|
ນະຄອນທຽນສິນແມ່ນເມືອງທ່າຢູ່ພາກຕາເວັນອອກຈີນ,ຕັ້ງແຕ່ສະໄໝບູຮານ,ນະຄອນທຽນສິນກໍແມ່ນທ່າກ່ຳປັ່ນການຄ້າກັບຕ່າງປະເທດທີ່ສຳຄັນກວ່າໝູ່ແຫ່ງໜຶ່ງຂອງຈີນ.ໃນຊູ່ມື້ນີ້,ຄຽງຄູ່ກັບທຽນສິນ ໄຂປະຕູສູ່ພາຍນອກຫຼາຍກວ່າເກົ່າ,ຊາວຕ່າງປະເທດທີ່ຮ່ຳ ຮຽນແລະເຮັດວຽກຢູ່ທຽນສິນນັບມື້ນັບຫຼາຍຂຶ້ນ.
ທ່ານກາເມລອນພ້ອມດ້ວຍນາງແຊລີ ພັນລະຍາຂອງທ່ານ ແມ່ນຊາວການາດາ,ສອງປີກ່ອນ,ພວກເຂົາເຈົ້າໄດ້ມາທຽນສິນເປັນຄູສອນພາສາອັງກິດຂອງໂຮງຮຽນມັດທະຍົມປິ່ນຫາຍ.ກ່ອນຈະມາທຽນສິນ,ພວກເຂົາເຈົ້າຍັງເປັນຫ່ວງວ່າຈະບໍ່ລື້ງກັບວຽກງານແລະຊີວິດການເປັນຢູ່ຢູ່ແຫ່ງນີ້.ທ່ານກາເມລອນບອກນັກຂ່າວວ່າ,ເມື່ອມາຮອດທຽນສິນແລ້ວຈິ່ງພົບເຫັນວ່າ,ສະພາບແວດລ້ອມເຮັດວຽກແລະເງື່ອນໄຂຊີວິດການເປັນຢູ່ຢູ່ທຽນສິນໄດ້ກາຍຄວາມຄາດຄິດຂອງພວກເຂົາເຈົ້າ.ຢູ່ແຫ່ງນີ້ມີຮ້ານຊຸບເປີມາເກັດ,ມີຮ້ານອາຫານ,ບາເຫຼົ້າຈຳນວນຫຼວງຫຼາຍພ້ອມດ້ວຍໂຮງໝໍ,ໂຮງຮຽນອັນດັບໜຶ່ງ,ທັງໝົດເຫຼົ່ານີ້ໄດ້ເຮັດໃຫ້ພວກເຂົາເຈົ້າຮູ້ສຶກວ່າທຽນສິນແມ່ນຄ້າຍຄືກັນກັບອົດຕາວາ ບ້ານເກີດຂອງພວກເຂົາເຈົ້າ.ທ່ານເວົ້າວ່າ:
"ເລື່ອງທີ່ເຮັດໃຫ້ຂ້າພະເຈົ້າຕື້ນຕັນໃຈນັ້ນແມ່ນຕອນເຊົ້າມື້ທຳອິດທີ່ພວກເຮົາຫາກໍ່ມາຮອດທຽນສິນ,ພວກເຮົາໄປທ່ຽວຫຼິ້ນຢູ່ສວນສາທາລະນະໃຫຍ່ແຫ່ງໜຶ່ງ,ຢູ່ສວນນັ້ນມີຕົ້ນໄມ້ແລະຕົ້ນຫຍ້າຢ່າງຫຼວງຫຼາຍ,ຄົນທັງຫຼາຍພວມຫັດກາຍບໍລິຫານຢູ່ ຫັ້ນ,ຈັ່ງແມ່ນຮູ້ສຶກດີຫຼາຍ."
ຊີວິດການເປັນຢູ່ຢູ່ທຽນສິນຂອງທ່ານກາເມລອນແລະນາງແຊລີແມ່ນມ່ວນຊື່ນຫຼາຍ.ໃນເວລາຫວ່າງວຽກ,ພວກເຂົາເຈົ້າລາງເທື່ອໄປເລາະຫຼິ້ນຢູ່ຕາມທາງນ້ອຍຫວ່າງຕົ້ນໄມ້,ລາງເທື່ອໄປຫັດກາຍຢູ່ຫ້ອງຫັດກາຍບໍລິຫານ.ລາງເທື່ອໄປດື່ມກາເຟຢູ່ຮ້ານກາເຟຊິງປາເກີ.ສ່ວນເລື່ອງທີ່ພວກເຂົາເຈົ້າມັກທີ່ສຸດຍັງແມ່ນໄປຮ້ານອາຫານຊີມອາຫານແຊບຂອງທຽນສິນ.
ຢູ່ເຮືອນ,ທ່ານກາເມລອນຍັງມັກພ້ອມກັນກັບເມຍຫຼິ້ນເຄື່ອງດົນຕີຕ່າງໆເຊັ່ນກີຕາ,ປີ່,ແຄນຝະຣັ່ງເປັນຕົ້ນ.ຄອບຄົວຂອງພວກເຂົາເຈົ້າເວລາໃດກໍເຕັມໄປດ້ວຍຄວາມມ່ວນຊື່ນອົບອຸ່ນ.
ນະຄອນທຽນສິນທີ່ມີສະເໜພິເສດຍັງໄດ້ດູດດຶງເອົາທ່ານມາຍໂຄເຈເລເດນທີ່ມາຈາກອາເມລິກາ.ທ່ານເຈເລເດນປີນີ້ອາຍຸ50ປີ,ທ່ານມັກສະສົມສະແຕມຂອງບັນດາປະເທດໃນໂລກແລະມີການຄົ້ນຄວ້າໃນດ້ານນີ້.10ກວ່າປີກ່ອນ,ຢູ່ຮາວາຍ ທ່ານໄດ້ຮູ້ຈັກກັບນາງສູຈົ່ງອີ ສາວຈີນຜູ້ສວຍງາມທີ່ພວມ ຮຽນຢູ່ຫັ້ນ.ເມື່ອທ່ານຮູ້ວ່ານາງສູຈົ່ງອີມາຈາກທຽນສິນ,ທ່ານຮູ້ສຶກດີໃຈທີ່ສຸດ,ເພາະວ່າທ່ານຮູ້ວ່າທຽນສິນແມ່ນແຫຼ່ງກຳເນີດໄປສະນີຂອງຈີນ.
ທ່ານເຈເລເດນໄດ້ແຕ່ງງານກັບນາງສູຈົ່ງອີ.ປີ1991,ທ່ານພ້ອມກັບເມຍມາຮອດຈີນ,ແລ້ວຕັ້ງຖິ່ນຖານຢູ່ຈີນ.ໃນຫຼາຍປີມານີ້,ທ່ານເຈເລເດນໄດ້ເກັບເອົາເຄື່ອງໄປສະນີນັບເປັນໝື່ນເຄື່ອງທີ່ມີສ່ວນກ່ຽວຂ້ອງກັບທຽນສິນ.ທ່ານເວົ້າວ່າ:
"ປະຫວັດຂອງໄປສະນີໄດ້ບັນທຶກເລື່ອງຕ່າງໆໃນຊີວິດການເປັນຢູ່ຂອງຄົນ,ຜ່ານຈາກການຄົ້ນຄວ້າປະຫວັດໄປສະນີຂອງທຽນສິນ,ຂ້າພະເຈົ້າໄດ້ຊອກຮູ້ຫຼາຍເລື່ອງກ່ຽວກັບທຽນສິນ.ຂ້າພະເຈົ້າພະຍາຍາມ,ຄົ້ນຄວ້າເລື່ອງກ່ຽວກັບທຽນສິນໃຫ້ຫຼາຍ.ເມື່ອຂ້າພະເຈົ້າຊອກຮູ້ຂໍ້ມູນຂ່າວສານຍິ່ງຫຼາຍ, ກໍຍິ່ງຮູ້ສຶກວ່າທຽນສິນມີຖານະອັນສຳຄັນທີ່ສຸດໃນປະຫວັດສາດແລະການໄປມາຫາສູ່ກັນກັບຕ່າງປະເທດຂອງຈີນ."
1 2
|
