|
ນາງທວງເອົາຄວາມຍຸດຕິທຳເພື່ອຜູ້ຖືກເຄາະຮ້າຍຂອງຈີນ-- ສຳພາດທ່ານນາງວາງສວນ ຫົວໜ້າຄະນະຝ່າຍໂຈດຂອງຊາວຈີນຜູ້ຖືກເຄາະຮ້າຍຈາກສົງຄາມເຊື້ອໂຣກຂອງກອງທະຫານຍີ່ປຸ່ນຜູ້ຮຸກຮານຈີນ(ພາບ)(ສຽງ)
cri
ເດືອນສິງຫາປີ1997,ເມື່ອໄດ້ກະກຽມມາເປັນເວລາ2ປີ,ນາງວາງສວນໄດ້ຕາງໜ້າ ຊາວຈີນຜູ້ຖືກເຄາະຮ້າຍ180ຄົນ ຍ້ອນສົງຄາມເຊື້ອໂຣກຂຶ້ນສານທ້ອງຖິ່ນໂຕກຽວຍີ່ປຸ່ນເປັນຄັ້ງທຳອິດ,ກ້າວຟ້ອງລັດຖະບານຍີ່ປຸ່ນ,ທວງໃຫ້ລັດຖະບານຍີ່ປຸ່ນຂໍຂະມາໂທດແລະໃຊ້ແທນຜູ້ຖືກເຄາະຮ້າຍຂອງຈີນຍ້ອນທາລຸນກຳຂອງກອງທະຫານຍີ່ປຸ່ນຜູ້ຮຸກຮານຈີນໃນສົງຄາມເຊື້ອໂຣກ.ນາງວາງສວນບອກນັກຂ່າວວ່າ,ພວກເຂົາເຈົ້າເຮັດແນວນີ້ກໍແມ່ນເພື່ອເຮັດໃຫ້ປະຫວັດສາດມີຄວາມກະຈ່າງແຈ້ງ.ນາງເວົ້າວ່າ:
"ໂທດກຳທີ່ກໍ່ສົງຄາມເຊື້ອໂຣກແມ່ນໂທດກຳຊົ່ວຮ້າຍທີ່ສຸດ.ຈົນຮອດປັດຈຸບັນ,ລັດຖະບານຍີ່ປຸ່ນກໍບໍ່ໄດ້ຮັບຮອງແລະກໍບໍ່ໄດ້ປະກາດຂໍ້ມູນຂ່າວສານທັງໝົດທີ່ເຂົາຄວນປະກາດ.ໂທດກຳທີ່ຝ່າຝືນມະນຸດສະທຳຢ່າງໜັກໜ່ວງ ນີ້,ຍັງບໍ່ໄດ້ຮັບການແກ້ໄຂໃຫ້ຕົກເທື່ອ,ໃນການພົວພັນລະຫວ່າງຈີນຍີ່ປຸ່ນ,ກໍເໝືອນດັ່ງດາບທີ່ແຂວນຢູ່ເທິງຫົວ,ຄັນຕົກລົງມາ,ກໍຈະພາໃຫ້ເກີດມີຜົນຮ້າຍຢ່າງໜັກໜ່ວງ."
ເມື່ອໄດ້ໄຕ່ສວນໃນສານ20ກວ່າເທື່ອເປັນເວລາ5ປີ,ວັນທີ27ສິງຫາປີ2002,ສານທ້ອງຖິ່ນໂຕກຽວຍີ່ປຸ່ນໄດ້ທຳການຕັດສິນຕໍ່ຄະດີຊາວຈີນຜູ້ຖືກເຄາະຮ້າຍຈາກສົງຄາມເຊື້ອໂຣກຂອງກອງທະຫານຍີ່ປຸ່ນຜູ້ຮຸກຮານຈີນທີ່ກ່າວຫາລັດຖະບານຍີ່ປຸ່ນ,ທວງເອົາຄ່າໃຊ້ແທນ,ຕັດສິນເປັນເທື່ອທຳອິດວ່າກອງທະຫານຍີ່ປຸ່ນຜູ້ຮຸກຮານຈີນເຄີຍກໍ່ສົງຄາມເຊື້ອໂຣກຢູ່ຈີນ,ແລະຮັບຮອງວ່າສົງຄາມເຊື້ອໂຣກໄດ້ສ້າງໄພພິບັດອັນມະຫາສານໃຫ້ແກ່ປະຊາຊົນຈີນ,ແຕ່ໄດ້ປະຕິເສດຄຳຮ້ອງວ່າຄວາມຂອງຝ່າຍໂຈດຈີນທີ່ທວງໃຫ້ລັດຖະບານຍີ່ປຸ່ນຂໍຂະມາໂທດແລະໃຫ້ຄ່າໃຊ້ແທນ.ຄະນະຝ່າຍໂຈດຈີນເລີຍຍື່ນອຸທອນໃນທັນທີ.
ຕັ້ງແຕ່ກ່າວຟ້ອງຢ່າງເປັນທາງການຈົນຮອດປັດຈຸບັນ,ຄະດີກ່າວຟ້ອງເທື່ອນີ້ໄດ້ດຳເນີນເປັນເວລາ8ປີ.ໃນ8ປີດັ່ງກ່າວ,ນາງວາງສວນໄດ້ໄປບ່ອນສ່ວນຫຼາຍຂອງຈີນດ້ວຍທຶນຕົນເອງ,ແລະໄດ້ໄປກັບລະຫວ່າງຈີນຍີ່ປຸນຢ່າງເນື່ອງນິດ,ຊອກຫາຫຼັກຖານຢ່າງເອົາຈິງເອົາຈັງ.ນາງຍັງໄດ້ໃຊ້ຮູບການຊະນິດຕ່າງໆເຊັ່ນກ່າວປາຖະກະຖາ,ຈັດງານສົນທະນາເປັນຕົ້ນ,ເຜີຍແບໂທດກຳຂອງກອງທະຫານຍີ່ປຸ່ນຜູ້ຮຸກຮານຈີນທີ່ກໍ່ສົງຄາມເຊື້ອໂຣກນັ້ນຢ່າງເຂັ້ມງວດຕັ້ງຫຼາຍເທື່ອ.
ຈິດໃຈຂອງນາງວາງສວນທີ່ສະແຫວງຫາຄວາມເປັນທຳຢ່າງບໍ່ລົດລະໄດ້ພາໃຫ້ຊາວຈີນຈົນກະທັ້ງຊາວໂລກຕື້ນຕັນໃຈ.ນາງຢາງຟານ ນັກສຶກສາຂອງວິທະຍາໄລວິຊານັກຂ່າວຂອງມະຫາວິທະຍາໄລນານກິ່ງບອກນັກຂ່າວວ່າ,ນາງເຄີຍຟັງປະຖະກະຖາຂອງນາງວາງສວນ,ນາງເຫັນວ່າ,ນາງວາງສວນເປັນຜູ້ປົກປ້ອງຄຸນຄ່າແລະກຽດສັກສີຂອງຊີວິດມະນຸດ.ນາງຢາງຟານເວົ້າວ່າ:
"ຂ້ອຍຄິດວ່ານາງວາງສວນເປັນແມ່ຍິງຜູ້ໜຶ່ງທີ່ເປັນໜ້າເຄົາລົບນັບຖື,ໃນຫຼາຍປີມານີ້,ນາງໄດ້ຊ່ອຍຊາວຈີນຜູ້ຖືກເຄາະຮ້າຍຈາກສົງຄາມເຊື້ອໂຣກຮ້ອງຟ້ອງລັດຖະບານຍີ່ປຸ່ນ,ນີ້ຕ້ອງການຄວາມກ້າຫານ,ທັງຕ້ອງການຈິດໃຈສະແຫວງຫາຄວາມເປັນທຳຢ່າງບໍ່ລົດລະ.ໃນການວ່າຄວາມທີ່ຍືດເຍືອມາເປັນເວລາຍາວນານເທື່ອນີ້,ນອກຈາກຕ້ອງປົກປ້ອງສິດແລະຜົນປະໂຫຍດຊອບກົດໝາຍຂອງຊາວຈີນຜູ້ຖືກເຄາະຮ້າຍແລະກຽດສັກສີແຫ່ງຊີວິດຂອງພວກເຂົາເຈົ້າແລ້ວ,ໃນທີ່ສຸດຍັງໄດ້ເຮັດໃຫ້ຍີ່ປຸ່ນຮັບຮູ້ວ່າການຊົງຕົວຢູ່ຂອງປະຫວັດສາດຕອນນັ້ນ."
ວັນທີ19ກໍລະກົດປີນີ້,ຊາວຈີນຜູ້ຖືກເຄາະຮ້າຍຍ້ອນສົງຄາມເຊື້ອໂຣກລວມ180ຄົນໄດ້ກ່າວຟ້ອງລັດຖະບານຍີ່ປຸ່ນທີ່ກໍ່ສົງຄາມເຊື້ອໂຣກ,ນີ້ໄດ້ພາໃຫ້ຊາວໂລກເອົາໃຈໃສ່ນຳອີກ.ມື້ນັ້ນ,ສານຊັ້ນສູງໂຕກຽວຍີ່ປຸ່ນໄດ້ຕັດສິນວ່າ,ຊາວຈີນຜູ້ຖືກເຄາະຮ້າຍຍ້ອນສົງຄາມເຊື້ອໂຣກຂອງກອງທະຫານຍີ່ປຸ່ນຜູ້ຮຸກຮານຈີນນັ້ນຖືກປະລາໄຊໃນການຕັດສິນຂັ້ນສອງຂອງຄະດີວ່າຄວາມ.ນາງວາງສວນບອກນັກຂ່າວວ່າ,ນາງຈະຕາງໜ້າຊາວຈີນຜູ້ຖືກເຄາະຮ້າຍຍ້ອນສົງຄາມເຊື້ອໂຣກຍື່ນອຸທອນຕໍ່ສານສູງສຸດຍີ່ປຸ່ນ.ນາງເວົ້າວ່າ,ນາງບໍ່ຫ່ອນຊິປະລະພາລະກິດນີ້,ນາງຈະເຮັດວຽກນີ້ຕະຫຼອດໄປ.ຖ້າວ່າໂທດສົງຄາມຂອງກອງທະຫານຍີ່ປຸ່ນທີ່ກໍ່ສົງຄາມເຊື້ອໂຣກບໍ່ຖືກລົງໂທດເທົ່າທີ່ຄວນ,ນີ້ຈະກາຍເປັນເລື່ອງອັບອາຍຂາຍໜ້າແຫ່ງອາລະຍະທຳມະນຸດຈົນເທົ່າໃດໆ.
1 2
|
|
