍັງໄດ້ຈັດປ້າຍປະກາດຢູ່ອົງການປິ່ນປົວທີ່ກຳນົດໄວ້.ແຈ້ງສະພາບການໃຊ້ແທນຄືນຄ່າປິ່ນປົວແລະສະພາບນຳໃຊ້ກອງທຶນໃຫ້ມວນຊົນຊາບຢ່າງທັນການ.ປັດຈຸບັນ,ຊາວນາເມືອງກົ່ງຈູຫຼິ້ງມີ80%ໄດ້ເຂົ້າຮ່ວມລະບອບຮ່ວມມືປິ່ນປົວ.
1 2
|
