|
|
 |
| (GMT+08:00)
2005-09-13 19:51:08
|
 |
|
ຊາວໜຸ່ມອາສາສະໝັກຂອງຈີນຢູ່ລາວ (3)(ສຽງ)
cri
Author: zhangshuo
|
ລາວໃນດວງໃຈຂອງຂ້ອຍ
ທີ່ນີ້ວິທະຍຸສາກົນແຫ່ງປະເທດຈີນ,ສະບາຍດີທ່ານຜູ້ຟັງທີ່ໂຄລົບ,ດີໃຈຫຼາຍທີ່ໄດ້ພົບກັບທ່ານໃນລາຍການເພື່ອນມິດຜູ້ຟັງ.ໃນລາຍການມື້ນີ້,ຂໍເຊີນທ່ານສືບຕໍ່ຮັບຟັງລາຍການສຳພາດຄະນະຊາວໜຸ່ມອາສາສະໝັກຊຽງໄຮ້ຂອງຈີນທີ່ໄປຮັບໃຊ້ຢູ່ລາວງວດທີສີ່,ມື້ນີ້ທ່ານຈະໄດ້ຮັບຟັງພາກທີສາມຂອງລາຍການສຳພາດດັ່ງກ່າວທີ່ພາດຫົວເລື່ອງວ່າ:ລາວໃນດວງໃຈຂອງຂ້ອຍ.ລາວ-ປະເທດທີ່ເຊື່ອຖືສາສະໜາພຸດແລະມີຊາຍແດນຕິດກັບຈີນ ເຊິ່ງມີແຕ່ເຄີຍຮູ້ຈາກປື້ມຮຽນພູມສາດຢູ່ໂຮງຮຽນມັດທະຍົມຊັ້ນຕົ້ນນັ້ນໄດ້ຄ່ອຍໆເຜີຍໂສມໜ້າອັນເລິກລັບຢູ່ຕໍ່ໜ້າຊາວໜຸ່ມອາສາສະໝັກຈີນ11ຄົນ,ແລະຍ່ອມຈະຈາລຶກພາບພົດທີ່ລືມຍາກໄວ້ໃນດວງໃຈຂອງຊາວໜຸ່ມເຫຼົ່ານີ້ແລະສົ່ງຜົນກະທົບເຖິງອານາຄົດຂອງພວກເຂົາເຈົ້າດ້ວຍຄວາມສວຍງາມ ຄວາມສະຫງົບສຸກແລະປະຊາຊົນທີ່ກະຕືລືລົ້ນແລະມີໄມຕີຈິດອັນອົບອຸ່ນ.
ຊາວໜຸ່ມອາສາສະໝັກຈີນສະເຫຼີມສະຫຼອງບຸນປີໃໝ່ຢູ່ລາວ
ນາງຊຸ່ນລີ້ ຜູ້ທີ່ມາຈາກມະຫາວິທະຍາໄລສ້າງຄູຊຽງໄຮ້ແລະເປັນຄູສອນພາສາອັງກິດຢູ່ໂຮງຮຽນຄະນະຊາວໜຸ່ມສູນກາງລາວບອກນັກຂ່າວວ່າ: "ແຕ່ກ່ອນບໍ່ຮູ້ຫຍັງກ່ຽວກັບປະເທດລາວ,ມີແຕ່ເຄີຍເຫັນໃນແຜນທີ່,ເມື່ອມາລາວແລ້ວ,ຮູ້ສຶກວ່າຮີດຄອງປະເພນີຢູ່ແຫ່ງນີ້ດີຫຼາຍ,ຄົນແຫ່ງນີ້ກໍເໝືອນດັ່ງອາກາດຢູ່ແຫ່ງນີ້,ກະຕືລືລົ້ນຫຼາຍແລະເຂົ້າກັນງ່າຍ ບໍ່ມັກໃຈຮ້າຍ.ປະຊາຊົນລາວມີໄມຕີຈິດແລະມີມາລະຍາດທີ່ສຸດ,ທັງໝົດເຫຼົ່ານີ້ໜ້າເຮັດໃຫ້ພວກເຮົາຮຽນນຳ."
ເມື່ອເວົ້າເຖິງພາບພົດທີ່ເລິກເຊິ່ງກວ່າໝູ່ຕໍ່ລາວ,ທ່ານເຊິນເລີ້ເວົ້າວ່າ:"ວັນທີ7ທັນວາປີ 2004,ຂ້ອຍໄດ້ຂຶ້ນຫ້ອງເທື່ອທຳອິດຢູ່ລາວ,ແຕ່ມື້ນັ້ນເປັນຕົ້ນມາ,ນັກຮຽນລາວໝົດທຸກຄົນ ກໍໄດ້ສ້າງພາບພົດອັນເລິກເຊິ່ງໄວ້ໃຫ້ຂ້ອຍ,ນັ້ນກໍຄືຄວາມດຸໝັ່ນແລະຂະຫຍັນ.ພາຍຫຼັງຊົ່ວໂມງສອນຊົ່ວໂມງທຳອິດແລ້ວ,ຂ້ອຍໄດ້ກວດເບິ່ງປື້ມຈົດຂອງນັກຮຽນທັງໝົດ,ພວກເຂົາເຈົ້າລ້ວນແຕ່ໄດ້ຈົດໄວ້ຢ່າງຕັ້ງອົກຕັ້ງໃຈທີ່ສຸດ.ພວກເຂົາເຈົ້າສ່ວນຫຼາຍມີຄວາມຊິນເຄີຍຕ່າງກັນກັບຄົນຈີນ,ມັກໃຊ້ມືຊ້າຍຂຽນໜັງສື,ແລະມີບາງຄົນຍັງຂຽນຕົວໜັງສືຈີນບໍ່ເປັນຈຶ່ງຈຳເປັນຕ້ອງຈົດເນື້ອໃນທີ່ຂ້ອຍສອນນັ້ນຂຽນເປັນຂີດໜຶ່ງໆຄືກັນກັບການຄວັດຕົວໜັງສືຢູ່ເທິງຫີນ.ພາຍຫຼັງຊົ່ວໂມງສອນເທື່ອທຳອິດແລ້ວ,ຂ້ອຍປະກົດເຫັນວ່າ,ນັກຮຽນ20ກວ່າຄົນຜູ້ໃດກໍຕັ້ງອົກຕັ້ງໃຈທີ່ສຸດ,ນີ້ໄດ້ເຮັດໃຫ້ຂ້ອຍກະຕຸ້ນໃຈທີ່ສຸດ."
ນາງຝ່າງໝີນໄດ້ມາລາວເທື່ອທີສອງແລ້ວເຊິ່ງຕ່າງກັນກັບຊາວໜຸ່ມອາສາສະໝັກ10ຄົນອື່ນ.ນາງເຄີຍມາລາວເທື່ອທຳອິດໃນວັນທີ1ມັງກອນປີ2004,ໃນນາມເປັນນັກຂ່າວທີ່ມາສຳພາດຊາວໜຸ່ມອາສາສະໝັກຊຽງໄຮ້ຈີນທີ່ໄປຮັບໃຊ້ຢູ່ລາວງວດທີສາມ."ເມື່ອຂ້ອຍມາລາວເທື່ອທຳອິດ,ລາວກໍໄດ້ສ້າງພາບພົດອັນເລິກເຊິ່ງທີ່ສຸດໄວ້ໃຫ້ຂ້ອຍແລ້ວ,ຄວາມຮູ້ສຶກທີ່ສະຫງົບສຸກແລະງຽບສະຫງັດໄດ້ກະທົບດວງໃຈທີ່ຮ້ອນຮົນຂອງຂ້ອຍໃນຄາວນັ້ນຢ່າງເລິກເຊິ່ງ.ສະນັ້ນ,ເຖິງວ່າຂ້ອຍໄດ້ມາລາວພຽງອາທິດໜຶ່ງ,ແຕ່ຂ້ອຍກໍໄດ້ຕົກລົງວ່າ,ຂ້ອຍຈະຕ້ອງສະໝັກຊື່ເຂົ້າຮ່ວມຄະນະຊາວໜຸ່ມອາສາສະໝັກງວດໜ້າ."
1 2
|
|
|
