|
ງານເອັກສໂປຈີນ-ອາຊຽນຄັ້ງທີສອງຈະຈັດຂຶ້ນຢູ່ນະຄອນນານນິງເມືອງເອກເຂດກວາງຊີເຜົ່າຈ້ວງປົກຄອງຕົນເອງຂອງຈີນແຕ່ວັນທີ19ຫາວັນທີ22ຕຸລາ. ງານເອັກສໂປຈີນ-ອາຊຽນໄດ້ກາຍເປັນແທ່ນທີ່ໄດ້ຮັບຜົນດີໃນການຮ່ວມມືເສດຖະກິດລະຫວ່າງພາກພື້ນ.
ເຂດການຄ້າເສລີຈີນ-ອາຊຽນທີ່ພວມກໍ່ສ້າງຢູ່ນັ້ນຈະກາຍເປັນເຂດການຄ້າເສລີທີ່ໃຫຍ່ກວ່າໝູ່ໃນອາຊີແລະໃຫຍ່ທີສາມໃນໂລກ.ການຈັດງານເອັກສໂປຈີນ-ອາຊຽນແມ່ນການເຄື່ອນໄຫວຕົວຈິງລາຍໜຶ່ງຂອງລັດຖະບານຈີນແລະ10ປະເທດອາຊຽນເພື່ອຊຸກຍູ້ການຮ່ວມມືກັນດ້ານເສດຖະກິດການຄ້າ,ເລັ່ງລັດການກໍ່ສ້າງເຂດການຄ້າເສລີຈີນ-ອາຊຽນ.ທ່ານເຈີ້ງຈິນຈ້ຽນ ຮອງເຈົ້າຄອງນະຄອນນານນິງເຂດກວາງຊີ ເມືອງເຈົ້າພາບຈັດງານເອັກສໂປບອກນັກຂ່າວວ່າ:
"ງານເອັກສໂປຈີນ-ອາຊຽນເປັນແທ່ນສຳຄັນສຳລັບຈີນອາຊຽນຮ່ວມມືດ້ານເສດຖະກິດການຄ້າ,ແມ່ນເຄື່ອງເລັ່ງການຮ່ວມມື ດ້ານເສດຖະກິດການຄ້າລະຫວ່າງສອງຝ່າຍ.ຄຽງຄູ່ກັບການສ້າງສາເຂດການຄ້າເສລີຈີນ-ອາຊຽນໄດ້ເລັ່ງລັດໄວເຂົ້າ, ຜ່ານຈາກງານເອັກສໂປ, ວົງການວິສາຫະກິດສອງຝ່າຍຈະໄດ້ຮັບໂອກາດເຂົ້າສູ່ຕະຫຼາດຝ່າຍກົງກັນຂ້າມຫຼາຍກວ່າເກົ່າ,ແລະໄດ້ຄວາມສະດວກຫຼາຍກວ່າເກົ່າໃນດ້ານການຄ້າເສລີແລະການລົງທຶນ."
ຕາມຂໍ້ມູນຂອງຄະນະມົນຕີຈີນ-ອາຊຽນສະແດງໃຫ້ເຫັນວ່າ,ແຕ່ຈີນອາຊຽນເລີ່ມສ້າງເຂດການຄ້າເສລີເມື່ອປີ2002ມານີ້,ພາຍໃນເວລາພຽງ2ປີເທົ່ານັ້ນ,ມູນຄ່າການຄ້າສອງຝ່າຍກໍໄດ້ເພີ່ມຂຶ້ນ50ຕື້ໂດລາ.ແຕ່ເດືອນມັງກອນຮອດເດືອນມິຖຸນາປີນີ້,ມູນຄ່າການຄ້າສອງຝ່າຍຈີນອາຊຽນໄດ້ເພີ່ມຂຶ້ນ25%,ອາຊຽນໄດ້ກ້າວກະໂດດຂຶ້ນເປັນໝູ່ຄູ່ການຄ້າໃຫຍ່ທີສີ່ຂອງຈີນ.
ເພື່ອເລັ່ງລັດ ສ້າງເຂດການຄ້າເສລີຈີນ-ອາຊຽນ,ເລີ່ມແຕ່ວັນທີ20ກໍລະກົດປີນີ້ເປັນຕົ້ນມາ,ຈີນແລະອາຊຽນໄດ້ປະຕິບັດແຜນການຫຼຸດພາສີຢູ່ເຂດການຄ້າເສລີ, ໄດ້ຫຼຸດພາສີຜະລິດຕະພັນ7ພັນຊະນິດຂອງສອງຝ່າຍຢ່າງຫຼວງຫຼາຍ.ການປະຕິບັດແຜນການດັ່ງກ່າວໄດ້ເຮັດໃຫ້ການຄ້າລະຫວ່າງຈີນອາຊຽນດຳເນີນໄປສະດວກກວ່າເກົ່າ.
ທ່ານຟູຈື້ອິ່ງ ຜູ້ຊ່ອຍລັດຖະມົນຕີກະຊວງການຄ້າຈີນກ່າວວ່າ:"ແຜນການຫຼຸດພາສີຢູ່ເຂດການຄ້າເສລີຈີນ-ອາຊຽນເປັນຂີດໝາຍສະແດງໃຫ້ເຫັນວ່າ,ການກໍ່ສ້າງເຂດການຄ້າເສລີຈີນ-ອາຊຽນໄດ້ກ້າວເຂົ້າສູ່ໄລຍະປະຕິບັດຕົວຈິງຢ່າງຮອບດ້ານແລ້ວ."
1 2
|
