ຄອບຄົວຂອງພໍ່ເຖົ້າວາງຖົງເຈິ່ນ ໄທເມືອງປັກກິ່ງທີ່ອາຍຸ65ປີລວມມີ4ຄົນຢູ່ມໍ່ຮ້ານຄ້າດັ່ງກ່າວ.ໝົດຄອບຄົວຂອງພໍ່ເຖົ້າລ້ວນແຕ່ມັກກິນຂະໜົມບົວລອຍທີ່ສຸດ.ເມື່ອຮອດມື້ບຸນຂະໜົມບົວລອຍທຸກປີ,ພາຍຫຼັງກິນເຂົ້າແລງແລ້ວ,ເມື່ອເດືອນເພັງແຈ້ງປະກົດຕົວຢູ່ທ້ອງຟ້າ,ໝົດຄອບຄົວກໍນັ່ງອ້ອມກັນກິນຂະໜົມບົວລອຍ.ໃນບຸນຂະໜົມບົວລອຍປີກາຍນີ້,ລູກສາວກົກຂອງພໍ່ເຖົ້າວາງຖົງເຈິ່ນພວມຮຽນຢູ່ອັງກິດ,ເວລາກິນຂະໜົມບົວລອຍ,ກໍພາໃຫ້ພໍ່ເຖົ້າຄິດຮອດຄິດເຖິງລູກສາວທີ່ຢູ່ຕ່າງປະເທດທີ່ໄກແສນໄກ.
"ເມື່ອເຫັນຂະໜົມບົວລອຍໃນໝໍ້ທີ່ຟົດບວກໆ,ແລະເບິ່ງດວງເດືອນມົນອຸ້ມລຸ້ມຢູ່ເທິງຟ້າ,ຂ້ອຍກໍໄດ້ຄິດເຖິງລູກສາວທີ່ຢູ່ທາງໄກ.ມື້ນັ້ນ,ລູກສາວຢູ່ບ່ອນທີ່ໄກຈາກຂ້ອຍ,ບໍ່ມີຂະໜົມບົວລອຍກິນ,ຂ້ອຍຮູ້ສຶກເສຍໃຈ.ແຕ່ພາຍລຸນມາກຶກກອງເອົາເອງແລ້ວເຫັນວ່າ,ລູກສາວຄວນດີໃຈຫຼາຍ,ເຖິງວ່າ ພວກເຮົາຫ່າງກັນໄກແສນໄກກໍຕາມ,ແຕ່ດວງເດືອນໄດ້ເຮັດໃຫ້ພວກເຮົາຕິດຕໍ່ພົວພັນກັນ,ເມື່ອຄິດແນວນີ້ກໍຮູ້ສຶກປອບໃຈຫຼາຍ."
ບຸນຂະໜົມບົວລອຍເວົ້າສຳລັບທ່ານນາງສິງຈິງຊຸ້ຍ ໄທເມືອງປັກກິ່ງແລ້ວກໍແມ່ນມື້ທີ່ຂຸ້ນນຳວຽກຫຼາຍ.ເພາະວ່ານາງແມ່ນຫົວໜ້າຫ້ອງຈັກຂອງໂຮງງານຜະລິດຂະໜົມບົວລອຍແຫ່ງໜຶ່ງ.
ຜະລິດຂະໜົມບົວລອຍ
ໂຮງງານຜະລິດຂະໜົມບົວລອຍທີ່ນາງສິງຈິງຊຸ້ຍເຮັດວຽກຢູ່ນັ້ນແມ່ນໂຮງງານເກົ່າທີ່ມີປະຫວັດຮ້ອຍປີແລ້ວ.ຂະໜົມບົວລອຍຂອງໂຮງງານແຫ່ງນີ້ໄດ້ຮັກສາລົດຊາດດັ້ງເດີມຢ່າງສະເໝີຕົ້ນສະເໝີປາຍ.ຢູ່ຫ້ອງຈັກທີ່ນາງສິງຈິງຊຸ້ຍເຮັດວຽກຢູ່ນັ້ນ,ນັກຂ່າວໄດ້ເຫັນວ່າ,ພວກກຳມະກອນພວມປ່ອນໃສ້ຂະໜົມບົວລອຍທີ່ໄດ້ຈຸ່ມນ້ຳແລ້ວນັ້ນເຂົ້າໃນຈັກຜະລິດຂະໜົມບົວລອຍທີ່ມີແປ້ງເຂົ້າໜຽວໃຫ້ມັນປິ່ນຢ່າງບໍ່ຢຸດຢັ້ງ.ໃນຈັກຜະລິດດັ່ງກ່າວ,ໃສ້ຂະໜົມບົວລອຍໄດ້ຕິດກັບແປ້ງເຂົ້າໜຽວເປັນເທື່ອທຳອິດ.ຖັດມາ,ພວກກຳມະກອນຊວ້ານເອົາໃສ້ຂະໜົມບົວລອຍທີ່ຕິດແປ້ງເຂົ້າໜຽວອອກມາ,ເມື່ອຈຸ່ມນ້ຳແລ້ວປ່ອນໃສ່ຈັກຜະລິດຂະໜົມບົວລອຍອີກ.ເຮັດແນວນີ້ຫຼາຍເທື່ອ,ຂະໜົມບົວລອຍກໍຄ່ອຍໆພອງຂຶ້ນປານລູກປິ່ງປ່ອງສີຂາວ.
ຜະລິດຂະໜົມບົວລອຍ
ຮີດຄອງປະເພນີທີ່ສືບທອດກັນມາເປັນພັນປີ,ເຮັດໃຫ້ຂະໜົມບົວລອຍ ອາຫານທຳມະດາຊະນິດນີ້ສ່ອງແສງໃຫ້ເຫັນຄວາມຮັກແພງອັນເລິກເຊິ່ງຂອງຄອບຄົວ.ທ່ານວາງວາງໂຈຈີ ນັກຄົ້ນຄວ້າຮີດຄອງປະເພນີພື້ນເມືອງຂອງປັກກິ່ງເວົ້າວ່າ,ກິນຂະໜົມບົວລອຍໄດ້ກາຍເປັນວັດທະນະທຳພື້ນເມືອງແນວໜຶ່ງຂອງຈີນ.ສະນັ້ນ,ເຖິງວ່າອາຫານການກິນໃນຊູ່ມື້ນີ້ໄດ້ປ່ຽນແປງເປັນຫຼາຍຢ່າງຫຼາຍແນວເລື້ອຍໆກໍຕາມ,ແຕ່ຮີດຄອງປະເພນີທີ່ຊາວຈີນກິນຂະໜົມບົວລອຍໃນບຸນຂະໜົມບົວລອຍນັ້ນຍ່ອມຈະສືບທອດກັນໄປຈົນເທົ້າໃດໆ.ທ່ານເວົ້າວ່າ:
"ການກິນຂະໜົມບົວລອຍໃນບຸນຂະໜົມບົວລອຍແມ່ນວັດທະນະທຳດັ້ງເດີມທີ່ສືບທອດກັນມາແຕ່ສະໄໝບູຮານ.ໃສ້ຂອງຂະໜົມບົວລອຍມີສີນາໆຊະນິດ,ມີລົດຫວານ,ຄົນຈີນເຮັດຂະໜົມບົວລອຍເປັນຮູບມົນ, ເປັນສັນຍະລັກແຫ່ງການເຕົ້າໂຮມກັນ,ແລະຮູ້ສຶກຫວານໆ,ເປັນສັນຍະລັກໃຫ້ແກ່ຊີວິດການເປັນຢູ່ໃນພາຍໜ້າແມ່ນອຸດົມສົມບູນແລະຫວານປານນ້ຳເຜີ້ງ.ຮີດຄອງປະເພນີແບບນີ້ສາມາດສືບທອດກັນມາຮອດຊູ່ມື້ນີ້ກໍແມ່ນການເຜີຍແຜ່ເນື້ອໃນວັດທະນະທຳ,ວັດທະນະທຳແນວນີ້ມີລັກສະນະປະຫວັດສາດແລະລັກສະນະສືບທອດ.
1 2
|
