|
ໃນໄລຍະດົນນານມານີ້,ຈີນກໍຖືກຖືເປັນປະເທດໃຫຍ່ດ້ານ ການຜະລິດ,ແຕ່ວ່າຜະລິດຕະພັນຫຼວງຫຼາຍທີ່ຈີນຜະລິດລ້ວນແຕ່ໄດ້ຕິດກາໝາຍຂອງບໍລິສັດຂ້າມຊາດຂອງຕ່າງປະເທດ, ຜະລິດຕະພັນທີ່ມີສິດຊັບສິນທາງປັນຍາແລະຍີ່ຫໍ້ເປັນຂອງຕົນເອງຂອງຈີນມີຈຳນວນໜ້ອຍສົມຄວນແລະມີກຳລັງແກ່ງແຍ່ງບໍ່ແຂງແຮງປານໃດ.ແຕ່ວ່າ,ປັດຈຸບັນ,ສະພາບດັ່ງກ່າວພວມເກີດມີການປ່ຽນແປງ,ນັກທຸລະກິດທັງຫຼາຍຂອງຈີນພວມພະຍາຍາມສ້າງເຕັກນິກແກນກາງແລະຍີ່ຫໍ້ເປັນຂອງຕົນເອງແລ້ວເຮັດໃຫ້ຜະລິດຕະພັນມີກຳລັງແກ່ງແຍ່ງເພີ່ມຂຶ້ນ.
ແຕ່ໃດມາ,ຍ້ອນວິສາຫະກິດຈີນບໍ່ມີຄວາມສາມາດຄົ້ນຄວ້າພັດທະນາປານໃດ, ຄຸນນະພາບຜະລິດຕະພັນຂ້ອນຂ້າງຕ່ຳ,ສະນັ້ນ,ຍີ່ຫໍ້ຕ່າງປະເທດຈິ່ງຖືກຖືເປັນຄຳແທນນາມຂອງຜະລິດຕະພັນທີ່ມີຄຸນນະພາບດີໃນຊົ່ວໄລຍະໜຶ່ງ.ແຕ່ວ່າໃນຫຼາຍປີມານີ້,ຄຽງຄູ່ກັບກຳລັງກວມລວມຂອງເສດຖະກິດຈີນໄດ້ເພີ່ມທະວີຂຶ້ນ,ໃນຂະແໜງການຈຳນວນໜຶ່ງ,ເຕັກນິກຂອງວິສາຫະກິດຈີນໄດ້ລື່ນກາຍວິສາຫະກິດຂ້າມຊາດ. ແຕ່ກ່ອນ,ຕະຫຼາດເຈ້ຍໂກປີຂອງຈີນເກືອບຖືກຜູກຂາດຈາກຜະລິດຕະພັນຂອງເຢຍລະມັນ,ຍີ່ປຸ່ນແລະອາເມລິກາ.ເຖິງຈະມີວິສາຫະກິດຈີນຜະລິດຜະລິດຕະພັນປະເພດດຽວກໍຕາມ,ແຕ່ຍ້ອນວ່າເຕັກນິກຜະລິດວັດຖຸດິບສຳຄັນຄືຢາສະແດງສີ ຢູ່ໃນກຳມືຂອງບໍລິສັດຂ້າມຊາດ,ສະນັ້ນ,ກຳລັງແກ່ງແຍ່ງຂອງວິສາຫະກິດຈີນຈິ່ງມີການຈຳກັດທີ່ສຸດ.ປີ1997,ບໍລິສັດອຸດສາຫະກຳເຄມີ ຢຸ້ຍເຟິງ ຊິນຊຽງ ຈຳກັດຂອງແຂວງເຮີນານ ພາກກາງຂອງຈີນໄດ້ຄົ້ນຄວ້າຜະລິດຢາສະແດງສີຊະນິດໃໝ່ໂດຍຕົນເອງ,ແລະໄດ້ຮ້ອງຂໍສິດທິບັດ.ທ່ານລິວຈົ່ງໄລ ວິສາວະກອນໃຫຍ່ຂອງບໍລິສັດດັ່ງກ່າວເວົ້າວ່າ:
"ຢາສະແດງສີຂອງບໍລິສັດພວກເຮົາໄດ້ຫຼີກເວັ້ນຂໍ້ຂາດຕົກບຸກຜ່ອງຕ່າງໆຂອງຜະລິດຕະພັນຕ່າງປະເທດຄືສະແດງສີຊ້າ,ບໍ່ທົນແສງ,ບໍ່ທົນໃຊ້ແລະສີບໍ່ຂຸ້ນ."
ເຕັກນິກລາຍນີ້ໄດ້ນຳເອົາປະສິດທິຜົນອັນມະຫາສານມາໃຫ້ວິສາຫະກິດໃນທັນທີ,ຍ້ອນວ່າຄຸນນະພາບດີກວ່າແລະຕົ້ນທຶນຕ່ຳກວ່າຜະລິດຕະພັນຂອງບໍລິສັດຂ້າມຊາດ,ຢາສະແດງສີຂອງບໍລິສັດຢຸ້ຍເຟິງໄດ້ຍຶດເອົາໂກຕາຕະຫຼາດຈີນ90%ຢ່າງໄວວາ.ຜະລິດຕະພັນຂອງບໍລິສັດຂ້າມຊາດພັດຄ່ອຍໆໜີອອກຈາກຕະຫຼາດຈີນ.
ໃນຂະນະທີ່ໄດ້ຮັບຜົນສຳເລັດພາຍໃນປະເທດຈີນ,ວິສາຫະກິດຈີນກໍໄດ້ເລີ່ມປະຕິບັດຍຸດທະສາດພັດທະນາຢູ່ຕ່າງປະເທດ.ວິສາຫະກິດຈຳນວນໜຶ່ງເລີ່ມເອົາຜະລິດຕະພັນໄຮເຕັກທີ່ມີສິດຊັບສິນທາງປັນຍາຂອງຕົນຢ່າງສົມບູນນັ້ນໄປຂາຍຢູ່ຕະຫຼາດຕ່າງປະເທດ,ໃນນັ້ນກໍມີອຸປະກອນກວດກາຄວາມປອດໄພຂອງຕູ້ຄອນເທັນເນີ.ໃນບໍ່ເທົ່າໃດປີກ່ອນ,ໃນໂລກມີແຕ່ອາເມລິກາແລະເຢຍລະມັນເທົ່ານັ້ນຈິ່ງຜະລິດອຸປະກອນແນວນີ້ໄດ້.ແຕ່ປັດຈຸບັນ,ອຸປະກອນກວດກາຄວາມປອດໄພຂອງຕູ້ຄອນເທັນເນີທີ່ຜະລິດໂດຍບໍລິສັດຫຸ້ນສ່ວນເວີ່ຍຊືທົ່ງຟ່າງຊິງຮວາຈຳກັດໄດ້ກວມຕະຫຼາດທົ່ວໂລກ57%.ຜະລິດຕະພັນໄດ້ສົ່ງໄປຂາຍຢູ່38ປະເທດແລະເຂດແຄວ້ນ.ທ່ານຄ່າງເຄີຈຸ່ນ ປະທານຄະນະອຳນວຍການຂອງບໍລິສັດດັ່ງກ່າວບອກນັກຂ່າວວ່າ:
"ການບຸກທະລຸແນວນີ້ຕົ້ນຕໍແມ່ນຍ້ອນພວກເຮົາໄດ້ຄົ້ນຄວ້າຜະລິດລະບົບກວດກາຕູ້ຄອນເທັນເນີແບບເຄື່ອນທີ່ຢ່າງສຳເລັດຜົນ,ຢູ່ຂົງເຂດນີ້,ພວກເຮົາຈິ່ງໄດ້ຢູ່ໃນຖານະນຳໜ້າໃນໂລກໃນບາດດຽວ.ນອກນີ້,ພວກເຮົາຍັງມີເຕັກນິກກວດກາທາດແຫຼວຂອງຜູ່ໂດຍສານແມ່ນວັດຖຸໄວໄຟຫຼືວັດຖຸລະເບີດຫຼືບໍ່,ໃນໂລກປັດຈຸບັນ,ມີແຕ່ພວກເຮົາຈິ່ງມີເຕັກນິກລາຍນີ້."
1 2
|
