|
ຊົມເຊີຍທ່ານຮັບຟັງລາຍການນັດພົບໃນວັນອາທິດ.ມື້ນີ້,ຂ້າພະເຈົ້າຈະຈັດເພງປະມວນໜຶ່ງທີ່ຂັບຮ້ອງໂດຍທ່ານຫຼີຊ່ວງຈ່ຽງ ນັກຮ້ອງທີ່ມີຊື່ສຽງຂອງຈີນສູ່ຟັງ.
ເພື່ອນມິດຜູ້ຟັງ,ທີ່ທ່ານພວມຟັງຢູ່ນີ້ແມ່ນເພງ "ບ້ານເກີດທີສອງຂອງນັກລົບ" ທີ່ຂັບຮ້ອງໂດຍທ່ານຫຼີຊ່ວງຈ່ຽງ.ເພງນີ້ໄດ້ບັນລະຍາຍນັກລົບຂອງທະຫານປ້ອງກັນຊາຍແດນຢູ່ປ້ອມດ່ານໜ້າເກາະທະເລ,ພວກເຂົາເຈົ້າຖືເກາະທະເລເປັນບ້ານເກີດເມືອງນອນແຫ່ງທີສອງຂອງຕົນ.ພວກເຂົາເຈົ້າບໍ່ຢ້ານຄວາມຫຍຸ້ງຍາກລຳບາກ, ປູກຕົ້ນສົນແລະຕັ້ງຄ້າຍຢູ່ເທິງເກາະທະເລ,ເຮັດໃຫ້ເກາະນ້ອຍທີ່ເຮື້ອຮ້າງປ່ຽນໂສມໜ້າໃໝ່.ໃນເພງນີ້ມີເນື້ອຮ້ອງວ່າ,ເມກໝອກເລື່ອນລອຍຢູ່ເທິງພູ,ນ້ຳທະເລອ້ອມຫາດຊາຍ,ໃຜໆກໍວ່າເກາະເຮົານ້ອຍ,ຕັ້ງຢູ່ປ້ອມດ່ານໜ້າ ໄກຈາກແຜ່ນດິນໃຫຍ່.ປະເທດຊາດທີ່ແສນຮັກ,ເຈົ້າຮູ້ໃຈຂອງນັກລົບບໍ່,ແຫ່ງນີ້ແມ່ນບ່ອນທີ່ພວກເຮົາຍິນດີປ້ອງກັນທີ່ສຸດ,ແຫ່ງນີ້ແມ່ນບ້ານເກີດເມືອງນອນທີສອງຂອງພວກເຮົາ.
ທ່ານຫຼີຊ່ວງຈ່ຽງເກີດຢູ່ເມືອງຮ່າເອີປິ່ນ ພາກຕາເວັນອອກສຽງເໜືອຂອງຈີນໃນປີ 1939,ເພິ່ນມັກດົນຕີມາແຕ່ນ້ອຍ.ປີ1959,ທ່ານຫຼີຊ່ວງຈ່ຽງໄດ້ເສັງເຂົ້າຂະແໜງວິຊາຮ້ອງເພງຂອງສະຖາບັນດົນຕີສູນກາງຈີນ,ພາຍຫຼັງຮຽນຈົບແລ້ວ,ເພິ່ນຖືກຈັດໄປເຮັດວຽກຢູ່ຄະນະສິລະປະກອນເຂດທະຫານຊິນຈຽງ,ພາຍຫຼັງໄດ້ຖືກສັບຊ້ອນໃຫ້ໄປເຮັດວຽກຢູ່ຄະນະສິລະປະກອນກອງການເມືອງໃຫຍ່ຂອງກອງທັບປົດປ່ອຍປະຊາຊົນຈີນ.ປະຈຸບັນນີ້,ທ່ານຫຼີຊ່ວງຈ່ຽງແມ່ນຫົວໜ້າຂອງຂະແໜງວິຊາຮ້ອງເພງຂອງສະຖາບັນສິລະປະກອງທັບປົດປ່ອຍປະຊາຊົນຈີນ.
ສຽງເພງຂອງທ່ານຫຼີຊ່ວງຈ່ຽງເຕັມໄປດ້ວຍຄວາມກະຕືລືລົ້ນ,ມ່ວນສະຫງ່າ.ຕໍ່ໄປເຊີນຟັງເພງ "ລາຕີທົ່ງຫຍ້າ"ທີ່ຂັບຮ້ອງໂດຍທ່ານຫຼີຊ່ວງຈ່ຽງ,ເພງນີ້ແມ່ນເພງສະ ຫຼັບໃນຮູບເງົາເລື່ອງທົ່ງພຽງສີຂຽວ.ເພງນີ້ໄດ້ນິຍົມກັນຮ້ອງໃນທົ່ວປະເທດຈີນເມື່ອຊຸມປີ50,60ສະຕະວັດແລ້ວນີ້.ເພງນີ້ທຳນອງອ່ອນໂຍນ,ມີບັນຍາກາດງຽບສະຫງັດກວ້າງຂວາງກວງໄກ,ໄດ້ສະແດງອາລົມຈິດໃຈຂອງນັກລົບທີ່ບຸກເບີກເຂດຊາຍແດນຄິດເຖິງນາງສາວຜູ້ຢູ່ແດນໄກ.
ເນື້ອເພງມີຄວາມໝາຍວ່າ,ທົ່ງຫຍ້າສວຍງາມງຽບສະຫງັດ,ຍິນແຕ່ສຽງຊໍຂອງຂ້ອຍ,ຂ້ອຍຢາກຂຽນຈົດໝາຍໃຫ້ນາງສາວຢູ່ແດນໄກ,ແຕ່ເສຍດາຍບໍ່ມີຜູ້ສົ່ງຈົດໝາຍ.
1 2
|
