|
ສະບາຍດີທ່ານຜູ່ຟັງທີ່ໂຄລົບ, ແຕ່ງານກິລາໂອລິມ ປິກລອສ໌ແອນເຈີລິສ໌ເມື່ອປີ 1984 ເປັນຕົ້ນມາ, ງານກິລາໂອລິມປິກໄດ້ຜູກການພົວພັນກັບນັກທຸລະກິດ. ງານກິລາໂອລິມປິກໃນຖານະເປັນງານມະໂຫລານທີ່ທົ່ວໂລກສົນໃຈນຳນັ້ນ, ກໍ່ເປັນສະຖານທີ່ດີກວ່າໝູ່ທີ່ວິສາຫະກິດສະແດງຕົນເອງແລະໂຄສະນາຕົນເອງ. ດຽວນີ້ ງານກິລາໂອລິມປິກປັກກິ່ງປີ 2008 ກໍ່ອຳນວຍໂອກາດດີແກ່ວິສາຫະກິດຈີນແລະຕ່າງປະເທດ. ຕໍ່ໄປເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ງານກິລາໂອລິມປິກປັກກິ່ງມີໂອກາດທາງທຸລະກິດຫຼາຍ.
ເຖິງວ່າແຕ່ດຽວນີ້ໄປຮອດມື້ຈັດງານກິລາໂອລິມປິກປັກກິ່ງຍັງມີ 3 ປີປາຍກໍ່ຕາມ, ແຕ່ຕະຫຼາດອັນໃຫຍ່ໂຕຂອງງານກິລາມະໂຫລານລະດັບໂລກເທື່ອນີ້ໄດ້ດຶງດູດວິສາຫະກິດຫຼາຍໆແຫ່ງມາແຕ່ດົນແລ້ວ, ພວກເຂົາເຈົ້າຫວັງຢ່າງແຮງກ້າເຂົ້າຮ່ວມງານກິລາໂອລິມປິກມະໂຫລານເທື່ອນີ້ເໝືອນນັກກິລາ.
ແຜນການຄູ່ຂາໂອລິມປິກ ຫຼືແຜນການ TOP ຂອງຄະນະກຳມະການໂອລິມປິກສາກົນ ກໍ່ແມ່ນໂອກາດໜຶ່ງທີ່ວິສາຫະກິດທົ່ວໂລກມີຄວາມປາຖະໜາຢ່າງແຮງກ້າທີ່ສຸດ. ຕາມການກຳນົດ, ວິສາຫະກິດທີ່ເປັນຄູ່ຂາຮ່ວມມືໂອລິມປິກທົ່ວໂລກບໍ່ພຽງແຕ່ຈະໄດ້ສິດນຳໃຊ້ສິດຊັບສິນທາງປັນຍາໂອລິມປິກພາຍໃນຂອບເຂດທົ່ວໂລກ ແລະທຸລະກິດໃນຕະຫຼາດທໍ່ນັ້ນ, ຫາກຍັງໄດ້ສິດຜະລິດຜະລິດຕະພັນແລະສິດບໍລິການເຊິ່ງວິສາຫະກິດອື່ນບໍ່ມີ. ໃນແຜນການ TOPຊຸດທີ 6 ຂອງຄະນະກຳມະການໂອລິມປິກສາກົນເຊິ່ງລວມທັງງານກິລາໂອລິມປິກປັກກິ່ງ, ບໍ່ພຽງແຕ່ໄດ້ດຶງດູດເອົາບໍລິສັດຂ້າມຊາດຂະໜາດໃຫຍ່ໂຕ 11 ແຫ່ງໃນທົ່ວໂລກທໍ່ນັ້ນ, ຫາກຍັງເຮັດໃຫ້ວິສາຫະກິດຈີນມີໂອກາດສະແດງຕົນເອງ, ກຸ່ມເລໂນໂວຈີນກໍ່ໄດ້ກຳໂອກາດດີ, ກາຍເປັນຄູ່ຂາຮ່ວມມືແຫ່ງດຽວຂອງຄະນະກຳມະການໂອລິມປິກສາກົນໃນຂະແໜງການເຕັກນິກຂໍ້ມູນຂ່າວສານ. ໃນເວລາເວົ້າເຖິງຍຸດໂທບາຍຂອງບໍລິສັດເລໂນໂວໃນການເຂົ້າຮ່ວມແຜນການ TOP, ທ່ານນາງລີເມິຍ ຜູ່ຕາງໜ້າກຸ່ມເລໂນໂວເວົ້າວ່າ:
ໃນເວລານັ້ນ ພວກຂ້າພະເຈົ້າໄດ້ພິຈາລະນາວ່າ, ນີ້ແມ່ນຈີນໄດ້ສິດເປັນເຈົ້າພາບຈັດງານກິລາໂອລິມປິກເປັນຄັ້ງທຳອິດ; ຜົນການຄົ້ນຄວ້າການຕະຫຼາດທຸກດ້ານຂອງພວກຂ້າພະເຈົ້າລ້ວນແຕ່ສະແດງໃຫ້ເຫັນວ່າ, ງານກິລາໂອລິມປິກໄດ້ຮັບການສະໜັບສະໜູນຢ່າງກວ້າງຂວາງທີ່ສຸດຢູ່ຈີນ, ເຊິ່ງຍັງຫຼາຍກວ່າປະເທດອື່ນ; ເມື່ອພິຈາລະນາຈາກມຸມຍຸດທະສາດຂອງເລໂນໂວແລ້ວ, ພວກຂ້າພະເຈົ້າພວມສະແຫວງຫາແທ່ນທີ່ສາມາດສະໜັບສະໜູນເລໂນໂວເຂົ້າສູ່ຕະຫຼາດສາກົນ; ໃນເວລານັ້ນ ຄະນະກຳມະການໂອລິມປິກສາກົນກໍ່ຊົມເຊີຍວິສາຫະກິດແຫ່ງໜຶ່ງຂອງຈີນເປັນໜຶ່ງໃນບັນດາຄູ່ຂາຮ່ວມມືຂອງແຜນການ TOP, ຍ້ອນບໍລິສັດ IBMຖອນຕົວອອກ, ຂົງເຂດເຕັກນິກຂໍ້ມູນຂ່າວສານເລີຍບໍ່ມີວິສາຫະກິດເຂົ້າຮ່ວມ. ສະນັ້ນ ພວກຂ້າພະເຈົ້າເຫັນວ່າ, ນີ້ແມ່ນປະຫວັດສາດອຳນວຍໂອກາດທີ່ຫາຍາກທີ່ສຸດແກ່ພວກຂ້າພະເຈົ້າ.
1 2
|
