|
ໃນແຜນທີ່ເສດຖະກິດຂອງຈີນ,ພາກຕາເວັນອອກແມ່ນເຂດແຄມທະເລທີ່ໄຂປະຕູແລະພັດທະນານຳໜ້າກ່ອນໝູ່ຢ່າງຫຼວງຫຼາຍ,ພາກຕາເວັນຕົກແມ່ນເຂດແຄວ້ນທີ່ຫຼ້າຫຼັງໂດຍທຽບຖານແຕ່ໄດ້ເລັ່ງລັດພັດທະນາໄວເຂົ້າຢ່າງເດັ່ນຊັດພາຍໃຕ້ການສົ່ງເສີມຂອງນະໂຍບາຍແຫ່ງລັດ.ມີແຕ່ເຂດພາກກາງເທົ່ານັ້ນຄືວ່າຖືກຄົນທັງຫຼາຍຫຼົງລືມແລ້ວ.ປັດຈຸບັນ,ເຂດພາກກາງຂອງຈີນໄດ້ຮັບຮູ້ເຖິງສະພາບຫຍຸ້ງຍາກຂອງຕົນໃນການພັດທະນາເສດຖະກິດແຫ່ງຊາດແລ້ວ,ແລະພວມໃຊ້ຫຼາຍມາດຕະການ,ສວຍໃຊ້ໂອກາດເອື້ອອຳນວຍທີ່ລັດຖະບານປະຕິບັດການເຮັດໃຫ້ເສດຖະກິດທຸກເຂດແຄວ້ນພັດທະນາຢ່າງສະໝ່ຳສະເໝີແລະດຳເນີນການສັບຊ້ອນອົງປະກອບເສດຖະກິດ,ເລັ່ງລັດບາດກ້າວແຫ່ງການພັດທະນາເສດຖະກິດທ້ອງຖິ່ນຕົນ.
ເຂດພັດທະນາເສດຖະກິດເຕັກນິກນານຊ່າງຂອງແຂວງຈ່ຽງຊີ ພາກກາງຂອງຈີນແມ່ນເຂດຈຸດໜັກແຫ່ງການພັດທະນາເສດຖະກິດຂອງແຂວງດັ່ງກ່າວ.ປັດຈຸບັນ,ເຂດພັດທະນາແຫ່ງນີ້ພວມດຳເນີນການຮ່ວມມືດ້ານການຂົນສົ່ງກັບແຂວງໃກ້ຄຽງທີ່ຢູ່ແຄມທະເລ,ເພື່ອຊອກຄົ້ນຊ່ອງທາງໃໝ່ແຫ່ງການຊຸກຍູ້ການພັດທະນາເສດຖະກິດທ້ອງຖິ່ນຕົນ.ໃນເວລາພານັກຂ່າວຢ້ຽມຢາມວິສາຫະກິດຂົນສົ່ງແຫ່ງໜຶ່ງ,ທ່ານນາງເຕິ້ງຢູຮຸ້ຍ ຮອງຫົວໜ້າຄະນະກຳມະການຄຸ້ມຄອງເຂດພັດທະນາດັ່ງກ່າວແນະນຳວ່າ:
"ເມືອງຂອງພວກຂ້າພະເຈົ້າບໍ່ມີທາງອອກທະເລ,ໃນສອງປີມານີ້,ອົງການປົກຄອງນະຄອນນານຊ່າງໄດ້ວາງມະໂນພາບທີ່ວ່າ"ທ່າບໍ່ມີນ້ຳ",ທີ່ຈິງແລ້ວກໍແມ່ນສ້າງຊ່ອງທາງອອກສູ່ທະເລທີ່ວ່ອງໄວແລະສະດວກ,ຜ່ານຈາກການຮ່ວມກັນຂົນສົ່ງກັບນະຄອນເຊິນເຈີ້ນ,ນະຄອນເຊຍເມິນ,ນະຄອນນິງໂປແລະນະຄອນຊຽງໄຮ້,ເຮັດໃຫ້ເງື່ອນໄຂຜ່ານດ່ານຢ່າງສະດວກຂອງເມືອງທ່າແຄມທະເລຂະຫຍາຍໄປຮອດເມືອງທີ່ບໍ່ມີທາງອອກທະເລ."
ປັດຈຸບັນ,ເບົ້າແບບຮ່ວມມືດ້ານເສດຖະກິດດັ່ງກ່າວຂອງເຂດພັດທະນາເສດຖະກິດເຕັກນິກນານຊ່າງກໍພວມເຜີຍແຜ່ນຳໃຊ້ໃນທົ່ວແຂວງຈ່ຽງຊີເປັນກ້າວໆ.ແຂວງຈ່ຽງຊີເປັນແຂວງພຽງແຫ່ງດຽວທີ່ແປະກັບເຂດສາມລ່ຽມແມ່ນ້ຳຢາງເຊແລະເຂດສາມລ່ຽມແມ່ນ້ຳຈູ່ຈ່ຽງທີ່ເສດຖະກິດພັດທະນາຂອງຈີນ.ຄຽງຄູ່ກັບເຂດແຄມທະເລທີ່ພັດທະນາໄດ້ພັດທະນາເສດຖະກິດແລະເລື່ອນຂັ້ນແລະສັບຊ້ອນອົງປະກອບອຸດສາຫະກຳ,ແຂວງຈ່ຽງຊີໄດ້ກຳແໜ້ນໂອກາດດັ່ງກ່າວ,ນຳໃຊ້ຊັບພະຍາກອນທຳມະຊາດແລະຊັບພະຍາກອນຕະຫຼາດຂອງຕົນຢ່າງເຕັມສ່ວນ,ຕັ້ງໜ້າຮັບເອົາຮູບຖານອຸດສາຫະກຳຂອງແຂວງພັດທະນາມາພັດທະນາເສດຖະກິດຂອງແຂວງຕົນ.
ປັດຈຸບັນ,ວິທີດັ່ງກ່າວຂອງແຂວງຈ່ຽງຊີກໍແມ່ນແລວຄວາມຄິດສຳຄັນແຫ່ງການພັດທະນາເສດຖະກິດຂອງບັນດາແຂວງໃນເຂດພາກກາງຂອງຈີນ.ເຂດພາກກາງຂອງຈີນມີ6ແຂວງຄືແຂວງຊ່ານຊີ,ແຂວງເຮີນານ,ແຂວງຫູເປ,ແຂວງຫູນານ,ແຂວງອ່ານຮຸຍແລະແຂວງຈ່ຽງຊີ.ເວັ້ນແຕ່ແຂວງຫູເປແລ້ວ,ແຂວງອື່ນໆລ້ວນແຕ່ແປະກັບແຂວງທີ່ຢູ່ແຄມທະເລ.
ແຕ່ປີ2004ມານີ້,ບັນດາແຂວງທີ່ຢູ່ເຂດພາກກາງຂອງຈີນໄດ້ພາກັນເພີ່ມຄວາມແຮງໃນການຮ່ວມມືດ້ານເສດຖະກິດກັບເຂດພັດທະນາຢູ່ແຄມທະເລ.ປັດຈຸບັນ,ວົງເສດຖະກິດເຂດລາມລ່ຽມແມ່ນ້ຳຈູ່ຈ່ຽງໄດ້ແຜ່ຂະຫຍາຍອິດທິພົນໄປຮອດແຂວງຫູນານ,ແຂວງຈ່ຽງຊີເປັນຕົ້ນແລ້ວ,ແຂວງອ່ານຮຸຍແລະແຂວງຫູເປເປັນຕົ້ນໄດ້ຕັ້ງໜ້າສ້າງສາຍສຳພັນກັບວົງເສດຖະກິດເຂດສາມລ່ຽມແມ່ນ້ຳຢາງເຊ,ແຂວງຊ່ານຊີແລະແຂວງເຮີນານເປັນຕົ້ນກໍພວມຕັ້ງໜ້າສ້າງການພົວພັນທີ່ສະໜິດແໜ້ນກັບເຂດພັດທະນາອື່ນໆທີ່ຢູ່ເຂດແຄມທະເລ.
ບໍ່ພຽງແຕ່ແນວນີ້,ໃນການພັດທະນາເສດຖະກິດ,ເຂດພາກກາງຂອງຈີນຍັງໄດ້ເພີ່ມທະວີການຮ່ວມມືກັນລະຫວ່າງບັນດາແຂວງທີ່ຢູ່ພາກກາງ.ໃນເວລາແນະນຳວິທີທີ່ກ່ຽວຂ້ອງຂອງແຂວງຕົນ,ທ່ານຮວງຈື້ສວນເຈົ້າແຂວງແຂວງຈ່ຽງຊີກ່າວວ່າ,ໃນຂະບວນການພັດທະນາຂອງແຂວງຈ່ຽງຊີ,ການປະສານງານດ້ານອຸດສາຫະກຳກັບແຂວງອື່ນທີ່ຢູ່ພາກກາງແມ່ນດ້ານສຳຄັນດ້ານໜຶ່ງ:
"ໃນດ້ານກະສິກຳ,ເຊິ່ງລວມທັງການກໍ່ສ້າງພື້ນຖານໂຄງລ່າງກະສິກຳ,ພວກຂ້າພະເຈົ້າໄດ້ປະສານງານກັບແຂວງຫູນານແລະແຂວງຫູເປຢ່າງຫຼວງຫຼາຍ.ໃນດ້ານພະລັງງານ,ຖ່ານຫີນຂອງແຂວງຈ່ຽງຊີພວກຂ້າພະເຈົ້າມີເຄິ່ງໜຶ່ງແມ່ນແຂວງອ່ານຮຸຍ,ແຂວງຊ່ານຊີແລະແຂວງເຮີນານເປັນຜູ່ສະໜອງໃຫ້,ວັດຖຸດິບທີ່ແຂວງຈ່ຽງຊີຜະລິດ,ເຊັ່ນທອງແລະຕຸງສະແຕນເປັນຕົ້ນ,ສ່ວນຫຼາຍແມ່ນສະໜອງໃຫ້ບັນດາແຂວງທີ່ຢູ່ພາກກາງ."
1 2
|
