|
ທ່ານຜູ້ຟັງທີ່ເຄົາລົບ, ອຸດສາຫະກຳໂຄມິກ (comic) ເຊິ່ງເອົາກາຕູນ ການຫຼິ້ນເກມເທິງເນັດ, ການຫຼິ້ນເກມໂທລະສັບມືຖື, ແລະຜະລິດຕະພັນສາລະພັດສື່ເປັນຕົ້ນເປັນຕົວແທນນັ້ນຖືກເອີ້ນເປັນ"ອຸດສາຫະກຳຍາມເຊົ້າ"ໃນສະຕະວັດທີ 21. ງານໂຄມິກສາກົນຄັ້ງປະຖົມມະເລີກຂອງຈີນທີ່ຫາກໍສິ້ນສຸດລົງ, ໄດ້ເພີ່ມກຳລັງແມ່ແຮງໃໝ່ໃຫ້ແກ່ອຸດສາຫະກຳໂຄມິກຈີນທີ່ພວມຈະເລີນຂຶ້ນ.
ອຸດສາຫະກຳໂຄມິກຈີນໄດ້ສ້າງຂຶ້ນແຕ່ດົນແລ້ວ, ແຕ່ບໍ່ໄດ້ກ້າວເຂົ້າສູ່ຖັນແຖວປະເທດພັດທະນາໂຄມິກໂດຍຕະຫລອດ.
ຟິມກາຕູນເລື່ອງຍາວເລື່ອງທຳອິດຂອງໂລກທີ່ຊື່ວ່າ"ເຈົ້າຍິງສະໂນໄວ"ໄດ້ນຳອອກສາຍເມື່ອປີ 1937. ເມື່ອປີ 1941, ຈີນກໍໄດ້ສາຍຟິມກາຕູນເລື່ອງທຳອິດໃນອາຊີ, ຄື, ເລື່ອງ"ເຈົ້າຍິງວີເຫຼັກ". ໃນຊຸມປີ 50-60 ສະຕະວັດທີແລ້ວ, ຟິມກາຕູນຫລາຍເລື່ອງທີ່ຜະລິດໂດຍໂຮງສ້າງຟິມວິຈິດຕະກຳຊຽງໄຮ້ນັ້ນໄດ້ຮັບລາງວັນໃນງານຮູບເງົາສາກົນ. ໃນດ້ານສິ່ງພິມ, ປື້ມນ້ອຍຮູບແຕ້ມເປັນເລື່ອງທີ່ມີສີສັນພິເສດອັນເຂັ້ມຂຸ້ນຂອງຈີນເຄີຍມີຜົນສະທ້ອນຕໍ່ເດັກນ້ອຍຈີນນັບເປັນຮ້ອຍລ້ານຄົນ. ແຕ່ຟິມກາຕູນແລະເລື່ອງຮູບແຕ້ມເຫຼົ່ານີ້ລ້ວນແຕ່ເຮັດດ້ວຍມື, ຊ້າ, ເຮັດຍາກ, ຕົ້ນທຶນກໍແພງ, ບໍ່ທໍ່ໃຊ້ເຕັກນິກຄອບພິວເຕີໃນປະຈຸບັນ, ຈຶ່ງໄດ້ເຊົາຜະລິດແລ້ວ. ຫລັງຊຸມປີ 80 ສະຕະວັນທີ 20, ຜະລິດຕະພັນໂຄມິກຂອງອາເມລິກາ ຍີ່ປຸ່ນແລະສ.ເກົາຫລີເປັນຕົ້ນໄດ້ເຂົ້າສູ່ຈີນຢ່າງຫລວງຫລາຍ, ສ່ວນຜະລິດຕະພັນໂຄມິກທີ່ຈີນຜະລິດນັ້ນແມ່ນມີໜ້ອຍທີ່ສຸດ. ໃນຫລາຍປີມານີ້ ສະພາບການດັ່ງກ່າວຈຶ່ງໄດ້ມີການປ່ຽນແປງ.
ງານໂຄມິກສາກົນຈີນຄັ້ງປະຖົມມະເລີກທີ່ຈັດຂຶ້ນຢູ່ຫາງໂຈວ ເມືອງທ່ອງທ່ຽວພາກຕາເວັນອອກຂອງຈີນແຕ່ວັນທີ 1 ຫາວັນທີ 5 ມິຖຸນາແມ່ນງານໂຄມິກທີ່ມີຂະໜາດໃຫຍ່ກວ່າໝູ່ຢູ່ພາຍໃນປະເທດຈີນນັບມາຮອດປັດຈຸບັນ, ໃນນັ້ນ, ງານມະຫະກຳຜະລິດຕະພັນໂຄມິກທີ່ຜະລິດເດີມແມ່ນເນື້ອໃນສຳຄັນຂອງງານໂຄມິກຄັ້ງນີ້. ເຖິງວ່າເຄື່ອງວາງສະແດງແມ່ນເອົາເຄື່ອງສຽງແລະພາບເປັນຫລັກ, ແຕ່ຄົນທັງຫລາຍຍັງຄົງໄດ້ມອງເຫັນອະນາຄົດອັນກວ້າງຂວາງຂອງອຸດສາຫະກຳໂຄມິກຈີນ.
ໃນ 1-2 ປີມານີ້, ຈີນໄດ້ສ້າງວິສາຫະກິດຜະລິດໂຄມິກຕັ້ງຫລວງຫລາຍ. ບໍລິສັດກາຕູນຈົ່ງນານແມ່ນວິສາຫະກິດຜະລິດກະຕຸນທີ່ມີຂະໜາດຂ້ອນຂ້າງໃຫຍ່ແຫ່ງໜຶ່ງ, ຟິມກາຕູນ"ທຽນຢຽນ" ແປວ່າ ຕາຟ້າ ທີ່ບໍລິສັດດັ່ງກ່າວຜະລິດນັ້ນໄດ້ຮັບການຕີລາຄາສູງຢູ່ຕະຫລາດຈີນແລະຕ່າງປະເທດ.
ທ່ານຈູເຢ້ກວາງ ຮອງຜູ້ອຳນວຍການໃຫຍ່ຂອງບໍລິສັດດັ່ງກ່າວເຫັນໄປໃນແງ່ດີທີ່ສຸດຕໍ່ການພັດທະນາອຸດສາຫະກຳກະຕຸນຈີນ. ທ່ານເວົ້າວ່າ, "ທຽນຢຽນ" ຕາຟ້າຂາຍດິບຂາຍດີຢູ່ຕະຫລາດສາກົນ, ຍີ່ປຸ່ນແລະໄທໄດ້ເຊັນສັນຍາກັບພວກຂ້າພະເຈົ້າແລ້ວ, ພວກຂ້າພະເຈົ້າເອົາໃຈໃສ່ທີ່ສຸດນຳການໝູນເດີນຟິມເລື່ອງນີ້, ຕ່ອງໂສ້ອຸດສາຫະກຳໄດ້ຂ້ອນຂ້າງຄົບຖ້ວນບໍລິບູນແລ້ວ. ພວກຂ້າພະເຈົ້າຫວັງໃຫ້ສະແດງວັດທະນະທຳຈີນດ້ວຍຮູບການຕ່ອງໂສ້ອຸດສາຫະກຳ.
1 2
|
