|
ສະບາຍດີທ່ານຜູ່ຟັງທີ່ໂຄລົບ, ວັນຂຶ້ນ 15 ຄ່ຳເດືອນຈຽງຕາມປະຕິທິນຈັນທະຄະຕິຈີນແມ່ນບຸນຢວນຊຽວ ແປວ່າບຸນເຂົ້າໜົມບົວລອຍຂອງຈີນ, ກໍ່ແມ່ນມື້ສຸດທ້າຍໃນຍາມບຸນກຸດຈີນ, ຕໍ່ໄປຂ້າພະເຈົ້າຂໍແນະນຳເນື້ອໃນກ່ຽວກັບຄວາມເປັນມາແລະຮີດຄອງປະເພນີຂອງບຸນເຂົ້າໜົມບົວລອຍຂອງຈີນ.
ຍາມຄ່ຳຂອງບຸນເຂົ້າໜົມບົວລອຍແມ່ນມື້ເດືອນເພັງເທື່ອທຳອິດຂອງປີໃໝ່ຕາມຈັນທະຄະຕິຈີນ, ໃນກາງຄືນມື້ນັ້ນ, ໃນໝູ່ໄທເມືອງຈີນມີຮີດຄອງປະເພນີແຂວນໂຄມໄຟສີ, ສະນັ້ນ, ບຸນເຂົ້າໜົມບົວລອຍກໍເອີ້ນວ່າບຸນໂຄມໄຟ, ບຸນເຂົ້າໜົມບົວລອຍປີນີ້ກົງກັບວັນທີ 12 ກຸມພາ.
ການຊົມໂຄມໄຟແລະກິນເຂົ້າໜົມບົວລອຍແມ່ນເນື້ອໃນສຳຄັນສອງອັນໃນຍາມບຸນເຂົ້າໜົມບົວລອຍ.
ເປັນຫຍັງໃນບຸນເຂົ້າໜົມບົວລອຍຕ້ອງແຂວນໂຄມໄຟ? ຕາມເລົ່າລືກັນວ່າ, ກ່ອນ ຄ.ສ.ປີ 180, ເຈົ້າຮັ້ນເວິນ ເຈົ້າຊີວິດລາຊະວົງຊີ່ຮັ້ນຂອງຈີນ ໄດ້ຂຶ້ນສະເຫວີຍລາດໃນມື້ 15 ຄ່ຳເດືອນຈຽງ, ເພື່ອສະຫຼອງການຂຶ້ນສະເຫວີຍລາດ, ເຈົ້າຊີວິດຮັ້ນເວິນຊົງຕົກລົງກຳນົດມື້ 15 ຄ່ຳເດືອນຈຽງເປັນມື້ບຸນໂຄມໄຟ. ເມື່ອຮອດຕອນຄ່ຳມື້ນັ້ນທຸກປີ, ເຈົ້າຊີວິດຮັ້ນເວິນກໍສະເດັດປະເພດຢູ່ນອກພະລາດຊະວັງ, ຫຼິ້ນມ່ວນຊື່ນຮ່ວມກັນກັບສາມັນຊົນ, ໃນມື້ນັ້ນ, ທຸກໆຄອບຄົວຢູ່ຕາມຖະໜົນຫົນທາງລ້ວນແຕ່ແຂວນໂຄມໄຟສີທີ່ແປກປະຫຼາດຫຼາຍຢ່າງຫຼາຍແນວເພື່ອໃຫ້ຄົນທັງຫຼາຍໄດ້ຊົມ, ເມື່ອຮອດກ່ອນ ຄ.ສ.ປີ 104, ບຸນເຂົ້າໜົມບົວລອຍຖືກຈັດເປັນບຸນສຳຄັນຂອງຊາດຢ່າງເປັນທາງການ, ການຕົກລົງດັ່ງກ່າວເຮັດໃຫ້ຂະໜາດຂອງບຸນເຂົ້າໜົມບົວລອຍເປີດກວ້າງອອກຕື່ມອີກ, ຕາມຂໍ້ກຳນົດ, ຢູ່ສາທາລະນະສະຖານ ແລະທຸກໆຄອບຄົວ ຕ້ອງແຂວນໂຄມໄຟສີໝົດ, ໂດຍສະເພາະແມ່ນເຂດຄຸ້ມທີ່ສີວິໄລແລະໃຈກາງວັດທະນະທຳຕ້ອງຈັດງານໂຄມໄຟແລະງານວາງສະແດງໂຄມໄຟຢ່າງຂະໜາດໃຫຍ່ແລະຄຶກຄື້ນ, ຍິງຊາຍນ້ອຍໃຫຍ່ຊົມໂຄມໄຟສີແລະແກ້ຄຳທວາຍຂອງໂຄມໄຟ ເຊີດໂຄມມັງກອນເປັນຕົ້ນຕະຫຼອດຄືນຈົນຊອດແຈ້ງ, ແຕ່ນັ້ນມາ, ເລີຍເຮັດແນວນີ້ຊູ່ປີ, ແລ້ວກໍກາຍເປັນຮີດຄອງປະເພນີຂອງຊາວຈີນທຸກຊັ້ນຄົນ.
1 2 3
|
