|
ປີນີ້ແມ່ນປີທີ່ສົງຄາມຈີນຕໍ່ຕ້ານຍີ່ປຸ່ນແລະສົງຄາມຕ້ານຟັດຊິດໂລກໄດ້ຮັບໄຊຊະນະຄົບຮອບ60ປີ.ເມື່ອ60ກວ່າປີກ່ອນ,ສົງຄາມຮຸກຮານຈີນທີ່ລັດທິລັດຖະທະຫານຍີ່ປຸ່ນກໍ່ຂຶ້ນນັ້ນໄດ້ນຳເອົາໄພພິບັດອັນໜັກໜ່ວງມາໃຫ້ປະຊາຊົນຈີນ,ເຊິ່ງໄດ້ພາໃຫ້ທະຫານແລະສາມັນຊົນຈີນຈຳນວນ35ລ້ານກວ່າຄົນຕາຍແລະບາດເຈັບ.ພາຍຫຼັງຍີ່ປຸ່ນປະລາໄຊໃນສົງຄາມເມື່ອປີ1945ແລ້ວ,ຍີ່ປຸ່ນໄດ້ປະຖິ້ມລູກກຳພອຍຍີ່ປຸ່ນ5000ກວ່າຄົນຢູ່ຈີນ.ພໍ່ແມ່ປະຊາຊົນຈີນທີ່ໃຈບຸນໄດ້ສະແດງຄວາມຮັກແພງຕໍ່ລູກກຳພອຍຍີ່ປຸ່ນ,ລ້ຽງດູພວກເຂົາເຈົ້າໃຫ້ເຕີບໃຫຍ່ຂຶ້ນ.
ທ່ານນາງຊີໂອບາຣາ ຮາສູມິ ພ້ອມກັບຜົວແລະແມ່ລ້ຽງຢູ່ຍີ່ປຸ່ນ
ທ່ານນາງຊີໂອບາຣາ ຮາສູມິ ທີ່ດຳລົງຊີວິດຢູ່ໂຕກຽວໃນປັດຈຸບັນ,ມັກໃຫ້ຄົນທັງຫຼາຍເອີ້ນຊື່ຈີນຂອງຕົນ,ຄືຕູ້ຕົ່ງໄມ.ເພາະວ່າ,ນາງເປັນລູກກຳພອຍທີ່ເຕີບໃຫຍ່ຢູ່ຈີນພາຍໃຕ້ການລ້ຽງດູເບິ່ງແຍງຂອງພໍ່ລ້ຽງແມ່ລ້ຽງຈີນ,ພໍ່ລ້ຽງໄດ້ຕັ້ງຊື່ໃຫ້ນາງ ວ່າ"ຕູ້ຕົ່ງໄມ".
ທ່ານນາງຊີໂອບາຣາ ຮາສູມິ(ກາງ) ພ້ອມກັບຜົວແລະແມ່ລ້ຽງຢູ່ຈີນ
ເດືອນມິຖຸນາປີນີ້,ຄືກັນກັບທຸກປີທີ່ຜ່ານມາ,ນາງ ຊີໂອບາຣາ ຮາສູມິໄດ້ກັບຄືນສູ່ນະຄອນສາງຊຸນ ແຂວງຈີລິນ ພາກຕາເວັນອອກສຽງເໜືອຂອງຈີນ,ເພື່ອຢູ່ເປັນເພື່ອນນຳກັນກັບແມ່ເຖົ້າຢູຊືຟາງ ແມ່ລ້ຽງທີ່ອາຍຸ90ກວ່າປີແລ້ວນັ້ນຊົ່ວໄລຍະໜຶ່ງ.ນາງຊີໂອບາຣາ ຮາສູມິ ເວົ້າວ່າ: "ຄັນວ່າບໍ່ມີພໍ່ລ້ຽງແມ່ລ້ຽງ,ກໍ່ບໍ່ຫ່ອນຊິມີຂ້ອຍໃນຊູ່ມື້ນີ້ຢ່າງເດັດຂາດ.ແລະໄດ້ສ້າງຄອບຄົວດີປານນີ້.ສະນັ້ນ,ຂ້ອຍລືມພວກເພິ່ນບໍ່ໄດ້."
ນາງຕູ້ຕົ່ງໄມແມ່ນໜຶ່ງໃນລູກກຳພອຍຈຳນວນຫຼວງຫຼາຍທີ່ຍີ່ປຸ່ນປະໄວ້ຢູ່ຈີນໃນສົງຄາມໂລກຄັ້ງທີສອງ.ເມື່ອ60ກວ່າປີກ່ອນ,ເພື່ອບັນລຸຈຸດປະສົງ ຍຶດຄອງຈີນຢ່າງຍາວນານ,ຍີ່ປຸ່ນໃນຂະນະທີ່ຮຸກຮານຈີນດ້ວຍກຳລັງອາວຸດນັນ,ຍັງໄດ້ເລັ່ງລັດປຸ້ນສະດົມທາງເສດຖະກິດຢູ່ຈີນ,ແລະຍົກຍ້າຍປະຊາກອນຢ່າງຫຼວງຫຼາຍໄປແຂວງເຮີຍລົງຈ່ຽງ,ແຂວງຈິລິນ,ແຂວງລຽວນິງແລະເຂດມົງໂກໃນທີ່ຢູ່ພາກຕາເວັນອອກສຽງເໜືອຂອງຈີນ.ພໍ່ແມ່ຂອງນາງຕູ້ຕົ່ງໄມກໍແມ່ນໜຶ່ງໃນ ຊາວຍົກຍ້າຍຍີ່ປຸ່ນຈຳນວນຫຼວງຫຼາຍ.
ປີ1945,ພາຍຫຼັງປະລາໄຊໃນສົງຄາມຮຸກຮານຈີນແລ້ວ,ກອງທະຫານຍີ່ປຸ່ນທີ່ແຕກທັບ ແລະຊາວຍົກຍ້າຍຍີ່ປຸ່ນກຽມຈະໂຕນໜີຄືນສູ່ຍີ່ປຸ່ນ.ຢູ່ກາງທາງກັບຄືນປະເທດ,ເພື່ອຫຼຸດຜ່ອນຄວາມຫາບແບກໃນການໂຕນໜີ,ທະຫານຍີ່ປຸ່ນທີ່ໂຫດຮ້າຍປ່າເຖື່ອນໄດ້ເຂັ່ນຂ້າແມ່ຍິງແລະເດັກນ້ອຍຍີ່ປຸ່ນທີ່ຮ່ວມກັນເດີນທາງນັ້ນຢ່າງທາລຸນ,ຈົນກະທັ້ງຍັງໄດ້ບັງຄັບໃຫ້ຜູ້ເປັນແມ່ຂ້າລູກຄີງຂອງຕົນເອງ.
ຕາມຂໍ້ມູນສະຖິຕິທີ່ກ່ຽວຂ້ອງ,ຍ້ອນວ່າພໍ່ແມ່ຕາຍຫຼືໂຕນໜີຢ່າງຟ້າວຟັງ,ໃນຄາວນັ້ນ,ມີລູກກຳພ້າກຳພອຍຍີ່ປຸ່ນປະມານ5ພັນກວ່າຄົນຖືກປະໄວ້ຢູ່ສາມແຂວງພາກຕາເວັນອອກສຽງເໜືອແລະເຂດມົງໂກໃນປົກຄອງຕົນເອງຂອງຈີນ,ໃນນັ້ນ,ຜູ້ໃຫຍ່ກວ່າໝູ່ມີອາຍຸ13ປີ,ສ່ວນຜູ້ນ້ອຍສຸດ ຫາກໍ່ເກີດອອກມາບໍ່ເທົ່າໃດມື້.
ລູກກຳພ້າກຳພອຍຍີ່ປຸ່ນທີ່ຖືກຄອບຄົວແລະພີ່ນ້ອງຮ່ວມຊາດປະໄວ້ຢູ່ແດນຈີນນັ້ນ,ລ້ວນແຕ່ຖືກພໍ່ແມ່ປະຊາຊົນຈີນທີ່ຢູ່ອ້ອມຂ້າງອູ້ມເມືອເຮືອນ,ແລ້ວເບິ່ງແຍງຢ່າງພຽນໃຈ.ທີ່ຈິງແລ້ວ,ພໍ່ແມ່ປະຊາຊົນໃນຄາວນັ້ນຄຽດຊັງຄົນຍີ່ປຸ່ນທີ່ສຸດ,ພາຍໃນເວລາ10ກວ່າປີທີ່ຍີ່ປຸ່ນຮຸກຮານຈີນ,ພວກມັນໄດ້ປະຕິບັດນະໂຍບາຍທາລຸນທີ່ເຜົາກ້ຽງ,ຂ້າກ້ຽງ,ປຸ້ນກ້ຽງ,ອັນໄດ້ພາໃຫ້ທະຫານແລະປະຊາຊົນຈີນ35ລ້ານກວ່າຄົນຕາຍແລະບາດເຈັບ.ຫຼາຍໆຄອບຄົວເສຍຍາດພີ່ນ້ອງ.ແຕ່ວ່າພໍ່ແມ່ປະຊາຊົນຈີນທີ່ໃຈບຸນຮູ້ວ່າ,ຜູ້ທີ່ສ້າງຜົນຮ້າຍນັ້ນແມ່ນລັດຖະບານລັດທິລັດຖະທະຫານຍີ່ປຸ່ນ,ສ່ວນພວກເດັກນ້ອຍແມ່ນບໍ່ມີໂທດຫຍັງ.ພວກພໍ່ແມ່ປະຊາຊົນຈີນໄດ້ອົດກັ້ນຄວາມຄຽດແຄ້ນແໜ້ນໃຈໄວ້,ແລ້ວຊຸບລ້ຽງເດັກນ້ອຍຍີ່ປຸ່ນທີ່ຖືກປະຖີ້ມເໝືອນດັ່ງລູກຄີງຂອງຕົນ.
1 2
|
