|
|
 |
| (GMT+08:00)
2005-07-26 16:01:11
|
 |
|
ຊາວຢິວຊຽງໄຮ້ທີ່ມີຄວາມຮັກຫອມຕໍ່ຈີນ(ສຽງ)
cri
Author: q
ເມື່ອທຽບກັບເອີລົບທີ່ມີຮີດຄອງປັດເຂ່ຍແລະຕ້ານຊາວຢິວຢ່າງຮຸນແຮງນັ້ນ,ຄົນຈີນທີ່ໄດ້ຮັບຜົນສະທ້ອນຢ່າງເລິກເຊິ່ງຈາກແນວຄິດສຳນັກປັດຊະຍາ ຂົງຈືນັ້ນໄດ້ໃຊ້ທ່າທີໂອບອ້ອມອາລີຕໍ່ຊາວຍົກຍ້າຍຈາກພາຍນອກໂດຍຕະຫຼອດ.ຄຸນສົມບັດທີ່ໂອບອ້ອມອາລີແລະມີມາລະຍາດອັນເປັນມູນເຊື້ອຂອງປະຊາຊາດຈີນໄດ້ເຮັດໃຫ້ຊາວຢິວອົບພະຍົບຄືກັນກັບຄູ່ຜົວເມຍນິສບາມສາມາດຫຼີກມົ້ນຈາກການ ເປັນປໍລະປັກແລະຖືກເຄາະຮ້າຍ,ແລ້ວດຳລົງຊີວິດແລະເຕີບໃຫຍ່ໃນສະພາບແວດລ້ອມອັນເປັນປົກກະຕິ,ໄດ້ຟື້ນຟູກຽດສັກສີໃນນາມເປັນມະນຸດ.ຕາມສະຖິຕິ,ແຕ່ປີ1933ຮອດປີ1941,ຊຽງໄຮ້ໄດ້ຮັບເອົາຊາວຢິວອົບພະຍົບປະມານ3ໝື່ນກວ່າຄົນທີ່ມາຈາກເອີລົບ.ແມ່ເຖົ້າຊາລາໂລສ ຊາວຢິວເຊື້ອຊາດຣັດເຊຍທີ່ໄດ້ດຳລົງຊີວິດຢູ່ຊຽງໄຮ້ເປັນເວລາ10ປີໃນໄລຍະສົງຄາມໂລກຄັ້ງທີສອງນັ້ນໄດ້ຍ້ອງຍໍຢ່າງຈິງໃຈຕໍ່ຄົນຈີນທີ່ໂອບອ້ອມອາລີແລະໃຈບຸນ.ແມ່ເຖົ້າຊາລາເວົ້າວ່າ:
"ຂ້ອຍຮຽນໄດ້ຄຸນສົມບັດອັນດີງາມຫຼາຍຢ່າງຈາກຄົນຈີນ,,ຄົນຈີນຖ່ອມຕົວແລະມີມາລະຍາດ,ເຄົາລົບນັບຖືຜູ້ເຖົ້າຜູ້ແກ່ແລະຮັກແພງເດັກນ້ອຍ,ບໍ່ວ່າໄດ້ຮັບການສຶກສາຫຼືບໍ່,ພວກເຂົາເຈົ້າໃຜກໍສຸພາບແລະມີມາລະຍາດ.ຄົນຈີນຖືເພື່ອນມະນຸດສະເໝີພາບກັນໝົດ,ຂ້ອຍບໍ່ເຄີຍຄຶດວ່າໃນໂລກນີ້ຍັງມີບ່ອນໃດອີກທີ່ຊາວຢິວສາມາດດຳລົງຊີວິດຢ່າງເສລີໄດ້ຄືຢູ່ຈີນ."
ແມ່ເຖົ້າຊາລາປີນີ້ອາຍຸ91ປີແລ້ວ,ປີ1916,ເຊື້ອຕະກຸນຂອງເພິ່ນໄດ້ຈາກເຂດຊີເບເລຍຣັດເຊຍທີ່ມີແນວຄິດປັດເຂ່ຍຊາວຢິວຢ່າງໜັກໜ່ວງນັ້ນຍ້າຍໄປຕັ້ງຖິ່ນຖານຢູ່ນະຄອນຮາເອີປິ່ນ ພາກຕາເວັນອອກສຽງເໜືອຂອງຈີນ.ຢູ່ແຫ່ງນັ້ນ,ເພິ່ນໄດ້ຈາກເດັກນ້ອຍທີ່ຫາກໍ່ຮຽນປາກເວົ້າເຕີບໃຫຍ່ມາເປັນນາງສາວທີ່ສວຍງາມ,ແລະຮັກກັນກັບຊາວໜຸ່ມຢິວທີ່ເກີດຂຶ້ນຢູ່ຮ່າເຮີປິ່ນ,ແລ້ວສ້າງຄອບຄົວຮ່ວມກັນ.ພາຍຫຼັງຍີ່ປຸ່ນກໍ່ສົງຄາມຮຸກຮານຈີນແລ້ວ,ເສດຖະກິດຂອງຮ່າເອີປິ່ນຊຸດໂຊມລົງ,ໂຮງງານຫຼົ້ມຈົມ,ຮ້ານຄ້າປິດປະຕູ,ນາງຊາລາທີ່ອາຍຸ25ປີພ້ອມກັບຜົວຕົກລົງໄປຊອກຫາໂອກາດຢູ່ຊຽງໄຮ້ທີ່ອ່າວຈະເລີນຮຸ່ງເຮືອງໃນຄາວນັ້ນ.ຢູ່ຊຽງໄຮ້,ພວກເຂົາເຈົ້າໄດ້ດຳລົງຊີວິດເປັນເວລາ10ປີ.ຈົນຮອດປີ1949,ຈິ່ງກັບຄືນສູ່ອິສຣາແອນ.
ເມື່ອເຂົ້າສູ່ເຮືອນແມ່ເຖົ້າຊາລາທີ່ຢູ່ເຢລູຊາເລມ,ກໍເໝືອນດັ່ງໄດ້ເຂົ້າສູ່ຄອບຄົວດັ້ງເດີມຂອງຊາວຈີນໃນຊຸມປີ30ສະຕະວັດທີແລ້ວ.ຢູ່ຫ້ອງຮັບແຂກໄດ້ວາງໂຕສີ່ຫຼ່ຽມແລະໂຕະນ້ຳຊາທີ່ແກະສະຫຼັກແບບບູຮານຈີນ,ຢູ່ເທິງຝາໄດ້ແຂວນຮູບແຕ້ມນົກຂຽນ,ໂຄມໄຟແບບຈີນຫຼາຍໜ່ວຍໄດ້ຢ່ອນລົງມາຈາກເພດານ,ໃນຕູ້ທີ່ຕັ້ງຢູ່ແຈເຮືອນໄດ້ວາງເຄື່ອງຫັດຖະກຳດັ້ງເດີມຂອງຈີນຊະນິດຕ່າງໆ,ຢູ່ເທິງຝາຂອງລະບຽງຍັງໄດ້ຕິດຮູບຖ່າຍຂອງວ້າຍຖ່ານຂອງຊຽງໄຮ້ເກົ່າ.
ເຖິງວ່າໄດ້ອຳລາຈາກຈີນເກືອບ60ປີແລ້ວກໍຕາມ,ແຕ່ເມື່ອກ່າວເຖິງຈີນ,ແມ່ເຖົ້າຊາລາເຕັມໄປດ້ວຍຄວາມຮັກແພງອັນເລິກເຊິ່ງ:"ຂ້ອຍຮັກປະເທດຈີນຫຼາຍ.ຜົວຂ້ອຍເກີດຢູ່ຈີນ,ລູກຂ້ອຍກໍເກີດຢູ່ຈີນ,ພໍ່ປູ່ແມ່ຍ່າຂອງຂ້ອຍຝັງ ຢູ່ຈີນ.ໄລຍະຢູ່ຈີນນັ້ນແມ່ນໄລຍະອັນດີງາມທີ່ສຸດໃນຕະຫຼອດຊີວິດຂອງຂ້ອຍ.ເຖິງວ່າດຽວນີ້ຂ້ອຍແມ່ນຄົນອິສຣາແອນ,ແຕ່ໃນສ່ວນເລິກຂອງຫົວໃຈ,ຂ້ອຍແມ່ນຄົນຈີນ."
ໃນພິທີສະຫຼອງການສ້າງສຳເລັດຫໍໃໝ່ຂອງຫໍລະລຶກສັງຫານໂຫດທີ່ອິສຣາແອນເມື່ອເດືອນມີນາປີນີ້,ທ່ານອານນານ ເລຂາທິການໃຫຍ່ສະຫະປະຊາຊາດໄດ້ກ່າວວ່າ:ຄວາມຊົງຈຳແມ່ນສ່ວນໜຶ່ງແຫ່ງການສະແຫວງຫາສະຕິປັນຍາຂອງມະນຸດ,ໃນຄວາມຊົງຈຳ,ພວກເຮົາຕ້ອງຊອກຫາແງ່ໃໝ່ມາສັງເກດເບິ່ງຄຸນຄ່າແລະຄວາມໝາຍແຫ່ງການຊົງຕົວຢູ່ຂອງມະນຸດ.ຖ້າວ່ານາຊີສັງຫານຊາວຢິວຢ່າງໂຫດຮ້າຍສາມານນັ້ນໄດ້ເຜີຍໃຫ້ເຫັນດ້ານໜຶ່ງທີ່ຂີ້ຮ້າຍທີ່ແລະມືດມົນທີ່ສຸດຂອງມະນຸດສະຍະພາບ,ຄັນຊັ້ນປະສົບການຂອງຊາວຢິວທີ່ຊຽງໄຮ້ພັດສະແດງໃຫ້ເຫັນວ່າ,ເຖິງວ່າໃນຄວາມມືດມົນອັນກວ້າງໃຫຍ່ໄພສານ,ຍັງຄົງມີມະນຸດສະຍະພາບເປັ່ງລັດສະໝີຢູ່,ເຊິ່ງໄດ້ສະໜອງແວ່ນແຍງອີກດ້ານໜຶ່ງໃຫ້ປະຫວັດ ສາດ.
1 2
|
|
|
