|
|
 |
| (GMT+08:00)
2005-11-07 17:29:53
|
 |
|
ມວນຊົນທົ່ວປະເທດເອົາໃຈໃສ່ໂດຍທົ່ວໄປນຳການປະຕິຮູບອາກອນລາຍໄດ້ສ່ວນຕົວຂອງຈີນ(ສຽງ)
cri
ຕາມທ່ານ ຢູກວ່າງຢວນ ທີ່ເຂົ້າຮ່ວມວຽກງານດັດແກ້ກົດໝາຍວ່າດ້ວຍອາກອນລາຍໄດ້ສ່ວນຕົວ ແນະນຳວ່າ,ການດັດແກ້ທີ່ສຳຄັນອີກບ່ອນໜຶ່ງໃນກົດໝາຍດັ່ງກ່າວແມ່ນໄດ້ເພີ່ມອັດຕາເກັບອາກອນນຳຜູ່ມີລາຍໄດ້ສູງ.ກົດໝາຍສະບັບດັດແກ້ໃໝ່ໄດ້ຮຽກຮ້ອງໃຫ້ຜູ່ມີລາຍໄດ້ສູງລາຍງານເສຍອາກອນເອົາເອງ.ອົງການສ່ວຍສາອາກອນມີສິດປັບໄໝຜູ່ມີລາຍໄດ້ສູງທີ່ບໍ່ລາຍງານເສຍອາກອນເອງຫຼືລາຍງານບໍ່ຖືກຕາມຄວາມຈິງ.ສຳລັບຜູ່ຕ້ອງໂທດ,ຈະຖືກເອົາໂທດທາງກົດໝາຍອາຍາ.ພ້ອມກັນນັ້ນ,ກົດໝາຍ ອາກອນລາຍໄດ້ສ່ວນຕົວ ສະບັບໃໝ່ຍັງໄດ້ຕັ້ງລະບອບຕິດຕາມຄຸ້ມຄອງຜູ່ມີລາຍໄດ້ສູງເສຍອາກອນ,ເຊິ່ງມີຜົນດີຕໍ່ການອັດຕັນຊ່ອງໂຫວ່ໃນການເກັບອາກອນ.
ທ່ານຢູກວ່າງຢວນກ່າວວ່າ,ຈີນດຳເນີນການປະຕິຮູບອາກອນລາຍໄດ້ສ່ວນຕົວເທື່ອນີ້ແມ່ນບາດກ້າວສຳຄັນກ້າວໜຶ່ງໃນດ້ານໝູນໃຊ້ອາກອນລາຍໄດ້ສ່ວນຕົວມາດັດສົມຄວາມຫຼຸດລື່ນກັນລະຫວ່າງຜູ່ທຸກກັບຜູ່ຮັ່ງ."ຍ້ອນໄດ້ປັບມາດຖານລາຍໄດ້ທີ່ບໍ່ຕ້ອງເສຍອາກອນ,ອາກອນລາຍໄດ້ສ່ວນຕົວກໍຫຼຸດໜ້ອຍລົງຕາມກັນ.ສະນັ້ນ,ມັນມີຄວາມໝາຍສຳຄັນທີ່ສຸດຕໍ່ການຮັບປະກັນຊີວິດການເປັນຢູ່ຂອງຜູ່ມີລາຍໄດ້ຕ່ຳ,ຜ່ອນຄາຍຄວາມບໍ່ທ່ຽງທຳດ້ານການແຈກຢາຍລາຍໄດ້, ຜ່ອນຄາຍຄວາມຂັດແຍ່ງໃນດ້ານລາຍໄດ້ຫຼຸດລື່ນກັນຫຼາຍແລະປົກປັກຮັກສາຄວາມໝັ້ນຄົງຂອງສັງຄົມ."
ຕາມໄດ້ຊາບ,ຈີນໄດ້ເລີ່ມປະຕິບັດຈຳນວນມາດຖານລາຍໄດ້800ຢວນທີ່ບໍ່ຕ້ອງເສຍອາກອນມາແຕ່ປີ1993.ຫຼັງຈາກນັ້ນ10ກວ່າປີ,ເສດຖະກິດແລະສັງຄົມຂອງຈີນໄດ້ ພັດທະນາຕື່ມອີກ,ລະດັບລາຍໄດ້, ບໍລິໂພກແລະລະດັບຊີວິດການເປັນຢູ່ຂອງປະຊາຊົນໄດ້ຍົກສູງຂຶ້ນຄຽງຄູ່ກັນ,ສ່ວນອົງປະກອບແຫຼ່ງລາຍໄດ້,ແລະອົງປະກອບລາຍຈ່າຍການບໍລິໂພກກໍໄດ້ເກີດມີການປ່ຽນແປງຢ່າງໃຫຍ່ຫຼວງ.
ພາຍໃຕ້ເບື້ອງຫຼັງດັ່ງກ່າວ,ຈີນຈິ່ງໄດ້ຕົກລົງປັບຈຳນວນລາຍໄດ້ພື້ນຖານເກັບອາກອນຂຶ້ນຮອດ1600ຢວນ.ທ່ານໂລວຈີ້ເວີຍ ຮອງລັດຖະມົນຕີກະຊວງການເງິນຈີນກ່າວວ່າ,ມາດຖານດັ່ງກ່າວແມ່ນຕົກລົງອີງຕາມປັດໄຈຕ່າງໆດັ່ງລຸ່ມນີ້:
"ກ່ອນອື່ນ,ລາຍໄດ້ທີ່ບໍ່ຕ້ອງເສຍອາກອນຕ້ອງລວມທັງພາກສ່ວນລາຍຈ່າຍດ້ານຊີວິດການເປັນຢູ່ພື້ນຖານຂອງໄທເມືອງ, ມາດຖານລາຍຈ່າຍສະເລ່ຍຕາມຫົວຄົນໃນຄອບຄົວຂອງຈີນປັດຈຸບັນແມ່ນປະມານ1100ຢວນ.ນອກນີ້,ຕ້ອງ ໃຫ້ຜູ່ມີລາຍໄດ້ຕ່ຳແລະຜູ່ມີລາຍໄດ້ຜ້ານກາງຫຼຸດຄ່າອາກອນລົງຫຼາຍ,ຜູ່ມີລາຍໄດ້ສູງຫຼຸດຄ່າອາກອນໜ້ອຍຫຼືບໍ່ຫຼຸດໃຫ້ເລີຍ.ສາມ,ຍັງຕ້ອງພິຈາລະນາການຈັດວາງຢ່າງເປັນເອກະພາບລະຫວ່າງເຂດແຄວ້ນແລະລະຫວ່າງຊຸມຊົນ."
ອາກອນລາຍໄດ້ສ່ວນຕົວບໍ່ພຽງແຕ່ແມ່ນໄມ້ງັດທີ່ພາກສ່ວນເສດຖະກິດຂອງລັດໃຊ້ມາດັດສົມການແຈກຢາຍລາຍໄດ້ເທົ່ານັ້ນ,ມັນຍັງຈະກະທົບເຖິງຮູບການຄຸ້ມຄອງຊັບສິນແລະທິດການລົງທຶນຂອງສາມັນຊົນໂດຍທາງອ້ອມອີກດ້ວຍ.ປັດຈຸບັນ,ໄທເມືອງແຫ່ງຕ່າງໆເຊັ່ນປັກກິ່ງ,ຊຽງໄຮ້,ເຊິ່ນເຈິ້ນເປັນຕົ້ນລ້ວນແຕ່ຍິນດີທົດລອງຄຸ້ມຄອງຊັບສິນດ້ວຍຮູບການໃໝ່ບາງຢ່າງ,ຫຼີກເວັ້ນການເສຍອາກອນດ້ວຍຊ່ອງທາງທີ່ສົມເຫດສົມຜົນ,ເຮັດໃຫ້ຄອບຄົວມີລາຍໄດ້ເພີ່ມຂຶ້ນ.ຕົວຢ່າງຄືການຊື້ພັນທະບັດຂອງລັດກໍເປັນການລົງທຶນທີ່ບໍ່ຕ້ອງເສຍອາກອນລາຍໄດ້ສ່ວນຕົວ.ນອກນີ້,ຜະລິດຕະພັນທຼັສແລະລາຍການປະກັນໄພປະເພດແບ່ງປັນຜົນກຳໄລ ທີ່ບໍລິສັດປະກັນໄພຕ່າງໆນຳອອກຈຳໜ່າຍໃນຫຼາຍປີມໍ່ໆນີ້,ຍ້ອນວ່າຍັງຢູ່ຂອບເຂດທີ່ບໍ່ຕ້ອງເສຍອາກອນລາຍໄດ້ສ່ວນຕົວຊົ່ວຄາວ,ສະນັ້ນ,ຈິ່ງໄດ້ຮັບຄວາມຊົມເຊີຍຈາກຫຼາຍໆຄົນ.
1 2
|
|
|
