|
ພິທີເປີດສາກງານກິລາໂອລິມປິກອາແຕນທີ່ປະຈັກຕາຊາວໂລກໄດ້ເປີດຜ້າປົກອັນເລິກລັບອອກແລ້ວ. ໃນພິທີດັ່ງກ່າວ, ຊາວເກຼັກໄດ້ປະສານກັບເທບນິຍາຍບູຮານຂອງເກຼັກ, ໃຊ້ຮູບການສະແດງອັນໃຫຍ່ໂຕມະໂຫລານເຮັດໃຫ້ຜູ່ຊົມໄດເຫັນເນື້ອໃນກັບວັດທະນະທຳຂອງເກຼັກ ຖີ່ນກຳເນີດຂອງງານກິລາໂອລິມປິກ, ແລະໄດ້ສະແດງໃຫ້ເຫັນຈິດໃຈໂອລິມປິກທີ່ຖືຄົນເປັນຫຼັກເປັນຢ່າງດີ. ໃນພິທີເປີດສາກທີ່ສຳເລັດຜົນດັ່ງກ່າວ, ມີຈຸດເດັ່ນກວ່າໝູ່ແມ່ນເພງມະຫາສະໝຸດ ເພງຂອງງານກິລາໂອລິມປິກສະໄໝນີ້ທີ່ຂັບຮ້ອງໂດຍນາງບີຢອກ ລາຊີນີດົນຕີທີ່ມາຈາກອິສລັງ, ເພງນີ້ໄດ້ສັນລະເສີນມະຫາສະໝຸດ ແຫຼ່ງກຳເນີດຂອງມວນມະນຸດ, ພ້ອມກັນນັ້ນ, ກໍໄດ້ໃຫ້ຜູ່ຊົມທັງຫຼາຍໄດ້ຟັງສຽງທຳມະຊາດທີ່ກະຕຸ້ນໃຈຄົນ.
ງານກິລາໂອລິມປິກທຸກສະໄໝ, ປະເທດເຈົ້າພາບຍ່ອມແຕ່ງເພງທີ່ສ່ອງແສງສີສັນວັດດທະນະທຳທີ່ມີເອກະລັກພິເສດຂອງປະເທດຕົນແລະສ່ອງແສງການສະແຫວງຈິດໃຈໂອລິມປິກຂອງມະນຸດຊາດ, ແລ້ວຖືເປັນເພງຂອງງານກິລາໂອລິມປິກສະໄໝນັ້ນ. ປະຈຸບັນ, ເພງງານກິລາໂອລິມປິກໄດ້ກາຍເປັນພາກສ່ວນປະກອບອັນສຳຄັນຂອງງານກິລາໂອລິມປິກແລ້ວ, ຄະນະຈັດງານຈະຕ້ອງເຊີນນັກຮ້ອງທີ່ມີຊື່ສຽງມາຂັບຮ້ອງ, ແລະເພງເຫຼົ່ານີ້ຈະເຜີຍແຜ່ຢູ່ໃນຂອບເຂດທົ່ວໂລກໂດຍໄວ, ແລ້ວກາຍເປັນການໂຄສະນາງານກິລາໂອລິມປິກຢ່າງດີກວ່າໝູ່.
ງານກິລາໂອລິມປິກສະໄໝໃໝ່ຄັ້ງທຳອິດກໍມີເພງປະຈຳງານແລ້ວ. ໃນວັນທີ 6 ເມສາປີ 1896, ພາຍຫລັງສົມເດັດຈອດຈ໌ ລັດຊະການທີໜຶ່ງ ເຈົ້າຊີວິດເກຼັກປະກາດໄຂງານກິລາໂອລິມປິກຄັ້ງທີ 1 ແລ້ວ, ທ່ານສະປີໂລສ ຊາມາລັດ ນັກດົນຕີທີ່ມີຊື່ສຽງຂອງເກຼັກໄດ້ໃຫ້ຈັງຫວະຄະນະຮ້ອງຮວມໝູ່ 9 ຄະນະແລະ 250 ຄົນຮ້ອງເພງໂອລິມປິກສັກສິດ ເຊິ່ງແມ່ນທ່ານເອງເປັນຜູ່ແຕ່ງທຳນອງ ທ່ານຄິສຕິສ ພາລາມາສ໌ ນັກກະວິເປັນຜູ່ແຕ່ງເນື້ອຮ້ອງ. ດົນຕີທີ່ມ່ວນອອນຊອນແລະສຽງເພງອັນຈັບໃຈໄດ້ດັງຂຶ້ນຢູ່ເທິງເວຫາສະໜາມກິລາພານາຊິນນີອານຕັ້ງດົນນານ, ພາຄົນທັງຫລາຍເຂົ້າສູ່ບັນຍາກາດອາໄລຫາຄວາມສະຫງ່າລາສີຂອງງານກິລາໂອລິມປິກບູຮານແລະຝັກໃຝ່ງານກິລາສະໄໝໃໝ່ທີ່ດີງາມນັ້ນ. ເຖິງວ່າເພງໂອລິມປິກສັກສິດໄດ້ຮັບຜົນສຳເລັດຢ່າງໃຫຍ່ຫຼວງໃນພິທີເປີດງານກິລາໂອລິມປິມຄັ້ງທຳອິດກໍຕາມ, ແຕ່ໃນຄາວນັ້ນຍັງບໍ່ໄດ້ກຳນົດເປັນເພງປະຈຳງານ. ພາຍຫລັງມາ, ຝ່າຍເຈົ້າພາບຈຶ່ງໄດ້ກຳນົດເພງຂອງງານໂອລິມປິກທຸກສະໄໝ, ແຕ່ກໍບໍ່ມີເພງປະຈຳງານທີ່ເປັນເອກະພາບ. ຕໍ່ມາ, ມີຄົນສະເໜີໃຫ້ແຕ່ງເພງໃໝ່, ກຳນົດໃຫ້ເປັນເພງປະຈຳງານກິລາໂອລິມປິກໂດຍສະເພາະຢ່າງຖາວອນ. ແຕ່ໄດ້ທົດລອງຫຼາຍເທື່ອກໍບໍ່ພໍໃຈປານໃດ. ສະນັ້ນ, ໃນກອງປະຊຸມຄົບຄະນະຄັ້ງທີ 55 ຂອງຄະນະກຳມະການໂອລິມປີກສາກົນທີ່ຈັດຂຶ້ນຢູ່ໂຕກຽວໃນປີ 1958 ,ໄດ້ຕົກລົງເອົາເພງໂອລິມປິກສັກສິດ ເປັນເພງປະຈຳງານກິລາໂອລິມປິກ. ແຕ່ນັ້ນມາ, ໃນພິທີເປີດຫຼືປິດງານກິລາໂອລິມປິກທຸກສະໄໝ, ພວກເຮົາກໍຈະໄດ້ຟັງດົນຕີເກຼັກບູຮານທີ່ໄພເລາະບົດນີ້.
1 2
|
