|
ສະບາຍດີທ່ານຜູ້ຟັງທີ່ໂຄລົບ, ຖ້າທ່ານເຄີຍມາຢູ່ປັກກິ່ງເປັນເວລາດົນນານ, ທ່ານອາດຈະໄດ້ເອົາໃຈໃສ່ແລ້ວວ່າ, ຢູ່ປັກກິ່ງນີ້, ນອກຈາກມີຮ່ອງຮອຍປະຫວັດສາດຫຼາຍບ່ອນທີ່ທ່ານພາດບໍ່ໄດ້ເຊັ່ນກຳແພງເມືອງຈີນແລະພະລາຊະວັງກູ້ກົ່ງແລ້ວ, ຍັງມີຫໍພິພິທະພັນຫຼາຍແຫ່ງທີ່ໜ້າໄປຊົມ. ຫໍພິພິທະພັນທໍລະນີຈີນທີ່ຕັ້ງຢູ່ມໍ່ກັບແຈຕາເວັນຕົກສຽງເໜືອຂອງພະລາຊະວັງກູ້ກົ່ງກໍແມ່ນຫໍພິພິທະພັນແຫ່ງໜຶ່ງທີ່ມີປະຫວັດ90ປີແລ້ວ. ໃນລາຍການວັດທະນະທຳຈີນມື້ນີ້, ພວກເຮົາພ້ອມກັນກັບທ່ານໄປຊົມູຫໍພິພິທະພັນແຫ່ງນີ້.
ຫໍພິພິທະພັນທໍລະນີຈີນສ້າງຕັ້ງຂຶ້ນໃນປີ1916, ເມື່ອຮອດປີນີ້ພໍດີມີປະຫວັດ90ປີແລ້ວ, ມັນແມ່ນຫໍພິພິທະພັນວິທະຍາສາດທຳມະຊາດສ່ວນຫຼວງທີ່ສ້າງຂຶ້ນກ່ອນໝູ່ຂອງຈີນ. ແຕ່ໃນປະຫວັດສາດໄດ້ຍ້າຍບ່ອນຫຼາຍເທື່ອ, ໂດຍສະເພາະແມ່ນໃນຫຼາຍປີມໍ່ໆມານີ້, ໄດ້ຂະຫຍາຍສ້າງແລະສ້ອມແປງຂະໜາດໃຫຍ່ຫຼາຍເທື່ອ, ປະຈຸບັນ, ເມື່ອເບິ່ງຈາກຮູບນອກ, ຫໍພິພິທະພັນທໍລະນີຈີນບໍ່ມີຮ່ອງຮອຍປະຫວັດສາດແລ້ວ, ຫາກແມ່ນຫໍພິພິທະພັນທັນສະໄໝແຫ່ງໜຶ່ງ.
ເມື່ອຢ່າງເຂົ້າຫ້ອງວາງສະແດງທີ່ມີເນື້ອທີ່4ພັນ5ຮ້ອຍແມັດຕາຂອງຫໍພິພິທະພັນທໍລະນີຈີນ, ທ່ານຈະສາມາດເລາະເບິ່ງຕົວຢ່າງທໍລະນີ2ແສນກວ່າເຄື່ອງທີ່ຫໍພິພິທະພັນແຫ່ງນີ້ສະສົມໄວ້ນັ້ນຢ່າງສົມໃຈ. ໃນນັ້ນ, ມີຫຼາຍຢ່າງແມ່ນມີຊື່ສຽງທົ່ວໂລກ: ມີຊາກໄດໂນເສົາທີ່ໃຫຍ່ໂຕແລະຊາກມະນຸດບູຮານເຊັ່ນ: ມະນຸດຢວນເມົາທີ່ມີປະຫວັດ1ລ້ານ7ແສນກວ່າປີແລະມະນຸດປັກກິ່ງທີ່ມີປະຫວັດປະມານ7ແສນຫາ2ແສນປີ, ຍັງມີແກ້ວມໍລະກົດແລະຢົກຕ່າງໆເຊິ່ງເປັນເຄື່ອງສະສົມລະດັບຊາດ.
ເມື່ອເວົ້າເຖິງຫໍພິພິທະພັນທໍລະນີຈີນ, ທ່ານຈ້າວເຄີຢານ ພະນັກງານຂອງຫໍພິພິທະພັນເວົ້າຕໍ່ນັກຂ່າວວ່າ:
ຫໍພິພິທະພັນທໍລະນີຈີນຄືກັນກັບຫໍພິພິທະພັນປະເພດທຳມະຊາດອື່ນໆ, ມີບົດບາດອັນເປັນມູນເຊື້ອໃນສາມດ້ານເຊັ່ນ: ເກັບຮັກສາ, ຄົ້ນຄວ້າວິທະຍາສາດແລະການສຶກສາສັງຄົມ. ກ່ອນອື່ນແມ່ນເກັບຮັກສາ, ຕາງໜ້າລັດເກັບຮັກສາຕົວຢ່າງທໍລະນີປະເພດຕ່າງໆ, ຕົວຢ່າງທີ່ເກັບໂຮມນັ້ນກວມທຸກຂົງເຂດທໍລະນີ, ບໍ່ວ່າແມ່ນຈຳນວນຫຼືວ່າຄຸນນະພາບ, ລ້ວນແຕ່ເປັນທີໜຶ່ງອາຊີ. ຫໍພິພິທະພັນທໍລະນີຈີນມີກຳລັງຕົວຈິງດ້ານຄົ້ນຄວ້າວິທະຍາສາດທີ່ເຂັ້ມແຂງ, ການຄົ້ນຄວ້າວິທະຍາສາດຕົ້ນຕໍແມ່ນເອົາໃຈໃສ່ນຳການຄົ້ນຄວ້າເຄື່ອງສະສົມຂອງຫໍພິພິທະພັນ, ໂດຍສະເພາະແມ່ນສັດຈຳພວກມີກະດູກສັນຫຼັງຂະໜາດນ້ອຍ, ເຊັ່ນການຄົ້ນຄວ້າປະເພດນົກແລະປະເພດປາເປັນຕົ້ນ, ມີຊື່ສຽງໂດ່ງດັງໃນທົ່ວໂລກ.
ເມື່ອເວົ້າສຳລັບຜູ້ມັກທໍລະນີສາດ, ຫໍພິພິທະພັນທໍລະນີຈີນຄືກັນກັບສາງຄວາມຮູ້ແຫ່ງໜຶ່ງ: ຢູ່ນີ້ມີຫ້ອງວາງສະແດງພື້ນຖານ5ຫ້ອງເຊັ່ນຫ້ອງໜ່ວຍໂລກ, ຫ້ອງແຮ່ທາດ, ຫ້ອງແກ້ວມໍລະກົດ, ຫ້ອງຊີວະຊາດກ່ອນປະຫວັດສາດ, ຫ້ອງຊັບພະຍາກອນດິນແດນແຫ່ງຊາດແລະຫ້ອງວາງສະແດງຊົ່ວຄາວສອງຫ້ອງ, ຫ້ອງວາງສະແດງຕ່າງໆໄດ້ໃຊ້ຫຼາຍວິທີເຊັ່ນ: ວາງສະແດງຂອງຈິງ, ການສາຍຮູບເງົາແລະສາລະພັດສື່, ການວາງສະແດງແບບຈຳລອງຕົວຈິງເປັນຕົ້ນ, ໄດ້ວາງສະແດງສະພາບຊັບພະຍາກອນທໍລະນີຂອງຈີນກໍຄືຂອງໂລກຢ່າງມີຊີວິດຊີວາ, ແລະແນະນຳຄວາມຮູ້ກ່ຽວກັບວິທະຍາສາດໜ່ວຍໂລກທີ່ກ່ຽວຂ້ອງ.
ສິ່ງທີ່ໜ້າເວົ້າເຖິງນັ້ນແມ່ນ, ໃນຫຼາຍປີມໍ່ໆມານີ້, ໄທເມືອງທຳມະດາສາມັນຫຼາຍໆຄົນທີ່ບໍ່ສົນໃຈນຳຄວາມຮູ້ດ້ານທໍລະນີໃນເມື່ອກ່ອນນັ້ນ, ປະຈຸບັນ, ກໍໄປທ່ຽວຊົມຫໍພິພິທະພັນຢ່າງເປັນເຈົ້າການ. ສິ່ງທີ່ດູດດຶງພວກເຂົາເຈົ້ານັ້ນແມ່ນວຽກງານຄົ້ນຄວ້າແກ້ວມໍລະກົດຂອງຫໍພິພິທະພັນທໍລະນີຈີນ. ໃນສິບກວ່າປີມານີ້, ຫໍພິພິທະພັນທໍລະນີຈີນໄດ້ດຳເນີນການຄົ້ນຄວ້າແລະວິນິດໃສແກ້ວມໍລະກົດຕໍ່ພາຍນອກຕະຫຼອດມາ. ການໂຄສະນາເຜີຍແຜ່ແລະຄົ້ນຄວ້າແບບເຄິ່ງຕະຫຼາດແນວນີ້, ໄດ້ເປີດກວ້າງຕະຫຼາດຊື້ຂາຍແກ້ວມໍລະກົດໃນລະດັບໃດໜຶ່ງ.
1 2
|
