|
|
 |
| (GMT+08:00)
2005-09-29 22:25:49
|
 |
|
ລັດຖະບານອິນໂດເນເຊຍໃຊ້ມາດຕະການຄວບຄຸມການແຜ່ລະບາດພະຍາດໄຂ້ຫວັດສັດປີກ(ສຽງ)
cri
ເທື່ອນີ້, ຜູ້ເປັນພະຍາດໄຂ້ຫວັດສັດປີກສ່ວນຫຼາຍແມ່ນເດັກນ້ອຍ.ໃນເດືອນກໍລະກົດ ຄົນຕາຍ 3 ຄົນນັ້ນ ມີ 2 ຄົນແມ່ນເດັກນ້ອຍ,ສ່ວນຄົນຕາຍ 2 ຄົນໃນຫວ່າງມໍ່ໆນີ້ແມ່ນເດັກນ້ອຍອາຍຸພຽງແຕ່ 5 ຂວບ.ນອກນີ້,ຜູ້ທີ່ຖືກສົງໄສເປັນພະຍາດໄຂ້ຫວັດສັດປີກນັ້ນ ສ່ວນຫຼາຍໄດ້ສຳຜັດກັບສັດປີກລ້ຽງ,ເຊັ່ນ ພາຍຫຼັງໄດ້ຮູ້ໃນສວນສັດຢາກາກຕາມີນົກ 19 ໂຕເປັນພະຍາດໄຂ້ຫວັດສັດປີກແລ້ວ,ຜູ້ເຮັດວຽກງານຢູ່ສວນນີ້ສ່ວນໜຶ່ງກໍປະກົດມີອາການເຈັບຂອງພະຍາດໄຂ້ຫວັດສັດປີກ.ຜູ້ເຖົ້າຜູ້ແກ່ທີ່ມັກລ້ຽງໄກ່ລ້ຽງເປັດກໍເປັນພະຍາດໄຂ້ຫວັດສັດປີກງ່າຍ.
ໂດຍແນໃສ່ສະພາບດັ່ງກ່າວ,ລັດຖະບານອິນໂດເນເຊຍໄດ້ປິດສວນສັດຢາກາກຕາໃນທັນທີແລະກັກກັບຜູ້ທີ່ອາດຈະຕິດເຊື້ອພະຍາດ,ສັກວັກແຊງແກ່ຜູ້ທີ່ເຄີຍສຳຜັດກັບສັດປີກເປັນພະຍາດ,ຈ່າຍຢາແມັດປ້ອງກັນເຊື້ອພະຍາດ.ວັນທີ 22 ກັນຍາ ທ່ານນາງຟາດີລາຊູປາຣີລັດຖະມົນຕີກະຊວງສາທາລະນະສຸກອິນໂດເນເຊຍເວົ້າວ່າ,ອີງຕາມຜົນການຄົ້ນຄວ້າຂອງມະຫາວິທະຍາໄລໂຈເກຍກາຕາ,ໜູແລະແມງວັນອາດຈະແມ່ນຕົວການທີ່ແຜ່ຜາຍເຊື້ອພະຍາດໄຂ້ຫວັດສັດປີກ.ສະນັ້ນ ທ່ານນາງຮຽກຮ້ອງປວງຊົນດັບສູນໜູແລະແມງວັນ,ຊຳລະຂີ້ສັດປີກລ້ຽງໃຫ້ໝົດ.ພ້ອມກັນນັ້ນ ກະຊວງກະສິກຳປະກາດວ່າ,ຈະຈັດການເຄື່ອນໄຫວເປັນໝູ່ຄະນະຕໍ່ຟາມລ້ຽງສັດປີກ 1 ສ່ວນ 5 ທີ່ຕິດເຊື້ອພະຍາດໄຂ້ຫວັດສັດປີກ.ກະຊວງກະສິກຳຍັງສະເໜີວ່າ,ຕໍ່ໄປພາຍໜ້າ ຟາມລ້ຽງສັດປີກຄວນສ້າງຢູ່ບ່ອນໄກຈາກບ້ານປະຊາຊົນ,ແລະຍ້າຍຟາມລ້ຽງສັດປີກຢູ່ເຂດປະຊາຊົນໄປຢູ່ເຂດຊານເມືອງທັງໝົດ.
ການແຜ່ລະບາດຂອງພະຍາດໄຂ້ຫວັດສັດປີກໄດ້ເຮັດໃຫ້ປວງຊົນທ້ອງຖິ່ນນັ້ນຕົກຢູ່ໃນສະພາບວິຕົກກັງວົນ,ແຕ່ພາຍໃຕ້ການໂຄສະນາຊີ້ນຳຂອງລັດຖະບານ,ຄົນສ່ວນຫຼາຍມີອາລົມໃຈປົກກະຕິ,ແຕ່ໃນຕະຫຼາດຍັງເຄັ່ງຕຶງຢູ່.ຕາມຂ່າວແຈ້ງວ່າ,ຫວ່າງມໍ່ໆນີ້ ຈຳນວນຂາຍຊີ້ນໄກ່ຢູ່ຕະຫຼາດຢາກາກຕາໄດ້ຫຼຸດລົງ 40% - 70%,ໄຂ່ໄກ່ກໍຫຼຸດລົງປະມານ 30%.ນອກນີ້ ແຂກໄປທ່ຽວສວນສາທາລະນະ ໂດຍສະເພາະແມ່ນສວນສັດປີກມີທ່ວງທ່າຫຼຸດລົງ,ເຊັ່ນສວນສັດປີກຢູ່ເກາະບາລີ ເຊິ່ງເປັນສະຖານທີ່ທ່ອງທ່ຽວທີ່ມີຊື່ສຽງ ແຂກທ່ອງທ່ຽວໄດ້ຫຼຸດລົງ 25%.
ໃນຂະນະທີ່ກ່າວເຕືອນປວງຊົນຍົກສູງສະຕິລະວັງຕົວແລະປ້ອງກັນບໍ່ໃຫ້ເຊື້ອພະຍາດໄຂ້ຫວັດສັດປີກແຜ່ລະບາດຕື່ມອີກ,ລັດຖະບານອິນໂດເນເຊຍຍັງຮຽກຮ້ອງຫຼາຍຄັ້ງໃຫ້ໄທເມືອງຢ່າຢ້ານກົວກະວົນກະວາຍ.ທ່ານປະທານາທິບໍດີຊູຊີໂລຈັດກອງປະຊຸມລັດຖະບານຄົ້ນຄວ້າວິທີປະຕິບັດຕໍ່,ທັງກ່າວວ່າຈະໃຊ້ມາດຕະການດ້ານຍຸດທະສາດ ສະກັດກັ້ນບໍ່ໃຫ້ພະຍາດໄຂ້ຫວັດສັດປີກແຜ່ລະບາດ.ວັນທີ 22 ກັນຍາ ທ່ານປີເຕີເຊີນ ຜູ້ແທນອົງການອະນາໄມໂລກປະຈຳອິນໂດເນເຊຍເວົ້າວ່າ,ຜູ້ເປັນພະຍາດເພີ່ມຂຶ້ນ ບໍ່ໝາຍຄວາມວ່າ ສະພາບໃນປະຈຸບັນຈະຊຸດຮ້າຍລົງ,ດຽວນີ້ ກໍຍັງບໍ່ມີຫຼັກຖານຢັ້ງຢືນໃຫ້ເຫັນວ່າພະຍາດໄຂ້ຫວັດສັດປີກຈະກາຍເປັນພະຍາດລະບາດຢູ່ລະຫວ່າງມະນຸດເຮົາ.ແຕ່ທ່ານເຫັນວ່າ,ຖ້າວ່າຄົນປົກກະຕິສຳຜັດກັບຜູ້ເປັນພະຍາດໄຂ້ຫວັດສັດປີກຢ່າງໄກ້ຊິດ,ກໍມີຄວາມເປັນໄປໄດ້ຈະຕິດເຊື້ອພະຍາດ.
1 2
|
|
|
