|
|
 |
| (GMT+08:00)
2005-11-23 21:22:14
|
 |
|
[ຈ່າງເຫິງ]
cri
Author: MO
1800 ກວ່າປີກ່ອນ, ທ່ານຈ່າງເຫິງ ນັກວິທະຍາສາດຈີນໄດ້ໃຊ້ເຄື່ອງວັດແທກທີ່ທ່ານເຮັດເອງມາຕິດຕາມວັດແທກການເກີດແຜ່ນດິນໄຫວຢ່າງຖືກຕ້ອງແມ່ນຢຳ, ນີ້ເປັນຂີດໝາຍສະແດງໃຫ້ເຫັນວ່າ, ມວນມະນຸດໄດ້ສ້າງສັງກາດໃໝ່ທີ່ເລີ່ມໃຊ້ເຄື່ອງວັດແທກບັນທຶກຄົ້ນຄວ້າແຜ່ນດິນໄຫວ. ໃນລາຍການມື້ນີ້, ຂໍແນະນຳຈ່າງເຫິງສູ່ຟັງ.
ລະຫວ່າງຄ.ສ.ປີ130, ຈ່າງເຫິງ ຄົນຈີນໄດ້ເຮັດເຄື່ອງສັງເກດແຜ່ນດິນໄຫວໂຮວເຟິງເຄື່ອງໜຶ່ງ, ໃຊ້ມາຕິດຕາມວັດແທກການເກີດແຜ່ນດິນໄຫວ. ເຄື່ອງວັດແທກແຜ່ນດິນໄຫວໂຮວເຟິງແມ່ນເຄື່ອງວັດແທກເປັນຮູບໝາກບານທີ່ຫຼໍ່ດ້ວຍທອງສຳລິດ, ເສັ້ນຜ່າກາງຍາວ 2 ແມັດປາຍ, ທາງນອກມີມັງກອນ 8 ໂຕແຈກຢາຍກັນຢ່າງສະໝ່ຳສະເໝີ, ຫົວມັງກອນອວ່າຍໄປຫາ 8 ທິດ, ປາກມັງກອນທຸກໂຕຄາບລູກທອງກົມລູກໜຶ່ງ. ຢູ່ໜ້າດິນໃຕ້ຫົວມັງກອນ, ມີຄັນຄາກທອງ 8 ໂຕທີ່ແຫງນຄໍອ້າປາກໂຈ່ໂວ່, ເມື່ອລູກທອງຢູ່ໃນປາກມັງກອນຕົກລົງມາ, ກໍພໍດີຕົກໃສ່ປາກຄັນຄາກ. ຢູ່ໃນເຄື່ອງວັດແທກແຜ່ນດິນໄຫວໂຮວເຟິງມີເສົາທອງເສົາໜຶ່ງຕັ້ງຢູ່, ເສົາທອງນີ້, ຈຸດໜັກແມ່ນຢູ່ທາງເທິງ, ໜ້າຄ້ຳພັດນ້ອຍ, ເໜັງຕີງພຽງເບົາໆມັນກໍງ່ຽງໂລດ. ເມື່ອທິດໃດເກີດແຜ່ນດິນໄຫວ, ສົ້ນລຸ່ມຂອງເສົາທອງຍ້າຍບ່ອນໜ້ອຍດຽວ, ເຄື່ອງຕິດຕັ້ງໄມ້ງັດທີ່ຕິດຕໍ່ກັນ ກໍເຮັດໃຫ້ລູກທອງໃນປາກມັງກອນທີ່ຢູ່ທິດດຽວກັນກັບທິດງ່ຽງຂອງເສົາທອງຕົກໃສ່ປາກຄັນຄາກຢູ່ທາງລຸ່ມ.
ເມື່ອເຄື່ອງວັດແທກແຜ່ນດິນໄຫວເຄື່ອງນີ້ເຮັດສຳເລັດແລ້ວ, ກໍເອົາໄປວາງໄວ້ຢູ່ເມືອງໂລ້ຢາງ ລາຊະທານີໃນສະໄໝນັ້ນ. ມີມື້ໜຶ່ງເມື່ອປີ 138, ມັງກອນທີ່ຫັນໄປທາງທິດຕາເວັນຕົກໃນເຄື່ອງວັດແທກແຜ່ນດິນໄຫວໄດ້ອ້າປາກຢ່າງກະທັນຫັນ, ລູກທອງໃນປາກມັງກອນໄດ້ຕົກໃສ່ປາກຄັນຄາກຢູ່ທາງລຸ່ມ, ແລ້ວມີສຽງດັງແກ່ງໆ, ບອກໃຫ້ຮູ້ວ່າ, ຢູ່ທິດຕາເວັນຕົກຂອງເມືອງໂລ້ຢາງເກີດແຜ່ນດິນໄຫວແລ້ວ. ແຕ່ຊາວໂລ້ຢາງພັດບໍ່ຮູ້ສຶກວ່າມີການສະເທືອນຫຍັງ. ສະນັ້ນ, ຄົນທັງຫລາຍຈຶ່ງໂຈຕະນາກັນ, ເຫັນວ່າ, ເຄື່ອງວັດແທກ ແຜ່ນດິນໄຫວທີ່ຈ່າງເຫີນປະດິດສ້າງຂຶ້ນນັ້ນບໍ່ສາມາດວັດແທກແຜ່ນດິນໄຫວຢ່າງຖືກຕ້ອງຄັກແນ່. ແຕ່ເມື່ອຜ່ານໄປດົນເຕີບ, ເຈົ້ານາຍທ້ອງຖິ່ນຂອງແຂວງການຊູ້ ພາກຕາເວັນຕົກເມືອງໂລ້ຢາງໄດ້ມາລາຍງານວ່າ, ແຫ່ງນັ້ນໄດ້ເກີດແຜ່ນດິນໄຫວ. ເລື່ອງນີ້ໄດ້ລົບລ້າງຄວາມສົງໄສຂອງຄົນທັງຫລາຍ, ໃນເວລານັ້ນອາດເວົ້າໄດ້ວ່າເຄື່ອງວັດແທກແຜ່ນດິນໄຫວດັ່ງກ່າວແມ່ນການປະດິດສ້າງທີ່ນຳໜ້າໂລກ.
1 2
|
|
|
