|
ສູນເຄື່ອນໄຫວສຸກເສີນຂອງນະຄອນນານນິງເຂດກວາງຊີທີ່ໃຫ້ການບໍລິການກອບກູ້ຊ່ອຍເຫຼືອດ່ວນແກ່ໄທເມືອງນານນິງເຂດກວາງຊີ,ທັງຮັບປະກັນຄວາມປອດໄພໃນການຈັດງານເອັກສໂປຈີນ-ອາຊຽນ
ຕຶກສູນເຄື່ອນໄຫວສຸກເສີນນະຄອນນານນິງແມ່ນຕຶກທັນສະໄໝທີ່ໃໝ່ອ່ຽມແລະງາມແບບລຽບໆ.
ເມື່ອຍ່າງເຂົ້າຫ້ອງໂຖງບັນຊາການຂອງສູນເຄື່ອນໄຫວສຸກເສີນນະຄອນນານນິງທີ່ຢູ່ຊັ້ນຫ້າຂອງຕຶກໃຫຍ່ດັ່ງກ່າວ,ກໍໄດ້ເຫັນໜ້າຈໍໃຫຍ່ໆທີ່ຕິດຢູ່ເທິງຝາ,ຢູ່ເທິງໜ້າຈໍໄດ້ສະແດງໃຫ້ເຫັນສະພາບປາກທາງຄົມມະນາຄົມສຳຄັນຂອງນະຄອນນານນິງ.ຢູ່ເບື້ອງຊ້າຍຂອງຫ້ອງບັນຊາການ,ມີຜູ່ຮັບສາຍເກືອບ10ຄົນພວມຮັບໂທລະສັບຢູ່,ທັງປ້ອນຂໍ້ມູນເຂົ້າຄອມພິວເຕີຢ່າງໄວວາ. ຢູ່ກາງຫ້ອງແລະເບື້ອງຂວາມີຄອມພິວເຕີຫຼາຍສິບເຄື່ອງວາງໄວ້ຢ່າງເປັນລະບຽບ.ທ່ານຊືຈີ່ຟູ ຮອງເລຂາສູນເຄື່ອນໄຫວສຸກເສີນແນະນຳວ່າ:
"ຫ້ອງໂຖງບັນຊາການໄດ້ແບ່ງເປັນສອງພາກສ່ວນ,ເບື້ອງຊ້າຍແມ່ນເຂດຕິດຕໍ່ກັບຕຳຫຼວດ,ໂທລະສັບແຈ້ງເຫດລັກຊັບເບີ110,ແຈ້ງເຫດກອບກູ້ດ່ວນເບີ120,ແຈ້ງເຫດຈະລາຈອນເບີ122,ໄຟໄໝ້ເບີ119.ເບີໂທ4ເບີນີ້ລ້ວນແຕ່ໂທເຂົ້າມາທາງເຂດຕິດຕໍ່ຕຳຫຼວດ,ຜູ່ຮັບສາຍເມື່ອໄດ້ຈົດໄວ້ແລ້ວ,ກໍໃຊ້ຄອມພິວເຕີສົ່ງໃຫ້ພະນັກງານຢູ່ຂ້າງຂວາຊຳລະແກ້ໄຂໂລດ.ພວກເຂົາເຈົ້າອີງຕາມຄວາມຕ້ອງການ,ປັບປຸງກຳລັງຕຳຫຼວດຝ່າຍຕ່າງໆເຊັ່ນຮັກສາຄວາມສະຫງົບ, ຈະລາຈອນ, ດັບເພີງກອບກູ້ດ່ວນພາຍໃນຂອບເຂດທົ່ວນະຄອນນານນິງ."
ອັນທີ່ວ່າສູນເຄື່ອນໄຫວສຸກເສີນກໍໝາຍຄວາມວ່າ,ທາງອົງການປົກຄອງປະສານງານແລະບັນຊາບັນດາພາກສ່ວນທີ່ກ່ຽວຂ້ອງ,ໃຫ້ການບໍລິການກອບກູ້ຊ່ອຍເຫຼືອດ່ວນແກ່ສາທາລະນະຊົນ.ປີ1998,ລັດຖະບານຈີນໄດ້ສະເໜີວ່າຕ້ອງຈັດວາງການເຄື່ອນໄຫວຮ່ວມໃຫ້ການບໍລິການທາງສັງຄົມພາຍໃນທົ່ວປະເທດ,ສ້າງຕັ້ງລະບົບກອບກູ້ສາທາລະນະທາງສັງຄົມເທື່ອລະກ້າວ.ນະຄອນນານນິງໃນຖານເປັນຕົວເມືອງຈຸດທົດລອງສັງລວມຄວາມປອດໄພສາທາລະນະແຫ່ງທຳອິດ,ໄດ້ລົງທຶນ160ລ້ານຢວນ,ໄດ້ສ້າງລະບົບຮັບມືສຸກເສີນຂອງຕົວເມືອງຊຸດທຳອິດຢູ່ຈີນໃນເດືອນພະຈິກປີ2001.ວັນທີ1ພຶດສະພາປີ2002,ນະຄອນນານນິງໄດ້ສະໜອງການບໍລິການລາຍງານຕຳຫຼວດຂໍຄວາມຊ່ອຍເຫຼືອຊຳລະເຫດການສາທາລະນະທີ່ເກີດຂຶ້ນກະທັນຫັນຕໍ່ໄທເມືອງຢ່າງເປັນທາງການ.
ລະບົບເຄື່ອນໄຫວສຸກເສີນນະຄອນນານນິງໄດ້ປະກອບດ້ວຍ15ລະບົບຍ່ອຍເຊັ່ນ,ລະບົບເຄືອຂ່າຍຄອມພິວເຕີຫຼັກແຫຼ່ງ,ລະບົບຂໍ້ມູນຂ່າວສານພູມສາດ,ລະບົບສື່ສານສັບຊ້ອນດ້ວຍວິທະຍຸ,ລະບົບປະກອບຊຸດທີ່ກ່ຽວຂ້ອງແລະລະບົບເຄືອຂ່າຍເບີໂທເປີດເຜີຍຂອງເຈົ້າຄອງນະຄອນເປັນຕົ້ນ. ຄຸ້ມຄອງເນື້ອທີ່1ໝື່ນກວ່າກິໂລແມັດມົນທົນ,ໂທລະສັບທັງໝົດທີ່ໄທເມືອງໂທຮ້ອງຂໍຄວາມຊ່ອຍເຫຼືອຈາກຕຳຫຼວດລ້ວນແຕ່ຈະສົ່ງເຂົ້າສູນເຄື່ອນໄຫວສຸກເສີນຢ່າງອັດຕະໂນມັດ,ໃຫ້ສູນດັ່ງກ່າວຮັບຟັງແລະຊຳລະເປັນເອກກະພາບກັນ,ຖ້າມີເຫດການສຳຄັນກໍຈະລາຍງານໃຫ້ອົງການປົກຄອງນະຄອນໃນທັນທີ.ນອກນີ້,ລະບົບເຄື່ອນໄຫວສຸກເສີນນະຄອນນານນິງຍັງໄດ້ຈັດເອົາການປ້ອງກັນໄພນ້ຳຖ້ວມ,ປ້ອງກັນແຜ່ນດິນໄຫວ ພ້ອມດ້ວຍການກອບກູ້ຊ່ອຍເຫຼືອດ່ວນດ້ານພາລະກິດສາທາລະນະເຊັ່ນນ້ຳ,ໄຟຟ້າ,ອາຍແກັສເປັນຕົ້ນເຂົ້າໃນການບັນຊາສັບຊ້ອນເປັນເອກະພາບກັນ.
ຢູ່ສູນເຄື່ອນໄຫວສຸກເສີນນານນິງ,ນັກຂ່າວໄດ້ເຫັນວ່າ:ໂທລະສັບຮ້ອງຂໍການຊ່ອຍເຫຼືອຂອງໄທເມືອງນານນິງໄດ້ໂທເຂົ້າມາຢ່າງບໍ່ຂາດສາຍ,ສຽງຕອບຂອງຜູ້ຮັບສາຍເກືອບວ່າບໍ່ໄດ້ຢຸດເຊົາຈັກເທື່ອ.
1 2
|
