|
2005,ປະຊາຊົນຈີນໄດ້ຮັບຜົນປະໂຫຍດຫຼາຍກວ່າເກົ່າຈາກໝາກຜົນແຫ່ງການເຕີບໂຕຂອງເສດຖະກິດ(ສຽງ)
cri
ຄຽງຄູ່ກັບຊາວກະສິກອນມີລາຍໄດ້ເພີ່ມຂຶ້ນແລະໄທເມືອງຄອງຄອຍມີລາຍໄດ້ເພີ່ມຂຶ້ນ,ຊີວິດການເປັນຢູ່ຂອງປະຊາຊົນຈີນໄດ້ຮັບການປົວແປງໃຫ້ດີຂຶ້ນຕໍ່ມາ.ຕາມສະຖິຕິ,ໃນສາມໄຕມາດຕົ້ນປີ2005,ອັດຕາເພີ່ມຂຶ້ນຂອງລາຍໄດ້ທີ່ໃຊ້ຈ່າຍໄດ້ທີ່ສະເລ່ຍຕາມຫົວຄົນໃນຄອບຄົວຂອງປະຊາຊົນໃນຕົວເມືອງແລະລາຍໄດ້ສຸດທິທີ່ສະເລ່ຍຕາມຫົວຄົນຂອງຊາວກະສິກອນຈີນລ້ວນແຕ່ສູງກວ່າຈັງຫວະເຕີບໂຕທາງເສດຖະກິດໃນໄລຍະດຽວ,ອັນໄດ້ຊຸກຍູ້ໃຫ້ຕະຫຼາດບໍລິໂພກພາຍໃນປະເທດຈີນຄຶກຄັກຕື່ມອີກ.
ທ່ານຊີຈີ່ຈຸ່ນ ຊາວກະສິກອນຂອງເມືອງສູໂຈ່ວແຂວງຈ່ຽງຊູພາກຕາເວັນອອກຂອງຈີນ.ເຖິງວ່າອາໄສຢູ່ຊົນນະບົດທີ່ຫ່າງຈາກຕົວເມືອງຫຼາຍສິບກິໂລແມັດກໍຕາມ,ແຕ່ການເລາະທ່ຽວຮ້ານຊຸບເປີມາເກັດໄດ້ກາຍເປັນເລື່ອງທຳມະດາໃນຊີວິດການເປັນຢູ່ຂອງທ່ານພ້ອມດ້ວຍຊາວບ້ານທັງຫຼາຍໃນປີ2005.ຫວ່າງມໍ່ໆນີ້,ທ່ານໄດ້ຊື້ເຄື່ອງປັບອາກາດເຄື່ອງໜຶ່ງຢູ່ຮ້ານຊຸບເປີມາເກັດທີ່ຫ່າງຈາກເຮືອນບໍ່ໄກ,ເພື່ອຜ່ານລະດູໜາວຢ່າງອົບອຸ່ນ.ທ່ານເວົ້າວ່າ:
"ຮ້ານນີ້ມີສິນຄ້າອຸດົມສົມບົນ,ສະພາບແວດລ້ອມກໍດີຫຼາຍພວກເຮົາກໍຍິນດີມາຊື້ຂອງຢູ່ແຫ່ງນີ້, ,ພວກເຮົາຢາກຊື້ເຄື່ອງປັບອາກາດທີ່ມີຫຍີ່ຫໍ້ຊື່ດັງແລະມີຢູ່ໃນການໂຄສະນາສິນຄ້າ."
ໃນເມື່ອກ່ອນ,ຢູ່ຈີນມີແຕ່ຢູ່ໃນຕົວເມືອງຈິ່ງມີຮ້ານຊຸບເປີມາເກັດ,ແຕ່ປັດຈຸບັນ,ຍ້ອນວ່າກຳລັງບໍລິໂພກຂອງຊາວກະສິກອນສູງຂຶ້ນ,ຢູ່ຊົນນະບົດກໍມີຮ້ານຊຸບເປີມາເກັດແລ້ວ,ປັດຈຸບັນ,ຢູ່ຊົນນະບົດຂອງຈີນໄດ້ມີຮ້ານຊຸບເປີມາເກັດທີ່ມີຂະໜາດຕ່າງກັນ7ໝື່ນກວ່າແຫ່ງ,ຊາວກະສິກອນກໍໄດ້ມີການເລືອກເອົາຫຼາຍກວ່າເກົ່າໃນເວລາຊື້ຂອງ.
ແນ່ນອນແລ້ວ, ປະຊາຊົນຈີນມີລາຍໄດ້ເພີ່ມຂຶ້ນແລະມີລະດັບຊີວິດການເປັນຢູ່ສູງຂຶ້ນໃນປີ2005ແມ່ນແຍກອອກຈາກສະພາບເສດຖະກິດຈີນສືບຕໍ່ຮັກສາການພັດທະນາຢ່າງໝັ້ນທ່ຽງແລະປອດໃສໃນປີນັ້ນບໍ່ໄດ້.ໃນເວລາຕີລາຄາສະພາບເສດຖະກິດຂອງຈີນໃນປີ2005,ທ່ານຢວນກ່າງມິງ ຜູ່ຊ່ຽວຊານຂອງສະຖາບັນຄົ້ນຄວ້າເສດຖະກິດແຫ່ງສະພາບັນດິດວິທະຍາສາດສັງຄົມຈີນເຫັນວ່າ,ປີ2005ແມ່ນປີທີ່ເສດຖະກິດຈີນພັດທະນາໄດ້ດີກວ່າທຸກປີທີ່ຜ່ານມານີ້.
"ທ່ວງທ່າໝູນເດີນຂອງເສດຖະກິດຈີນໃນປີ2005ແມ່ນຢູ່ໃນຂັ້ນດີ, ການພົວພັນລະຫວ່າງຈັງຫວະເຕີບໂຕຂອງGDPກັບລາຄາແມ່ນສົມຫວັງທີ່ສຸດ.ປັດຈຸບັນ,ຈັງຫວະເຕີບໂຕຂອງGDPໄດ້ສູງຂຶ້ນຮອດ9,5%,ສ່ວນອັດຕາເພີ່ມຂອງຕົວເລກດັດຊະນີລາຄາບໍລິໂພກຂອງໄທເມືອງຍັງຢູ່ໃນລະຫວ່າງ2%,ການພົວພັນນີ້ແມ່ນປະກົດອອກຍາກທີ່ສຸດ,ສະພາບເສດຖະກິດໃນປີ2005ແມ່ນດີກວ່າສອງປີທີ່ຜ່ານມາ."
ທ່ານຢວນກ່າງມິງວິເຄາະວ່າ,ທຳມະດາແລ້ວ,ເສດຖະກິດເຕີບໂຕໄວມັກຈະພາໃຫ້ເງິນເຟີ້ໃນລະດັບສູງ.ຍ້ອນວ່າຈີນໄດ້ໃຊ້ມາດຕະການດັດສົມຄວບຄຸມມະຫາພາກຢ່າງທັນການ,ຈິ່ງເຮັດໃຫ້ອັດຕາເງິນເຟີ້ຂອງຈີນໃນປີ2005ມີແຕ່ປະມານ2%ເທົ່ານັ້ນ.ເມື່ອທຽບກັບຈັງຫວະເຕີບໂຕທາງເສດຖະກິດ9%ຂຶ້ນໄປແລ້ວ,ປະຊາຊົນຈີນຍ່ອມຈະໄດ້ຮັບຜົນປະໂຫຍດຈາກໝາກຜົນແຫ່ງການເຕີບໂຕຂອງເສດຖະກິດຢ່າງເຕັມສ່ວນ,ອັດຕາເງິນເຟີ້ຕ່ຳກໍເຮັດໃຫ້ເງິນຂອງພວກເຂົາເຈົ້າແຮ່ງຄຸ້ມກວ່າ.
ແຕ່ວ່າ,ເຈົ້າໜ້າທີ່ແລະຜູ່ຊ່ຽວຊານດ້ານເສດຖະກິດຂອງຈີນກໍໄດ້ຮັບຮູ້ວ່າ,ເສດຖະກິດຈີນໃນປີ2005ຍັງມີບັນຫາບໍ່ໜ້ອຍ.ຕົ້ນຕໍແມ່ນຊັບພະຍາກອນຝືດເຄືອງແລະສິ່ງແວດລ້ອມຖືກເຊື່ອມພິດຢ່າງໜັກໜ່ວງ.ອຸບັດເຫດຈຳນວນໜຶ່ງກໍໄດ້ສ້າງຜົນສະທ້ອນທາງລົບໃນລະດັບໃດໜຶ່ງຕໍ່ຄວາມປອດໄພດ້ານການຜະລິດແລະການດຳລົງຊີວິດຂອງປະຊາຊົນຈີນ.
ໂດຍແນໃສ່ບັນຫາເຫຼົ່ານີ້,ປີ2005,ລັດຖະບານຈີນໄດ້ສະເໜີຢ່າງແຈ່ມແຈ້ງວ່າ,ໃນຂະນະທີ່ຮັກສາໃຫ້ເສດຖະກິດມີການພັດທະນາ,ແລະເຮັດໃຫ້ປະຊາຊົນໄດ້ຮັບຜົນປະໂຫຍດຈາກໝາກຜົນແຫ່ງການເຕີບໂຕຂອງເສດຖະກິດນັ້ນ,ຕ້ອງພະຍາຍາມຢ່າງສຸດຂີດ,ຫຼຸດຄວາມສ່ຽງຂອງການພັດທະນາເສດຖະກິດທີ່ມີຕໍ່ສະພາບແວດລ້ອມການຜະລິດແລະການດຳລົງຊີວິດຂອງພວກເຂົາເຈົ້າໃຫ້ໜ້ອຍລົງ.ໃນນັ້ນ,ສິ່ງສຳຄັນກວ່າໝູ່ກໍແມ່ນໃນເວລາຮັກສາໃຫ້ເສດຖະກິດພັດທະນານັ້ນ,ຍົກອັດຕານຳໃຊ້ຊັບພະຍາກອນແລະລະດັບອະນຸລັກສິ່ງແວດລ້ອມໃຫ້ສູງຂຶ້ນ.ໃນກອງປະຊຸມເທື່ອໜຶ່ງ,ທ່ານເຈິ່ງເຜີຍອຽນ ຮອງນາຍົກລັດຖະມົນຕີຈີນກ່າວວ່າ,ຈີນໄດ້ກຳນົດເອົາການປະຢັດພະລັງງານແລະການອະນຸລັກສິ່ງແວດລ້ອມເປັນນະໂຍບາຍພື້ນຖານແຫ່ງລັດແລ້ວ.
ຕາມໄດ້ຊາບ,ໃນປີ2006,ຈີນຈະສົ່ງເສີມໃຫ້ປະຢັດຊັບພະຍາກອນແລະຫຼຸດການເຊື່ອມພິດສິ່ງແວດລ້ອມໃຫ້ໜ້ອຍລົງຕື່ມອີກໃນການພັດທະນາເສດຖະກິດ,ເຮັດໃຫ້ປະຊາຊົນຈີນໄດ້ຮັບຜົນປະໂຫຍດຫຼາຍກວ່າເກົ່າໃນສະພາບແວດລ້ອມການຜະລິດແລະການດຳລົງຊີວິດທີ່ປອດໄພ.
1 2
|
|
