|
ຕອນຄ່ຳວັນທີ 19 ກັນຍາ ລັດຖະບານອິນໂດເນເຊຍປະກາດວ່າ,ການແຜ່ລະບາດຂອງພະຍາດໄຂ້ຫວັດສັດປີກໄດ້ເຮັດໃຫ້ທົ່ວປະເທດຕົກຢູ່ໃນສະພາບສຸກເສີນ.ອີງຕາມຄຳສັ່ງຂອງທ່ານປະທານາທິບໍດີຊູຊີໂລ,ກະຊວງສາທາລະນະສຸກແລະກະຊວງກະສິກຳອິນໂດເນເຊຍໄດ້ປະກາດຄຳເຕືອນສະກັດກັ້ນພະຍາດໄຂ້ຫວັດສັດປີກແຜ່ລະບາດຢູ່ທົ່ວປະເທດ,ແລະໄດ້ປະກາດໃຊ້ມາດຕະການສຸກເສີນຫຼາຍສະບັບ.
ພາຍຫຼັງປະກາດອິນໂດເນເຊຍຢູ່ໃນສະພາບສຸກເສີນຍ້ອນພະຍາດໄຂ້ຫວັດສັດປີກແລ້ວ, ກະຊວງສາທາລະນະສຸກອິນໂດເນເຊຍຮຽກຮ້ອງຜູ້ລ້ຽງສັດໃນທົ່ວປະເທດຄວນເຮັດຕາມເງື່ອນໄຂສາທາລະນະສຸກ,ສັກວັກແຊງໃຫ້ສັດປີກລ້ຽງ,ຂ້າສັດປີກລ້ຽງທີ່ຕິດພະຍາດ.ພ້ອມກັນນັ້ນ ກະຊວງສາທາລະນະສຸກຍັງຕົກລົງເອົາໂຮງໝໍ 44 ແຫ່ງເປັນໂຮງໝໍຮັບປົວພະຍາດໄຂ້ຫວັດສັດປີກ, ມີ 8 ແຫ່ງເປັນອົງການຊຳລະເຊື້ອພະຍາດໄຂ້ຫວັດສັດປີກໂດຍສະເພາະ.ລັດຖະບານຍັງກັກກັນເຂດຕິດພະຍາດໄຂ້ຫວັດສັດປີກ,ຕິດຕາມກວດກາເຂດທີ່ຕິດພະຍາດງ່າຍ,ຮຽກຮ້ອງປວງຊົນເອົາໃຈໃສ່ນຳອະນາໄມ,ລ້າງສະຖານທີ່ລ້ຽງສັດປີກເລື້ອຍໆ,ອົງການປົກຄອງທ້ອງຖິ່ນຕ່າງໆຕ້ອງອອກແຮງສຸດຂີດ ປ້ອງກັນແລະປົວພະຍາດໄຂ້ຫວັດສັດປີກຢ່າງຕໍ່ເນື່ອງ.
ເມື່ອທ້າຍປີ 2003,ໃນ 33 ແຂວງຂອງອິນໂດເນເຊຍ ມີ 21 ແຂວງໄດ້ເກີດພະຍາດໄຂ້ຫວັດສັດປີກເປັນລຳດັບ,ສັດປີກລ້ຽງຫຼາຍລ້ານໂຕຖືກຖິ້ມ.ໃນເດືອນກໍລະກົດປີນີ້,ຢູ່ເຂດເມນເຕັງພາກໃຕ້ນະຄອນຫຼວງຢາກາກຕາໄດ້ມີພໍ່ກັບລູກສາວລວມ 3 ຄົນໄດ້ຕິດພະຍາດໄຂ້ຫວັດສັດປີກ,ແລະຕາຍເປັນລຳດັບ.ໃນຕົ້ນເດືອນກັນຍາ,ຢູ່ຢາກາກຕາໄດ້ມີແມ່ຍິງອາຍຸ 37 ປີຜູ້ໜຶ່ງຕາຍຍ້ອນພະຍາດໄຂ້ຫວັດສັດປີກ.ຖັດມາ ມີຫຼາຍຄົນເຂົ້າໂຮງໝໍຍ້ອນມີອາການເຈັບຂອງພະຍາດໄຂ້ຫວັດສັດປີກ.ວັນທີ 21 ກັນຍາ ມີເດັກນ້ອຍສອງຄົນທີ່ຖືກສົງໄສເປັນພະຍາດໄຂ້ຫວັດສັດປີກຕາຍເປັນລຳດັບ,ແຕ່ຈົນຮອດດຽວນີ້ຍັງບໍ່ຮູ້ແຈ້ງວ່າ ສອງຄົນນີ້ເປັນພະຍາດໄຂ້ຫວັດສັດປີກແທ້ບໍ່.ນັບມາຮອດຕອນທ່ຽງວັນທີ 22 ກັນຍາ,ຜູ້ທີ່ຖືກສົງໄສເປັນພະຍາດໄຂ້ຫວັດສັດປີກຢູ່ໂຮງໝໍທົ່ວປະເທດອິນໂດເນເຊຍໄດ້ບັນລຸ 17 ຄົນແລ້ວ.
1 2
|
