|
ພວກພໍ່ແມ່ຈີນສຸດທີ່ເອົາໃຈໃສ່ນຳບົດບາດຂອງການສຶກສາໃນຄອບຄົວໃນການເຕີບໃຫຍ່ຂອງລູກເຕົ້າ.ໃນຫຼາຍປີມານີ້,ພວກເຂົາເຈົ້າໄດ້ປ່ຽນແປງທັດສະນະສຶກສາໃນຄອບຄົວເລື້ອຍໆ,ເອົາໃຈໃສ່ນຳການໃຊ້ວິທີວິທະຍາສາດມາບຳລຸງສ້າງລູກເຕົ້າ.ອົງການແມ່ແລະເດັກແລະໂຮງຮຽນພໍ່ແມ່ນັກຮຽນຫຼາຍແສນຫຼັງຂອງຈີນກໍ່ຊ່ອຍພໍ່ແມ່ທັງຫຼາຍແກ້ໄຂບັນຫາທີ່ພົບພໍ້ໃນການລ້ຽງລູກ,ໃຫ້ພວກເດັກນ້ອຍເຕີບໃຫຍ່ຢ່າງປອດໃສແລະມ່ວນຊື່ນໃນບັນຍາກາດຄອບຄົວອັນດີງາມ.
ນາງນ້ອຍທີ່ພວມຮ້ອງເພງຜູ້ນີ້ຊື່ວ່າຊູອີ ,ນາງແມ່ນນັກຮຽນປໍຫົກຂອງໂຮງຮຽນປະຖົມຫຼັງໜຶ່ງຢູ່ຄຸ້ມຫາຍຕ້ຽນນະຄອນປັກກິ່ງ.ຄູຂອງນາງໄດ້ຕີລາຄາວ່າ,ນາງຊູອີແມ່ນເຍົາວະຊົນທີ່ມີສຸຂະພາບແຂງແຮງແລະຈິດໃຈປອດໃສ.ເຖິງວ່າການຮຽນຂອງນາງບໍ່ເປັນທີໜຶ່ງໃນຫ້ອງ,ແຕ່ນາງມີນິໄສມ່ວນຊື່ນໃຈກວ້າງ,ມີຄວາມໝັ້ນໃຈຕໍ່ຕົນເອງ,ທັງມັກຊ່ອຍເຫຼືອຜູ້ອື່ນ,ຄູແລະໝູ່ຮຽນລ້ວນແຕ່ຮັກແພງນາງທີ່ສຸດ.ທ່ານນາງມາກຸ້ຍຫຼິງ ແມ່ຂອງນາງຊູອີເຫັນວ່າ,ລູກສາວມີນິໄສດັ່ງກ່າວແມ່ນມີສ່ວນກ່ຽວຂ້ອງກັບແມ່ທີ່ເອົາໃຈໃສ່ນຳການທຳຄວາມເຂົ້າໃຈກັນຢ່າງສະເໝີພາບກັນກັບລູກສາວໃນຍາມທຳມະດາ.
ນາງບອກນັກຂ່າວວ່າ,ກໍແມ່ນຍ້ອນຖືລູກສາວເປັນເພື່ອນ,ສະນັ້ນ,ສອງຜົວເມຍພວກເຂົາເຈົ້າຈິ່ງທຳຄວາມເຂົ້າໃຈກັນກັບລູກສາວໄດ້ງ່າຍ.ໃນຍາມທຳມະດາ,ໝົດຄອບຄົວພວກເຂົາເຈົ້າພ້ອມກັນໄປເບິ່ງຮູບເງົາເລື່ອງໃໝ່ສຸດໃນໂຮງສາຍຮູບເງົາ,ໄປຮ້ອງເພງກາລາໂອເຄ,ແລະຍັງແນະນຳບົດຄວາມທີ່ຕົນເຫັນວ່າດີແກ່ກັນ.ນາງມາກຸ້ຍຫຼິງກ່າວວ່າ,ເຖິງວ່າທັງໝົດເຫຼົ່ານີ້ລ້ວນແຕ່ແມ່ນເລື່ອງເລັກໆນ້ອຍໆໃນຊີວິດປະຈຳວັນກໍຕາມ,ແຕ່ມັນໄດ້ສົ່ງຄວາມຮັກແພງແກ່ກັນ,ເຊິ່ງມີຄວາມໝາຍຫຼາຍຕໍ່ການບຳລຸງສ້າງລູກໃຫ້ມີນິໄສມ່ວນຊື່ນ.
ນາງຊູອີກໍ່ເວົ້າວ່າ,ແຕ່ຍາມຍັງນ້ອຍ,ພໍ່ແມ່ກໍເຄົາລົບຄວາມເຫັນຂອງລູກ,ໃນເຮືອນ,ເວລາໃດນາງກໍຮູ້ສຶກມ່ວນຊື່ນສະບາຍໃຈ.ນາງເວົ້າວ່າ:"ຂ້ອຍກັບພໍ່ແມ່ຮັກແພງກັນດີ,ໃນຄອບຄົວ,ບໍ່ວ່າມີເລື່ອງຫຍັງ,ພໍ່ແມ່ກໍປຶກສາຫາລືກັບຂ້ອຍ,ຟັງຄວາມເຫັນຂອງຂ້ອຍ,ຂ້ອຍມີຫຍັງກໍຍອມເວົ້ານຳພວກເຂົາເຈົ້າ.ຂ້ອຍກັບພໍ່ແມ່ກໍເໝືອນດັ່ງໝູ່ຄູ່ດີ,ຂ້ອຍຮູ້ສຶກດີໃຈແລະມ່ວນຊື່ນທີ່ສຸດ."
ປັດຈຸບັນ,ພໍ່ແມ່ຫຼາຍໆຄົນກໍຄືກັນກັບແມ່ຂອງນາງຊູອີ,ນັບມື້ນັບເອົາໃຈໃສ່ການເຄົາລົບລູກເຕົ້າ, ແລກປ່ຽນແລະທຳຄວາມເຂົ້າໃຈກັນກັບລູກເຕົ້າໃຫ້ຫຼາຍຂຶ້ນ,ສ້າງບັນຍາກາດຄອບຄົວອັນດີງາມໃຫ້ແກ່ລູກເຕີບໃຫຍ່ຢ່າງປອດໃສ.
ໃນເວລາທຳຄວາມເຂົ້າໃຈກັນກັບລູກ,ພໍ່ແມ່ທັງຫຼາຍມັກຈະປະສົບບັນຫາໃໝ່ຈຳນວນໜຶ່ງ.ເພາະວ່າໃນໄວອາຍຸຕ່າງກັນ,ເດັກນ້ອຍຈະປະກົດມີບັນຫາຕ່າງກັນ.ຖ້າວ່າພໍ່ແມ່ແກ້ໄຂບໍ່ເໝາະສົມ,ກໍອາດຈະເກີດມີການປະທະກັນກັບລູກເຕົ້າ.ໃຕ້ກໍລະນີນີ້,ພໍ່ແມ່ຈີນຫຼາຍໆຄົນກໍໄປເຂົ້າໂຮງຮຽນພໍ່ແມ່ນັກຮຽນ,ເພື່ອຮຽນຮູ້ວິທີແກ້ໄຂບັນຫາເຫຼົ່ານີ້.ປັດຈຸບັນ,ຈີນມີໂຮງຮຽນພໍ່ແມ່ນັກຮຽນ3ແສນກວ່າຫຼັງ,ຍັງມີບ່ອນຮັບໃຊ້ພໍ່ແມ່ນັກຮຽນແບບເຂດຄຸ້ມສັງຄົມຈຳນວນຫຼວງຫຼາຍ,ເຊິ່ງແມ່ນໂຮງຮຽນຫຼືຜູ້ຊ່ຽວຊານການສຶກສາເປັນຜູ້ສ້າງຂຶ້ນ,ຊີ້ນຳແລະໃຫ້ການບໍລິການແກ່ພໍ່ແມ່ທັງຫຼາຍ.
1 2
|
