|
|
 |
| (GMT+08:00)
2005-07-06 17:01:29
|
 |
|
ງານກິລາໂອລິມປິກປັກກິ່ງມີໂອກາດທາງທຸລະກິດຫຼາຍ
cri
Author: q
ກຸ່ມເລໂນໂວເຂົ້າຮ່ວມແຜນການ TOP, ຈະເປັນວິສາຫະກິດແຫ່ງດຽວທີ່ສະໜອງການຊ່ອຍເຫຼືອດ້ານເຄື່ອງຄອມພິວເຕີ ທຶນຮອນແລະເຕັກນິກໃຫ້ແກ່ງານກິລາໂອລິມປິກລະດູໜາວທີ່ຕູຣິນປີ 2006 ງານກິລາໂອລິມປິກປັກກິ່ງປີ 2008 ພ້ອມຄະນະກຳມະການໂອລິມປິກແລະຄະນະນັກກິລາໂອລິມປິກຂອງ 200 ກວ່າປະເທດແລະເຂດແຄວ້ນໃນໂລກ, ໃນໄລຍະງານກິລາໂອລິມປິກ, ເຈົ້າໜ້າທີ່ ສື່ມວນຊົນ ພະນັກງານແລະຜູ່ອາສາສະໝັກລ້ວນແຕ່ຈະໃຊ້ຜະລິດຕະພັນຂອງເລໂນໂວ. ສ່ວນກຸ່ມເລໂນໂວ ນຳໃຊ້ກາໝາຍ 5 ບວງໂອລິມປິກແລະຕົວໜັງສື "ຄູ່ຂາຮ່ວມມືໂອລິມປິກທົ່ວໂລກ", ຈະເຮັດໃຫ້ວິສາຫະກິດສ້າງຊື່ສຽງດົ່ງດັງໃນຕະຫຼາດສາກົນຕື່ມອີກ.
ຄະນະກຳມະການໂອລິມປິກສາກົນຫຼື IOC ກຳນົດໄວ້ວ່າ, ສະມາຊິກແຜນການ TOP ບໍ່ໃຫ້ເກີນ 12 ບໍລິສັດ, ສະນັ້ນ ວິສາຫະກິດຈຳນວນຫຼວງຫຼາຍໄດ້ຫັນສາຍຕາໃສ່ແຜນການພັດທະນາຕະຫຼາດງານກິລາໂອລິມປິກປັກກິ່ງປີ 2008. ຕາມໄດ້ຊາບ, ຄວາມຕ້ອງການລວມຂອງຕະຫຼາດງານກິລາໂອລິມປິກປັກກິ່ງສູງເຖິງ 600 ຕື້ຢວນ, ຂອບເຂດການລົງທຶນລວມທັງການກໍ່ສ້າງພື້ນຖານໂຄງລ່າງຕົວເມືອງ ການກໍ່ສ້າງສິ່ງກໍ່ສ້າງກິລາແລະສິ່ງກໍ່ສ້າງ ອະນຸລັກສິ່ງແວດລ້ອມ ຄ່າໃຊ້ຈ່າຍໃນການໝູນເດີນງານກິລາໂອລິມປິກ ຄ່າໃຊ້ຈ່າຍໃນການປ້ອງກັນຄວາມສະຫງົບແລະອື່ນໆ, ໄດ້ກ່ຽວພັນເຖິງຫຼາຍໆຂົງເຂດ, ເຮັດໃຫ້ວິສາຫະກິດປະເພດຕ່າງໆລ້ວນແຕ່ມີໂອກາດທຸລະກິດກ່ຽວກັບງານກິລາໂອລິມປິກ. ໃນສະເພາະໜ້ານີ້, ມີວິສາຫະກິດທີ່ຊື່ດັງຂອງຈີນແລະຕ່າງປະເທດ 8 ແຫ່ງໄດ້ເຊັນສັນຍາອຸປະຖຳກັບຄະນະກຳມະການຈັດຕັ້ງງານກິລາໂອລິມປິກປັກກິ່ງ, ກາຍເປັນຄູ່ຂາຮ່ວມມືຂອງງານກິລາໂອລິມປິກປັກກິ່ງແລ້ວ. ສິ່ງທີ່ຄູ່ຂາຮ່ວມມືເຫຼົ່ານີ້ເອົາໃຈໃສ່ນັ້ນບໍ່ພຽງແຕ່ແມ່ນປະສິດທິຜົນອັນມະຫາສານໃນໄລຍະງານກິລາໂອລິມປິກທໍ່ນັ້ນ ພວກເຂົາເຈົ້າໄດ້ມອງໄປໜ້າທີ່ຍາວໄກກວ່ານີ້ອີກ. ທ່ານເວິຍເສິງຢຸ້ຍ ຜູ່ຕາງໜ້າກຸ່ມລົດຍົນຟອກສ໌ວາເກິນທີ່ສະໜອງການບໍລິການໃນຂົງເຂດລົດຍົນໃຫ້ແກ່ງານກິລາໂອລິມປິກປັກກິ່ງໄດ້ບັນລະຍາຍຄວາມໝາຍຂອງການສະໜັບສະໜູນງານກິລາໂອລິມປິກປັກກິ່ງຂອງພວກເຂົາເຈົ້າ, ທ່ານເວົ້າວ່າ:
ພວກຂ້າພະເຈົ້າສຳນຶກຮູ້ເຖິງຄວາມຈູບຈ້າວຫ້າວຫັນແລະຄວາມພາກພູມໃຈຂອງປະຊາຊົນຈີນທີ່ມີຕໍ່ງານກິລາໂອລິມປິກ, ສ່ວນພວກຂ້າພະເຈົ້າກໍ່ຢາກສະໜັບສະໜູນພາລະກິດດ້ານວັດທະນະທຳ ການສຶກສາແລະສະຫວັດດີການຂອງປະຊາຊົນຈີນຢ່າງຕັ້ງໜ້າ. ຄວາມປອດໄພແມ່ນປັດໄຈອັນສຳຄັນຂອງລົດຍົນ, ໃນຖານະເປັນວິສາຫະກິດນຳໜ້າໃນທົ່ວໂລກ, ພວກຂ້າພະເຈົ້າໄດ້ຍຶດໝັ້ນມາດຖານຄວາມປອດໄພສູງສຸດໂດຍຕະຫຼອດ. ພວກຂ້າພະເຈົ້າຮ່ວມມືກັບຄະນະກຳມະການຈັດຕັ້ງງານກິລາໂອລິມປິກປັກກີ່ງ, ພ້ອມກັນຄົ້ນຄວ້າເຕັກນິກທີ່ເຮັດໃຫ້ອຸບັດຕິເຫດຫຼຸດໜ້ອຍລົງ, ອົບຮົມແລະສຶກສາຄວາມປອດໄພໃນການຂັບລົດ, ທັງນີ້ ຈະເຮັດໃຫ້ສະພາບແວດລ້ອມຄົມມະນາຄົມຍິ່ງປອດໄພກວ່າເກົ່າ, ແລະກໍໄດ້ສະແດງເຖິງທັດສະນະຄະຕິວັດທະນະທຳຂອງງານກິລາໂອລິມປິກ.
ນອກຈາກວິສາຫະກິດໃຫຍ່ຄືກຸ່ມຟອກສ໌ວາເກິນນັ້ນແລ້ວ, ວິສາຫະກິດຂະໜາດກາງແລະຂະໜາດນ້ອຍຈຳນວນຫຼວງຫຼາຍກໍເຫັນໄປໃນແງ່ດີຕໍ່ອະນາຄົດແລະຕັ້ງໜ້າເຂົ້າຮ່ວມ ຕະຫຼາດງານກິລາໂອລິມປິກປັກກິ່ງ. ບົດລາຍງານຂອງສະຖາບັນຄົ້ນຄວ້າເສດຖະກິດງານກິລາໂອລິມ ປິກປັກກິ່ງສະແດງໃຫ້ເຫັນວ່າ, ວິສາຫະກິດທີ່ບໍ່ແມ່ນຄູ່ຂາຮ່ວມມືຫຼືຜູ່ອຸປະຖຳເຫຼົ່ານັ້ນ, ສາມາດເຂົ້າຮ່ວມຕະຫຼາດງານກິລາໂອລິມປິກໂດຍຜ່ານການເຂົ້າຮ່ວມການທຸລະກິດທີ່ອະນຸຍາດພິເສດ ຮ່ວມມືກັບວິສາຫະກິດອຸປະຖຳງານກິລາໂອລິມປິກແລະຮູບແບບອື່ນ. ຄະນະກຳມະການຈັດຕັ້ງງານກິລາໂອລິມປິກປັກກິ່ງຮັບປະກັນວ່າ, ຈະອຳນວຍໂອກາດແຂ່ງຂັນຢ່າງສະເໝີພາບແກ່ທຸກວິສາຫະກິດທີ່ເຂົ້າຮ່ວມຕະຫຼາດງານກິລາໂອລິມປິກ. ທ່ານຫວັງເວິຍ ຮອງປະທານທັງເປັນເລຂາບໍລິຫານຄະນະກຳມະການຈັດຕັ້ງງານກິລາໂອລິມປິກປັກກິ່ງເວົ້າວ່າ:
ຖ້າວິສາຫະກິດຈີນສວຍໃຊ້ໂອກາດຈັດງານກິລາໂອລິມປິກ, ອຸປະຖຳງານກິລາໂອລິມປິກ, ສາມາດເຮັດໃຫ້ກົນໄກ ຄວາມສາມາດແລະຖັນແຖວຂອງພວກເຂົາເຈົ້າມີການພັດທະນາໄວກວ່າເກົ່າ, ຈະມີຜົນດີຕໍ່ການຍົກສູງຄວາມສາມາດຂອງວິສາຫະກິດ. ບໍ່ວ່າຈະແມ່ນເພື່ອງານກິລາໂອລິມປິກ ວິສາຫະກິດຫຼືວ່າເພື່ອປະເທດຊາດ, ຫວັງໃຫ້ທຸກກ້ຳທຸກຝ່າຍຈົ່ງເຂົ້າຮ່ວມງານກິລາໂອລິມ ປິກປັກກິ່ງ.
1 2
|
|
|
