|
ຢູ່ເຂດຊິນຈ່ຽງເຜົ່າເວີຍອູເອີປົກຄອງຕົນເອງ ທາງພາກຕາເວັນຕົກຂອງຈີນ,ມີແຫ່ງໜຶ່ງຊື່ວ່າ"ຕາປານເສິງ" ມັນເຄີຍເປັນຕາແສງນ້ອຍທີ່ມີຊື່ສຽງບົນເສັ້ນທາງຜ້າໄໝສະໄໝບູຮານ.ເມື່ອ60ກວ່າປີກ່ອນ,ກໍແມ່ນຍ້ອນເພງທີ່ຊື່ວ່າ"ຕາປານເສິງເຕີກູ່ໜຽງ"ແປວ່າ"ນາງສາວຕາປານເສິງ" ເຮັດໃຫ້ແຫ່ງນີ້ຂຶ້ນຊື່ລືນາມໄປທົ່ວປະເທດຈີນ.ຄົນທັງຫຼາຍຈຶ່ງຮູ້ວ່າ,ຕາປານເສິງແມ່ນບ່ອນທີ່ມີສາວງາມ ຫຼາຍ.ໃນຊູ່ມື້ນີ້,ທ່ານເອີບູນການ ຊາວນາທີ່ດຳລົງຊີວິດຢູ່ແຫ່ງນີ້ກໍໄດ້ສຳເລັດຜົນຍ້ອນ"ນາງສາວຕາປານເສິງ"ເຊັ່ນດຽວກັນ.ສະນັ້ນ,ທ່ານເອີບູນການກັບ"ນາງສາວຕາປານເສິງ"ມີການພົວພັນຫຍັງແດ່?
ຕາປານເສິງເປັນເມືອງນ້ອຍແຫ່ງໜຶ່ງ,ຫ່າງຈາກ ເມືອງເອກອູລູມູສີປະມານ40ກິໂລແມັດ.ຢູ່ຖະໜົນຕົ້ນຕໍມີຮ້ານຂາຍໝາກຖົ່ວໃຫຍ່ຈຳເພາະຮ້ານໜຶ່ງ ຊື່ວ່າ"ນາງສາວຕາປານເສິງ".ທ່ານເອີບູນການ ເຈົ້າຂອງຮ້ານພວມຮ້ອງຈ່າວຂາຍຢ່າງອົບອຸ່ນ,ຮ້ານນີ້ຂາຍໝາກຖົ່ວໃຫຍ່ທຸກຊະນິດເຊັ່ນໝາກຖົ່ວໃຫຍ່ຂົ້ວ, ໝາກຖົ່ວໃຫຍ່ຈືນ,ໝາກຖົ່ວໃຫຍ່ຕົ້ມເຄັມເປັນຕົ້ນ,ເຊິ່ງມີເຖິງ10ກວ່າຊະນິດ.ຍ້ອນໄດ້ຂາຍໝາກຖົ່ວໃຫຍ່ຍີ່ຫໍ້"ນາງສາວຕາປານເສິງ",ໃນຮ້ານນີ້ໄດ້ປ່ອຍເພັງພາສາເຜົ່າເວີຍອູເອີ "ນາງສາວຕາປານເສິງ"ທີ່ມີຈັງຫວະມ່ວນຊື່ນເບົາໃຈ,ລູກຄ້າທັງຫຼາຍເລີຍເລືອກຊື້ໝາກຖົ່ວໃຫຍ່ໃນທ່າມກາງສຽງເພງ.
ໝາກຖົ່ວໃຫຍ່ແມ່ນຜະລິດຕະພັນພິເສດຂອງເມືອງຕາປານເສິງ.ຍ້ອນມີເງື່ອນໄຂທຳມະຊາດເປັນພິເສດ,ໝາກຖົ່ວໃຫຍ່ຂອງເມືອງຕາປານເສິງເມັດໃຫຍ່, ລົດແຊບ,ແລະມີຄຸນນະພາບດີທີ່ສຸດ.ຈີນມີຄຳສຸພາສິດທີ່ວ່າ:"ຢູ່ໃກ້ນ້ຳກິນປາ,ຢູ່ໃກ້ພູກິນໝາກ"ໝົດຄອບຄົວຂອງທ່ານເອີບູນການທີ່ດຳລົງຊີວິດຢູ່ຕາປານເສິງ,ທຸກເຊັ່ນຄົນລ້ວນແຕ່ທຳມາຫາກິນໂດຍອາໄສການປູກແລະຂາຍໝາກຖົ່ວໃຫຍ່.ໃນຄວາມຊົ່ງຈຳຂອງທ່ານເອີບູນການ,ຍາມຍັງນ້ອຍ,ທ່ານກໍໄດ້ພ້ອມກັນກັບແມ່ຂົ້ວແລະຂາຍໝາກຖົ່ວໃຫຍ່ຢູ່ຕາມແຄມຖະໜົນ.ເມື່ອໃຫຍ່ຂຶ້ນມາແລ້ວ,ທ່ານຍັງຄົງນອນເດິກລຸກເຊົ້າ,ຂາຍໝາກຖົ່ວໃຫຍ່ຢູ່ຕາມແຄມຖະໜົນ.
ໃນຫຼາຍປີມໍ່ໆນີ້,ອົງການປົກຄອງທ້ອງຖິ່ນໄດ້ລົງທຶນສ້າງຕະຫຼາດໂດຍຈຳເພາະ,ທ່ານເອີບູນການເລີຍບໍ່ຕ້ອງຂາຍໝາກຖົ່ວໃຫຍ່ຢູ່ແຄມຖະໜົນອີກແລ້ວ.ທ່ານເອີບູນການທີ່ຊ່າງເຮັດຄ້າເຮັດຂາຍ,ໄດ້ສ້າງຮັ່ງຄູນມີຂຶ້ນພາຍໃນເວລາບໍ່ເທົ່າໃດປີ.ແຕ່ເມື່ອ6ປີກ່ອນ,ໃນງານສັງສັນເສດຖະກິດການຄ້າສາກົນເທື່ອໜຶ່ງທີ່ຈັດຂຶ້ນຢູ່ນະຄອນອູລູມູສີ ເມືອງເອກເຂດຊິນຈ່ຽງເຜົ່າເວີຍອູເອີປົກຄອງຕົນເອງ,ທ່ານເອີບູນການໄດ້ມີຄວາມຄິດໃໝ່.ທ່ານເວົ້າວ່າ:
"ໃນງານສັງສັນເທື່ອນັ້ນ,ມີແຕ່ໝາກຖົ່ວໃຫຍ່ຂອງຕາປານເສິງພວກເຮົາບໍ່ມີຍີ່ຫໍ້,ສ່ວນຜະລິດຕະພັນອື່ນມີຍີ່ຫໍ້ຂອງຕົນໝົດ.ໝູ່ເພື່ອນຫຼາຍຄົນ ສະເໜີໃຫ້ຂ້ອຍຈົດທະບຽນຍີ່ຫໍ້ເຊຍຊ່ານແປວ່າພູຫິມະ,ປີ2000,ຂ້າພະເຈົ້າເລີຍໄດ້ຈົດທະບຽນຍີ່ຫໍ້ເຊຍຊ່ານໃຫ້ໝາກຖົ່ວໃຫຍ່ຂອງຕົນ."
ແຕ່ນັ້ນມາ,ທ່ານເອີບູນການໄດ້ສ້າງໂຮງງານປຸງແຕ່ງໝາກຖົ່ວໃຫຍ່ຫຼັງໜຶ່ງຢູ່ຕາປານເສິງ,ແລະຍັງໄດ້ຕັ້ງສາຂາຮ້ານຂາຍໝາກຖົ່ວໃຫຍ່ຢູ່ນະຄອນອູລູມູສີອີກ.ແຕ່ວ່າ,ໝາກຖົ່ວໃຫຍ່ຍີ່ຫໍ້ເຊຍຊ່ານພັດບໍ່ໄດ້ຂາຍດິບຂາຍດີຕາມຄາດຄິດ.ເມື່ອສະຫຼຸບມູນເຫດຄວາມຫຼົ້ມແຫຼວ,ທ່ານເອີບູນການເຫັນວ່າ,ໜຶ່ງແມ່ນຍ້ອນບໍ່ໄດ້ປຸງແຕ່ງຜະລິດຕະພັນຕາມຫຼັກວິທະຍາສາດ.ສອງແມ່ນຍ້ອນການຫຸ້ມຫໍ່ພາຍນອກບໍ່ງາມ,ບໍ່ໄດ້ລະດັບ.
1 2
|
