|
ປັດຈຸບັນ,ຈີນມີໂຮງຮຽນຊັ້ນສູງເກືອບ2ພັນຫຼັງ,ມີນັກສຶກສາລື່ນກາຍ13ລ້ານຄົນ.ເພື່ອເຮັດໃຫ້ພວກນັກສຶກສາໃນຂະນະທີ່ໄດ້ຮັບຄວາມຮູ້,ດ້ານຕ່າງໆເຊັ່ນຮ່າງກາຍແລະຈິດໃຈເປັນຕົ້ນກໍໄດ້ມີການພັດທະນາຢ່າງປອດໄສ.ຫວ່າງກ່ອນນີ້ບໍ່ດົນ,ກະຊວງສຶກສາທິການຈີນໄດ້ປະກາດຂໍ້ກຳນົດກ່ຽວກັບການຄຸ້ມຄອງນັກສຶກສາໂຮງຮຽນຊັ້ນສູງສາມັນສະບັບໃໝ່,ແລະຈະເລີ່ມປະຕິບັດແຕ່ມື້ໄຂສົກຮຽນໃໝ່ຄືວັນທີ1ກັນຍາປີນີ້ເປັນຕົ້ນໄປ.
ໃນ10ກວ່າປີມານີ້,ເສດຖະກິດແລະສັງຄົມຈີນໄດ້ມີການພັດທະນາຢ່າງໄວວາ,ໂສມໜ້າຂອງສັງຄົມໄດ້ເກີດມີການປ່ຽນແປງຢ່າງໃຫຍ່ຫຼວງ,ທັງໝົດເຫຼົ່ານີ້ລ້ວນແຕ່ໄດ້ເກີດມີຜົນສະທ້ອນອັນເລິກເຊິ່ງຕໍ່ທັດສະນະຄະຕິແລະລະບອບຂອງການສຶກສາຊັ້ນສູງ.ໃນຂະນະດຽວກັນນັ້ນ,ຍ້ອນວ່ານັກສຶກສາຍຸກປັດຈຸບັນຂອງຈີນສ່ວນຫຼາຍແມ່ນເກີດຂຶ້ນພາຍຫຼັງລັດຖະບານຈີນໄດ້ປະຕິບັດນະໂຍບາຍການປະຕິຮູບແລະໄຂປະຕູສູ່ພາຍນອກ,ເມື່ອທຽບກັບນັກສຶກສາໃນເມື່ອກ່ອນ,ທັດສະນະຄະຕິຂອງພວກເຂົາເຈົ້າຍິ່ງປົດປ່ອຍແລະຍິ່ງເປັນແບບສາກົນກວ່າເກົ່າ.ສ່ວນຂໍ້ກຳນົດກ່ຽວກັບການຄຸ້ມຄອງນັກສຶກສາໂຮງຮຽນຊັ້ນສູງສາມັນທີ່ຈີນປະຕິບັດໃນປັດຈຸບັນແມ່ນໄດ້ວາງອອກເມື່ອ15ປີກ່ອນ,ເນື້ອໃນຫຼາຍຢ່າງບໍ່ເໝາະກັບຍຸກສະໄໝປັດຈຸບັນແລ້ວ.ກໍແມ່ນຢູ່ໃຕ້ເບື້ອງຫຼັງນີ້,ຈີນໄດ້ປະກາດຂໍ້ກຳນົດກ່ຽວກັບການຄຸ້ມຄອງນັກສຶກສາໂຮງຮຽນຊັ້ນສູງສາມັນສະບັບໃໝ່.
ເມື່ອທຽບກັບຂໍ້ກຳນົດທີ່ກ່ຽວຂ້ອງທີ່ຍັງຄົງປະຕິບັດໃນປັດຈຸບັນ,ຂໍ້ກຳນົດສະບັບໃໝ່ໄດ້ແນໃສ່ຈຸດພິເສດຂອງນັກສຶກສາຍຸກປັດຈຸບັນ,ທຳການປັບປຸງຂ້ອນຂ້າງຫຼາຍ,ໂດຍສະເພາະແມ່ນການກຳນົດດ້ານປົກປ້ອງສິດແລະຜົນປະໂຫຍດຂອງນັກສຶກສາແມ່ນປະຈັກຕາຄົນເປັນພິເສດ.ທ່ານນາງລິນຮຸ້ຍຊິງ ຫົວໜ້າພະແນກນັກສຶກສາກະຊວງສຶກສາທິການຈີນສະເໜີໃຫ້ຮູ້ວ່າ:
"ຂໍ້ກຳນົດສະບັບໃໝ່ໄດ້ກຳນົດມາດຖານລົງໂທດນັກສຶກສາທີ່ລະເມີດວິໄນຢ່າງແຈ່ມແຈ້ງກວ່າເກົ່າ.ລະບຽບການລົງໂທດນັກສຶກສາທີ່ລະເມີດວິໄນກໍເປັນແບບສະບັບກວ່າເກົ່າ,ພ້ອມກັນນັ້ນ,ຂໍ້ກຳນົດສະບັບໃໝ່ຍັງໄດ້ເພີ່ມມາດຕາຕ່າງໆເຊັ່ນນັກສຶກສາມີສິດອະທິບາຍ,ສິດແກ້ຕົວແລະສິດຍື່ນອຸທອນຕໍ່ການລົງໂທດ.ຂໍ້ກຳນົດເຫຼົ່ານີ້ມີຄວາມໝາຍສຳຄັນຕໍ່ການປົກປ້ອງສິດແລະຜົນປະໂຫຍດທີ່ຊອບກົດໝາຍຂອງນັກສຶກສາ."
ທ່ານນາງລິນຮຸ້ຍຊິງເວົ້າວ່າ,ໃນເມື່ອກ່ອນ,ໃນເວລາບັນດາໂຮງຮຽນຊັ້ນສູງລົງໂທດນັກສຶກສາທີ່ລະເມີດວິໄນ,ໄດ້ໃຊ້ລະບຽບການແລະມາດຖານທີ່ບໍ່ເປັນເອກກະສັນກັນປານໃດ.ແລະນັກສຶກສາກໍບໍ່ມີສິດແກ້ຕົວຕໍ່ການຕັດສິນລົງໂທດ,ເຮັດແນວນີ້ໄດ້ພາໃຫ້ໂຮງຮຽນບາງແຫ່ງມີທ່າທີທີ່ເຮັດຕາມໃຈໃນລະດັບໃດໜຶ່ງໃນເວລາລົງໂທດນັກສຶກສາທີ່ລະເມີດວິໄນ,ແລ້ວກໍທຳລາຍສິດແລະຜົນປະໂຫຍດຂອງນັກສຶກສາ.ຂໍ້ກຳນົດກ່ຽວກັບການຄຸ້ມຄອງນັກສຶກສາໂຮງຮຽນຊັ້ນສູງສາມັນສະບັບໃໝ່ໄດ້ທຳການດັດແກ້ຕໍ່ເລື່ອງດັ່ງກ່າວ,ຄື,ກຳນົດວ່າ,ກ່ອນຕັດສິນລົງໂທດນັກສຶກສາ,ທາງໂຮງຮຽນຄວນຮັບຟັງການອະທິບາຍແລະແກ້ຕົວຂອງນັກສຶກສາແລະຜູ້ວ່າການແທນຂອງເຂົາ,ໃນເວລາລົງໂທດນັກສຶກສາ,ທາງໂຮງຮຽນຕ້ອງປະຕິບັດຕາມລະບຽບການຢ່າງຖືກຕ້ອງ,ມີຫຼັກຖານພຽງພໍແລະລົງໂທດຢ່າງເໝາະສົມ.ມີແຕ່ກອງປະຊຸມອະທິການບໍດີເທົ່ານັ້ນຈິ່ງມີສິດທຳການຕັດສິນລົງໂທດໄລ່ນັກສຶກສາຜູ້ໃດຜູ້ໜຶ່ງອອກຈາກໂຮງຮຽນ,ໂຮງຮຽນຕ້ອງສ້າງຕັ້ງຄະນະກຳມະການຊຳລະການຍື່ນອຸທອນຂອງນັກສຶກສາ,ຮັບຊຳລະການຍື່ນອຸທອນຂອງນັກສຶກສາກ່ຽວກັບການລົງໂທດການກະທຳທີ່ລະເມີດຂໍ້ກຳນົດແລະລະບຽບວິໄນ,ແລະອື່ນໆ.ຂໍ້ກຳນົດເຫຼົ່ານີ້ໄດ້ຈຳກັດສິດລົງໂທດຂອງໂຮງຮຽນຢູ່ໃນຂອບເຂດອັນແນ່ນອນ.
ທ່ານລີປິນ ນັກສຶກສາປະລິນຍາໂທຂອງມະຫາວິທະຍາໄລການເມືອງແລະກົດໝາຍຈີນ ຊົມເຊີຍຫຼາຍຕໍ່ຂໍ້ມາດຕາດັ່ງກ່າວໃນຂໍ້ກຳນົດສະບັບໃໝ່.ທ່ານຄິດວ່າຂໍ້ກຳນົດໃໝ່ໄດ້ສະແດງໃຫ້ເຫັນຈິດໃຈທີ່ຖືຄົນເປັນກົກ.ທ່ານເວົ້າວ່າ:
"ເວົ້າສຳລັບນັກສຶກສາແລ້ວ,ການລົງໂທດເທື່ອໜຶ່ງອາດຈະກະທົບກະເທືອນເຖິງຊີວິດພາຍໜ້າຂອງເຂົາ.ສະນັ້ນ,ການກຳນົດວ່ານັກສຶກສາມີສິດອະທິບາຍ,ສິດແກ້ຕົວແລະສິດຍື່ນອຸທອນ,ຂ້າພະເຈົ້າແມ່ນເຫັນດີເຫັນພ້ອມທີ່ສຸດ.ເພາະວ່າ,ຂ້າພະເຈົ້າເຫັນວ່າບາງເລື່ອງທີ່ໂຮງຮຽນເຮັດນັ້ນບໍ່ອາດຈະຖືກຕ້ອງໝົດ,ລາງເທື່ອກໍມີຄວາມຜິດພາດຍ້ອນມູນເຫດພາວະວິໄສແລະອັດຕະວິໄສ.ສະນັ້ນ,ຂ້າພະເຈົ້າເຫັນວ່າການມອບສິດເຫຼົ່ານີ້ໃຫ້ນັກສຶກສາແມ່ນຈຳເປັນທີ່ສຸດ."
1 2
|
