|
ໃນ 56 ຊົນເຜົ່າຂອງຈີນ, ມີ 26 ຊົນເຜົ່າຕັ້ງຖີ່ນຖານຢູ່ແຂວງຢຸນນານ ພາກຕາເວັນຕົກສຽງໃຕ້ຂອງຈີນ. ໃນຂະບວນການພັດທະນານັ້ນ, 26 ຊົນເຜົ່າດັ່ງກ່າວໄດ້ສ້າງວັດທະນະທຳຊົນເຜົ່າອັນເລີດລ້ຳຂອງຕົນ.
ແຂວງຢຸນນານເປັນບ່ອນທີ່ມີພາບວິວທິດທັດສວຍສົດງົດງາມ. ຢູ່ແຫ່ງນັ້ນ, ມີແມ່ນ້ຳລຳເຊເນັ່ງສົນສວານກັນ, ພູມປະເທດແປກປະຫຼາດ, ຈຸ້ມຫີນທີ່ວິວັດພັດທະນາຈາກຊີວະຊາດນັ້ນກໍຮັກສາໄວ້ເປັນຢ່າງດີ, ເໝືອນກັບສາງອັນເລີດແຫ່ງຊີວະຊາດອັນໃຫຍ່ໂຕມະໂຫຖານ. ທັດສະນີຍະພາບອັນສວຍງາມຂອງແຂວງຢຸນນານປະສານກັບຮີດຄອງປະເພນີຊົນເຜົ່າທີ່ມີຫຼາຍສີຫຼາຍສັນຢ່າງກົມກືນກັນ, ປະກອບເປັນວັດທະນະທຳຊົນເຜົ່າທ້ອງຖິ່ນອັນຮຸ່ງເຮືອງຂອງແຂວງຢຸນນານ. ຄຽງຄູ່ກັບການເລັ່ງລັດບາດກ້າວປະຕິຮັບແລະໄຂປະຕູຕໍ່ພາຍນອກຂອງຈີນໃຫ້ໄວເຂົ້າ, ມີຄົນນັບມື້ນັບຫຼາຍໄດ້ຮູ້ຈັກແຂວງຢຸນນານ, ວັດທະນະທຳຊົນເຜົ່າຂອງແຂວງຢຸນນານກໍ່ນັບມື້ນັບໄດ້ຮັບຄວາມສົນໃຈຈາກຄົນທັງຫຼາຍ. ເພາະສະນັ້ນ, ການຫັນທ່າແຮງທີ່ບົ່ມຊ້ອມຢູ່ໃນດ້ານວັດທະນະທຳຊົນເຜົ່າຂອງແຂວງຢຸນນານໃຫ້ເປັນພະລັງແຮງໃນການພັດທະນາເສດຖະກິດນັ້ນແມ່ນບັນຫາໜຶ່ງທີ່ແຂວງຢຸນນານປະເຊີນໃນປະຈຸບັນ.
ທ່ານຫວ່າງທຽນຊີ ເຈົ້າໜ້າທີ່ຂັ້ນສູງຂອງແຂວງຢຸນນານເວົ້າວ່າ, "ໃນຍຸກສະໄໝຂ່າວຄາວໃນປະຈຸບັນນີ້, ວັດທະນະທຳແລະເສດຖະກິດເຊື່ອມໂຍງເຂົ້າກັນ, ໄດ້ເຖິງລະດັບກວ້າງຂວາງສົມຄວນແລ້ວ. ວັດທະນະທຳສາມາດຊຸກຍູ້ຫົວຄິດປະດິດສ້າງແລະຄວາມແກ່ງແຍ່ງຂອງຄົນ, ຊັກຈູງເສດຖະກິດໃຫ້ພັດທະນາ."
ຜ່ານຈາກການສຳຫຼວດຄົ້ນຄວ້າເປັນເວລາຍາວນານ, ແຂວງຢຸນນານໄດ້ວາງຈຸດໝາຍສ້າງເປັນແຂວງໃຫຍ່ແຫ່ງວັດທະນະທຳຊົນເຜົ່າ. ຈຸດໝາຍດັ່ງກ່າວແມ່ນອີງໃສ່ວັດທະນະທຳຊົນເຜົ່າອັນອຸດົມສົມບຸນຂອງແຂວງຢຸນນານ, ຕົວຢ່າງຄື, ດົນຕີບູຮານຂອງເຜົ່ານາຊີທີ່ມີຊື່ລືນາມຢູ່ພາຍໃນປະເທດແລະຕ່າງປະເທດແລະອື່ນໆ, ເຮືອນຢູ່ແບບຕ່າງໆ ເຄື່ອງນຸ່ງຂອງຖືທີ່ມີສີສັນສວຍງາມ, ຮີດຄອງປະເພນີທີ່ປະຫຼາດ, ການເຄື່ອນໄຫວສະຫຼອງຫຼາຍຢ່າງຫຼາຍແນວ, ພິທີບູຊາທາງສາສະໜາອັນເລິກລັບ, ສຽງດົນຕີແລະວາດຟ້ອນອັນໜ້າອອນຊອນ ເຄື່ອງກິນຂອງດື່ມອັນມີລົດຊາດພິເສດຊົນເຜົ່າລ້ວນແຕ່ໄດ້ປະກອບເປັນແຫຼ່ງວັດທະນະທຳຊົນເຜົ່າທີ່ມີສະເໜຢ່າງບໍ່ສຸດສ້ຽງ.
ທ່ານໂຈວເວິນໂຈງ ຫົວໜ້າສູນແລກປ່ຽນສິນລະປະອາເມລິກາ-ຈີນຂອງມະຫາວິທະຍາໄລໂກລົມເບຍອາເມລິກາທີ່ໄດ້ມາທັດສະນະສຶກສາແຂວງຢຸນນານຫຼາຍເທື່ອໃນຫຼາຍປີມານີ້ເຫັນວ່າ, ວັດທະນະທຳຊົນເຜົ່າແມ່ນຊັຍພະຍາກອນທີ່ໃຫຍ່ຫຼວງກວ່າໝູ່ຂອງແຂວງຢຸນນານ.
ທ່ານໂຈວເວິນໂຈງເວົ້າວ່າ, "ການພັດທະນາວັດທະນະທຳຂອງແຂວງຢຸນນານແນວໃດກໍຕ້ອງພົວພັນກັບເສດຖະກິດ, ແລະພົວພັນກັບສິ່ງແວດລ້ອມຊີວະພາບ, ເພື່ອກະຕຸກຊຸກຍູ້ໃຫ້ເສດຖະກິດພັດທະນາ."
1 2
|
