|
ປີນີ້ແມ່ນສົງຄາມຈີນຕໍ່ຕ້ານຍີ່ປຸ່ນແລະສົງຄາມຕ້ານຟັດຊິດໂລກໄດ້ຮັບໄຊຊະນະຄົບຮອບ60ປີ.ໃນສົງຄາມໂລກຄັ້ງທີສອງ,ກອງທະຫານຍີ່ປຸ່ນໄດ້ກໍ່ສົງຄາມເຄມີຢູ່ຈີນ,ອັນໄດ້ນຳເອົາໄພພິບັດອັນໜັກໜ່ວງມາສູ່ປະຊາຊົນຈີນ.ເລື່ອງທີ່ຍິ່ງບໍ່ເປັນຈັ່ງບຸນ ນັ້ນແມ່ນອາວຸດເຄມີທີ່ກອງທະຫານຍີ່ປຸ່ນຮຸກຮານຈີນປະໄວ້ຢູ່ຈີນຫຼັງສົງຄາມນັ້ນໄດ້ທຳຮ້າຍຊາວຈີນທີ່ປະສົບຄວາມທໍລະມານເທື່ອແລ້ວເທື່ອອີກ.
ພໍ່ເຖົ້າລີຊິງສຽງ ປີນີ້ອາຍຸ78ປີ ບ້ານຂອງເພິ່ນຕັ້ງຢູ່ບ້ານເປຖົງ ແຂວງເຮີເປ ພາກເໜືອຂອງຈີນ,ໃນມື້ໜຶ່ງເມື່ອ63ປີກ່ອນ,ຍາດພີ່ນ້ອງ4ຄົນຂອງພໍ່ເຖົ້າພ້ອມກັນຕາຍຍ້ອນອາຍພິດຂອງກອງທະຫານຍີ່ປຸ່ນຜູ້ຮຸກຮານຈີນ.ເມື່ອກ່າວເຖິງເລື່ອງນີ້,ພໍ່ເຖົ້າມີສີໜ້າໂສກເສົ້າ.ພໍ່ເຖົ້າບອກນັກຂ່າວວ່າ,ໃນຕອນເຊົ້າມື້ໜຶ່ງໃນຕົ້ນລະດູບານໃໝ່ເມື່ອ63ປີກ່ອນ,ກອງທະຫານຍີ່ປຸ່ນມາກວາດລ້າງບ້ານຂອງເພິ່ນ,ຊາວບ້ານສ່ວນຫຼາຍຈິ່ງເຂົ້າສູ່ຄອງໃຕ້ດິນທີ່ໄດ້ຂຸດໄວ້ກ່ອນເພື່ອຫຼີກເວັ້ນການທຳຮ້າຍຂອງພວກສັດຕູ.
ແຕ່ວ່າ,ໃຜຊິຄາດເຖິງວ່າ,ກອງທະຫານຍີ່ປຸ່ນພັດຖິ້ມລູກລະເບີດອາຍພິດແລະຟືນທີ່ພວມໄໝ້ລົງສູ່ຄອງໃຕ້ດິນ,ພໍ່ເຖົ້າລີຊິງສຽງໄດ້ຫວນຄືນຢ່າງເຈັບແສບວ່າ:ໃນຄາວນັ້ນ,ຢູ່ຄອງໃຕ້ດິນເກີດມີຄວາມວຸ້ນວາຍ,ຍ້ອນມີກິ່ນອາຍພິດແສບຮູດັງຄົນທັງຫຼາຍຈິ່ງແຕກໜີໄປຢ່າງລັບຫູລັບຕາ.ຍາດພີ່ນ້ອງຂອງຕົນແລະພໍ່ແມ່ປະຊາຊົນກໍແມ່ນຕາຍໃນທ່າມກາງອາຍພິດ.ພໍ່ເຖົ້າເວົ້າວ່າ:
"ພາຍຫຼັງພວກສັດຕູປ່ອຍອາຍພິດແລ້ວ,ເອື້ອຍແລະພວກນ້ອງຊາຍຂອງຂ້ອຍກໍໄດ້ແຕກໜີໄປ,ສ່ວນນ້ອງສາວຂ້ອຍອາຍຸ8ປີທີ່ຢູ່ຄຽງຂ້າງໄດ້ເວົ້ານຳຂ້ອຍວ່າ"ອ້າຍ,ນ້ອງຍ່າງບໍ່ໄດ້ແລ້ວ."ໃນທີ່ສຸດ,ເອື້ອຍ,ນ້ອງຊາຍສອງຄົນແລະນ້ອງຂອງຂ້ອຍໄດ້ຖືກພິດແລ້ວຕາຍໝົດ.ນອກນີ້,ເຮືອນ9ຫຼັງຂອງພວກຂ້ອຍຖືກກອງທະຫານຍີ່ປຸ່ນເຜົາຈົນກ້ຽງ."
ພໍ່ເຖົ້າລີຊິງສຽງ ຍັງໄດ້ບອກຊື່ຂອງຜູ້ປະສົບເຄາະຮ້າຍທີ່ບໍ່ເປັນຈັ່ງບຸນຍິງຫຼາຍ,ຄືທ່ານລີຢຸນຫູ,ທ່ານວາງຊິນເສິງ,ນາງລີຈູເປັນຕົ້ນ.ຂໍ້ມູນທີ່ກ່ຽວຂ້ອງສະແດງໃຫ້ເຫັນວ່າ,ມື້ນັ້ນ,ຢູ່ບ້ານເປຖົງ,ລວມມີ800ກວ່າຄົນໄດ້ຕາຍຢ່າງໜ້າສັງເວດໃນສົງຄາມອາຍຜິດທີ່ກອງທະຫານຍີ່ປຸ່ນກໍ່ຂຶ້ນ.
ທີ່ຈິງແລ້ວ,ຕົວຢ່າງທີ່ກອງທະຫານຍີ່ປຸ່ນຮຸກຮານຈີນກໍ່ສົງຄາມເຄມີນັ້ນໄດ້ເຫັນຢູ່ເລື້ອຍໆ.ທ່ານປູພິງ ສາສະດາຈານຂອງສະພາບັນດິດວິທະຍາສາດສັງຄົມຈີນໄດ້ສຸມໃສ່ການຄົ້ນຄວ້າກ່ຽວກັບກອງທະຫານຍີ່ປຸ່ນກໍ່ສົງຄາມເຄມີຢູ່ຈີນເປັນໄລຍະຍາວນານ.ທ່ານຊີ້ອອກວ່າ,ແຕ່ປີ1939ຮອດສົງຄາມໂລກຄັ້ງທີສອງສິ້ນສຸດລົງ,ກອງທະຫານຍີ່ປຸ່ນໃຊ້ອາວຸດເຄມີໃນການສູ້ລົບນັ້ນແມ່ນສະພາບທີ່ເຫັນໂດຍທົ່ວໄປ.ຕາມສະຖິຕິບໍ່ຄົບຖ້ວນ,ພຽງແຕ່ກອງທະຫານຍີ່ປຸ່ນໃຊ້ອາຍພິດຕໍ່ກອງທະຫານຈີນກໍມີ2ພັນກວ່າເທື່ອ,ສ່ວນຈຳນວນເທື່ອທີ່ຍີ່ປຸ່ນໃຊ້ອາຍພິດນັ້ນຍິ່ງຈະຫຼາຍກວ່າຕົວເລກນີ້ອີກ.ແຕ່ວ່າ, ຍ້ອນໄດ້ຮັບການປົກປ້ອງຈາກອາເມລິກາ,ທາລຸນກຳຂອງກອງທະຫານຮຸກຮານຈີນ ພັດບໍ່ໄດ້ຖືກກ່າວຟ້ອງ.
ການສິ້ນສຸດລົງຂອງສົງຄາມໂລກຄັ້ງທີສອງໄດ້ນຳເອົາແສງອາລຸນມາໃຫ້ຄົນທັງຫຼາຍໃນໂລກທີ່ຖືກທໍລະມານຈາກສົງຄາມ.ແຕ່ວ່າ,ເວົ້າສຳລັບປະຊາຊົນຈີນແລ້ວ,ພັດບໍ່ໄດ້ຫ່າງເຫີນຈາກຄວາມອັນຕະລາຍຂອງອາວຸດເຄມີຂອງກອງທະຫານຍີ່ປຸ່ນ.ໃນຕອນກາງຄືນມື້ໜຶ່ງໃນລະດູໃບໄມ້ຫຼົ່ນປີ1974,ທ່ານລີເສິນກຳມະກອນກົນຈັກເຮືອທີ່ຊຳລະສະສ້າງພື້ນແມ່ນ້ຳພ້ອມດ້ວຍຜູ້ຮ່ວມງານພວມເຮັດວຽກຊຳລະສະສາງຢ່າງເຄັ່ງຕຶງຢູ່ແມ່ນ້ຳເຮີຍລົງຈ່ຽງ ທາງພາກຕາເວັນອອກສຽງເໜືອຂອງຈີນ.ທັນໃດນັ້ນ,ປ້ຳສູບນ້ຳໄດ້ສົ່ງສຽງຜິດປົກກະຕິອອກມາ,ຄືວ່າມັນຖືກສິ່ງໃດສິ່ງໜຶ່ງຕັນແລ້ວ,ໃນທີ່ສຸດ,ປ້ຳສູບນ້ຳໄດ້ມອດໄຟ.ທ່ານລີເສິນກ່າວວ່າ:
"ປ້ຳສູບນ້ຳໄດ້ຕິດຂັດແລ້ວ,ໃນເວລານັ້ນ,ພວກເຮົາໄດ້ເປີດຝາປ້ຳສູບນ້ຳ,ມີກິ່ນແສບດັງສົ່ງອອກມາ,ຂ້ອຍເອົາມືໄປງົມຖືກເຄື່ອງເຫຼັກຮູບລູກປືນໃຫຍ່.ຍ້ອນໜຶ່ງຖືກປ້ຳສູບນ້ຳທັບເພແລ້ວ,ທາດແຫຼວສີດຳໄດ້ຕິດຢູ່ປ້ຳສູບນ້ຳ.ສະນັ້ນ,ທາດແຫຼວໄດ້ຕິດມືຂ້ອຍ.ບໍ່ດົນ,ຂ້ອຍກໍຮູ້ສຶກປວດຮາກ,ແລ້ວກໍ່ຮາກອອກ,ນ້ຳຕາໄຫຼອອກ,ວິນຫົວ,ແລະຢູ່ຍາກທີ່ສຸດ."
ທີ່ຈິງແລ້ວ,ລູກປືນໃຫຍ່ທີ່ທ່ານລີເສິນແລະຜູ້ຮ່ວມງານຊອກໄດ້ນັ້ນແມ່ນກອງທະຫານຍີ່ປຸ່ນຜູ້ຮຸກຮານຈີນປະຖີ້ມ,ທາດແຫຼວໃນລູກປືນໃຫຍ່ແມ່ນຢາພິດເຄມີຊະນິດໜຶ່ງທີ່ເອີ້ນວ່າອາຍພິດມາສເຕີ,ມັນສາມາດທຳລາຍຈຸລັງເນື້ອເຍື້ອຂອງຄົນໂດຍກົງ,ພາໃຫ້ ຜິວໜັງ,ເຍື່ອໃນອະໄວຍະວະເປັນອັກເສບຫຼືຕາຍໄປ,ແລະຜ່ານຈາກຜິວໜັງ,ຕາ,ເຍື່ອໃນລະບົບຫາຍໃຈ,ເຮັດໃຫ້ໝົດຕົນໂຕຂອງຄົນຖືກພິດ,ພາໃຫ້ເປັນພະຍາດຜິວໜັງ.ຍ້ອນຖືກນ້ຳພິດເຊື່ອມຊຶມ,ທ່ານລີເສິນຈຳເປັນຕ້ອງເຂົ້າໂຮງໝໍປິ່ນປົວເທື່ອແລ້ວເທື່ອອີກ.ຈົນຮອດຊູ່ມື້ນີ້,ອາການຢ້ອນຫຼັງຈຳນວນໜຶ່ງຍັງທໍລະມານທ່ານໂດຍຕະຫຼອດຄືຮິມສົບອອກເລືອດເລື້ອຍໆ,ລາງເທື່ອຫາຍໃຈຍາກເປັນຕົ້ນ.
1 2
|
