|
ບຸກກຸດຈີນຫາກໍ່ຜ່ານໄປ,ຊາວຈີນຈະໄດ້ຕ້ອນຮັບບຸນປະເພນີສຳຄັນອີກບຸນໜຶ່ງໃນໄວໆນີ້. ເດືອນຈຽງມື້ເພັງ15ຄ່ຳຈັນທະຄະຕິຈີນແມ່ນບຸນກິນຂະໜົມບົວລອຍ,ຕາມຮີດຄອງປະເພນີຂອງຊາວຈີນ,ບຸນກິນຂະໜົມບົວລອຍກໍແມ່ນມື້ບຸນທີ່ຄົນໝົດຄອບຄົວເຕົ້າໂຮມກັນ,ໃນມື້ບຸນນີ້,ຄົນໃນຄອບຄົວຕ້ອງກິນຂະໜົມບົວລອຍ,ນີ້ແມ່ນອາຫານທີ່ເປັນສັນຍະລັກແຫ່ງການເຕົ້າໂຮມກັນ,ເພື່ອສຳຜັດຮູ້ຄວາມມ່ວນຊື່ນແຫ່ງການເຕົ້າໂຮມກັນແລະຄວາມຮັກແພງອັນເລິກເຊິ່ງຂອງຄອບຄົວ.
ຂະໜົມບົວລອຍ
ທີ່ທ່ານພວມຟັງຢູ່ນີ້ແມ່ນເພງພື້ນເມືອງຈີນຊື່ວ່າ"ມາຍຖ່າງຢວນ "ແປວ່າ,ຂາຍຂະໜົມບົວລອຍ,ເນື້ອເພງຮ້ອງວ່າ:ຂະໜົມບົວລອຍເດີ,ຂະໜົມບົວລອຍເດີ,ຂະໜົມບົວລອຍຂອງອ້າຍສຽວເອີຈັ່ງແມ່ນມົນອຸ້ມລຸ້ມ,ຢາກກິນກໍຂ້ຽວມາຊື້ແມ,ເມື່ອກິນຂະໜົມບົວລອຍແລ້ວຄອບຄົວຈິ່ງເຕົ້າໂຮມກັນຢ່າງມ່ວນຊື່ນ"ຂະໜົບບົວລອຍໃນພາສາຈີນເອີ້ນວ່າຂະໜົມຢວນຊ່ຽວ,ເຮັດດ້ວຍແປ້ງເຂົ້າໜຽວໜ່ຽງຄັ້ນເປັນຮູບມົນ,ແລ້ວຍັດໃສ້ກໍເຮັດສຳເລັດແລ້ວ.ມັນມີຮູບຄ້າຍຄືລູກປິ່ງປ່ອງ.ຂະໜົມບົວລອຍເມື່ອຕົ້ມສຸກແລ້ວ,ມີລົດທັງຫອມທັງແຊບ.ໃນບຸນຂະໜົມບົວລອຍແຕ່ລະປີ,ຊາວຈີນທຸກໆຄອບຄົວກໍຕ້ອງກິນຂະໜົມບົວລອຍ.
ຂະໜົມບົວລອຍ
ບຸນກິນຂະໜົມບົວລອຍປີນີ້ໃກ້ຈະມາເຖິງແລ້ວ,ຄືໃນວັນທີ23ກຸມພາ.ໃນຫຼາຍມື້ມໍ່ໆມານີ້,ຢູ່ຕາມຖະໜົມການຄ້າຂອງປັກກິ່ງໄດ້ທະຍອຍກັນຕັ້ງບ່ອນຂາຍຂະໜົມບົວລອຍ.ຄ່ຽງຄູ່ກັບບຸນຂະໜົມບົວລອຍຫຍັບມໍ່ເຂົ້າມາ,ຜູ້ທີ່ໄປຊື້ຂະໜົມບົວລອຍນັບມື້ນັບຫຼາຍຂຶ້ນ,ເມື່ອຮອດມື້ບຸນນັ້ນ,ຖັນແຖວຊື້ຂະໜົມບົວລອຍຈະຍາວເປັນຫຼາຍຮ້ອຍແມັດ,ເຊິ່ງໄດ້ກາຍເປັນພາບພິເສດໃນຍາມບຸນຂອງປັກກິ່ງ.ທ່ານນາງຈ້າວລີຊີ້ວ ທີ່ເຮັດວຽກຢູ່ຮ້ານຄ້າແຫ່ງໜຶ່ງຂອງກຸ່ມບໍລິສັດອາຫານຕ້າວຊ່ຽງຊຸນປັກກິ່ງບອກນັກຂ່າວວ່າ:
"ແຕ່ລະປີ,ຍ້ອນຮ້ານຄ້ານ້ອຍ,ຈຳຕ້ອງໄປຂາຍຂະໜົມບົວລອຍຢູ່ຕາມຖະໜົມນອກຮ້ານຄ້າ, ລູກຄ້າໄດ້ລຽນແຖວຈົນໄປຮອດຂົວໄຂວ່ມໍ່ຮ້ານຄ້າ.ຍ້ອນປະຕູຂອງຮ້ານຄ້າບາງແຫ່ງຂ້ອນຂ້າງນ້ອຍ,ລູກຄ້າກໍລຽນແຖວໂດຍອ້ອມເປັນຫຼາຍວົງ.ໃນມື້ບຸນຂະໜົມບົວລອຍມີລູກຄ້າຫຼວງຫຼາຍພາຍມາກ,ຈັ່ງແມ່ນເປັນພາບພິເສດຂອງນະຄອນຫຼວງປັກກິ່ງ.ເມື່ອໄດ້ເຫັນຜູ້ລຽນແຖວກໍຮູ້ໂລດວ່າແມ່ນຜູ້ຊື້ຂະໜົມບົວລອຍ."
ໄທເມືອງປັກກິ່ງລຽນແຖວຊື້ຂະໜົມບົວລອຍຢູ່ຮ້ານ
ນາງຈ້າວລີຊິ້ວເວົ້າວ່າ,ເຖິງວ່າຮ້ານຄ້າທີ່ນາງເຮັດວຽກນັ້ນບໍ່ໃຫຍ່ກໍຕາມ,ແຕ່ວ່າແຕ່ລະປີ,ຂະໜົມບົວລອຍພັດຂາຍດິບຂາຍດີທີ່ສຸດ.ໃນມື້ບຸນຂະໜົມບົວລອຍປີກາຍນີ້,ໄດ້ຂາຍຂະໜົມບົວລອຍ1ໝື່ນກວ່າກິໂລ.
1 2
|
