|
|
 |
| (GMT+08:00)
2006-03-13 14:44:31
|
 |
|
ພວກເຮົາໃຜກໍມີຈຸດພິເສດຈຳເພາະຂອງຕົນເອງ(ສຽງ)
cri
Author: min
ຢູ່ປະເທດຝ່າຍຕາເວັນຕົກ, ມີສຸພາສິດທີ່ມີຊື່ສຽງຄວາມໜຶ່ງວ່າ: ທຸກຄົນເກີດມາໃຜກໍມີຈຸດພິເສດຈຳເພາະຂອງຕົນ. ຈັ່ງແມ່ນເວົ້າຖືກແທ້ໆ, ພວກເຮົາແຕ່ລະຄົນໃຜກໍມີຈຸດພິເສດຈຳເພາະຂອງຕົນ, ເຈົ້າອາດຈະບໍ່ງາມ, ແຕ່ເຈົ້າອາດຈະມີບຸກຄະລິກລັກສະນະພິເສດຂອງຕົນ; ເຈົ້າອາດຈະບໍ່ແມ່ນຄົນຄີງບາງຮ່າງນ້ອຍ, ແຕ່ເຈົ້າອາດຈະມີສຸຂະພາບແຂງແຮງ; ເຈົ້າອາດຈະບໍ່ສະຫຼາດປານໃດ, ແຕ່ເຈົ້າເປັນຄົນດຸໝັ່ນ; ເຈົ້າອາດຈະບໍ່ຮັ່ງມີ, ແຕ່ເຈົ້າມີໝູ່ເພື່ອນຫຼາກຫຼາຍ. ຊື່ນບານສຳລານໃຈຜູ້ທີ່ມີຊື່ລືນາມສ່ວນຫຼາຍຕ້ອງມີກຳລັງກົດຢ່າງໜັກໜາ, ແຕ່ຊີວິດທຳມະດາສາມັນພັດມີຄວາມສະຫງົບສຸກທີ່ຫາຍາກ? ເຈົ້າຟ້າເຈົ້າແຖນແມ່ນມີຄວາມທ່ຽງທຳທີ່ສຸດ, ສິ່ງທີ່ເພິ່ນເອົາໃຫ້ແຕ່ລະຄົນນັ້ນແມ່ນຊ່ຳກັນ, ແຕ່ກໍບໍ່ອາດຈົນງາມສົມບູນຮ້ອຍເປີເຊັນ. ແຕ່ວ່າ, ທຸກໆຄົນໃຜກໍມີຈຸດພິເສດຂອງໃຜລາວ, ພວກເຮົາຕ້ອງຊ່າງສັງເກດເຫັນຄວາມງາມແລະຊັບສົມບັດພິເສດຂອງຕົນ. ມີຄົນເວົ້າວ່າ, ແຕ່ລະຄົນກໍ່ເໝືອນກັບແກ້ວມະນີເມັດໜຶ່ງ, ມີຫຼາຍລ່ຽມ, ເບິ່ງຈາກມຸນໃດກໍ່ມີແສງເຫຼື້ອມຕ່າງກັນ. ເຈົ້າໄດ້ເຫັນແສງເຫຼື້ອມຂອງຕົນແລ້ວບໍ່?
ພວກເຮົາມັກໄປອອນຊອນຜູ້ອື່ນ, ມັກເອົາຈຸດອ່ອນຂອງຕົນໄປທຽບກັບທ່າແຮງຂອງຜູ້ອື່ນ, ແລ້ວເຮັດໃຫ້ພວກເຮົາເອົາຮູ້ສຶກຕ່ຳຄ້ອຍນ້ອຍໃນ. ພວກເຮົາຈົ່ງຄຶດຫາສິ່ງທີ່ເຮົາມີລອງເບິ່ງ, ສິ່ງເຫຼົ່ານັ້ນຜູ້ອື່ນອາດຈະບໍ່ມີ, ແມ່ນສິ່ງທີ່ເຮັດໃຫ້ຜູ້ອື່ນອອນຊອນນຳເຮົາ. ທ່ານລີປາຍ ນັກກະວີທີ່ມີຊື່ສຽງໃນສະໄໝລາຊະວົງຖັງຂອງຈີນເຄີຍມີຄຳກອນເວົ້າວ່າ: "ເທວະດາຟ້າແຖນໃຫ້ຂ້າເກີດມາຢູ່ໃນໂລກນີ້ຍ່ອມຕ້ອງມີຄຸນຄ່າຂອງຂ້າເອງ." ແຕ່ລະຄົນແມ່ນບໍ່ຄືກັນ, ສະນັ້ນ, ທ່າແຮງຂອງແຕ່ລະຄົນກໍ່ບໍ່ຄືກັນ, ການຈັດວາງແບບນີ້ແມ່ນມີເຫດມີຜົນ, ຄືດັ່ງນັກກະວີລີປາຍ, ເພິ່ນກໍມີອຸດົມຄະຕິການເມືອງອັນຍິ່ງໃຫຍ່ໃນຕະຫຼອດຊີວິດ, ແຕ່ຍ້ອນເພິ່ນປະຈົບປະແຈງບໍ່ເປັນ, ເພິ່ນຈິ່ງບໍ່ເຄີຍໄດ້ຮັບຜົນຫຍັງທາງການເມືອງຈັກເທື່ອ. ແຕ່ນິດໄສແບບໂລມັງຕີກມາແຕ່ເກີດພ້ອມກັບພອນສະຫວັນທາງດ້ານວັນນະຄະດີຂອງເພິ່ນ, ຈິ່ງໄດ້ເຮັດໃຫ້ເພິ່ນແຕ່ງຄຳກອນອັນດີເລີດເປັນຈຳນວນຫຼວງຫຼາຍ, ແລ້ວກາຍເປັນນັກກະວີຜູ້ຍິ່ງໃຫຍ່ທີ່ສຸດໃນປະຫວັດສາດຈີນ. ສະນັ້ນ, ແຕ່ລະຄົນຕ່າງກໍ່ມີຈຸດອ່ອນຂອງໃຜລາວ, ບໍ່ຕ້ອງໄປຫົວຊາມັນເກີນໄປ, ແນ່ນອນເຈົ້າກໍຕ້ອງມີທ່າແຮງທີ່ຕ່າງໝູ່ຂອງຕົນ, ທະແນມແຕ່ເຈົ້າຫາກສັງເກດເຫັນແລ້ວ, ເຈົ້າກໍ່ຫຍັບເຂົ້າໃກ້ກັບໄຊຊະນະອີກກ້າວໜຶ່ງແລ້ວ.
ສະນັ້ນ, ເລີ່ມແຕ່ມື້ນີ້ໄປ, ຂໍໃຫ້ເອົາຄວາມເອົາໃຈໃສ່ນຳຈຸດອ່ອນຂອງຕົນຫັນໄປເອົາໃຈໃສ່ຂຸດຄົ້ນທ່າແຮງຂອງຕົນ. ນະທີ່ນີ້, ຂ້າພະເຈົ້າຫວັງວ່າ, ທຸກໆຄົນຄົງຈະມີຊີວິດອັນຈຳເພາະຂອງຕົນໄດ້, ແລ້ວໄດ້ຮັບຜົນເກັບກ່ຽວອັນດີງາມທີ່ຕ່າງກັນ.
ທ່ານຜູ້ຟັງທີ່ໂຄລົບ, ລາຍການຄາລົມຄົມຄາຍພາກນີ້ຂໍສ້ຽງສຸດພຽງທໍ່ນີ້, ຂອບໃນນຳທ່ານທີ່ຮັບຟັງ, ສະບາຍດີ!
1 2
|
|
|
