|
ຈີນມີ55ຊົນເຜົ່າສ່ວນໜ້ອຍ,ແຂວງຢຸນນານແມ່ນແຂວງໜຶ່ງທີ່ມີຊົນເຜົ່າສ່ວນໜ້ອຍຫຼາຍກວ່າໝູ່ຢູ່ຈີນ,ຄືມີ25ຊົນເຜົ່າສ່ວນໜ້ອຍ.ໃນນັ້ນ,ມີ16ຊົນເຜົ່າຂ້າມຊາດ,ຢູ່ປະເທດໃກ້ຄຽງ ເຊັ່ນໄທ,ລາວ,ຫວຽດນາມເປັນຕົ້ນກໍລ້ວນແຕ່ມີຊົນເຜົ່າສ່ວນໜ້ອຍເຫຼົ່ານີ້,ຕົວຢ່າງຄືເຜົ່າອີ,ເຜົ່າໄທລື້,ເຜົ່າມົ້ງ,ເຜົ່າຢ້າວ,ເຜົ່າກໍ່,ເຜົ່າຈິງໂພເປັນຕົ້ນ.
ຫຼາຍປີມານີ້,ຈີນໄດ້ເພີ່ມຄວາມແຮງໃນການສະໜັບສະໜູນການພັດທະນາຂອງ22ຊົນເຜົ່າສ່ວນໜ້ອຍທີ່ມີປະຊາກອນໜ້ອຍ.ເດືອນກັນຍາປີ2005,ຄະນະລັດຖະບານຈີນໄດ້ໄຂກອງປະຊຸມໂດຍຈຳເພາະ,ໃຫ້ຄຳໝັ້ນສັນຍາວ່າ,ພາຍໃນ5ປີຂ້າງໜ້າ,ຈະລົງທຶນ1ຕື້600ລ້ານຢວນສະໜັບສະໜູນການພັດທະນາຂອງ22ຊົນເຜົ່າສ່ວນໜ້ອຍທີ່ມີປະຊາກອນໜ້ອຍ.ນອກນີ້,ຫ້ອງການບຳບັດຄວາມທຸກຍາກຄະນະລັດຖະບານຈີນຍັງໄດ້ຈັດເອົາບ້ານທຸກຍາກ345ບ້ານທີ່ມີປະຊາກອນຊົນເຜົ່າສ່ວນໜ້ອຍບໍ່ຫຼາຍດຳລົງຊີວິດຢູ່ນັ້ນເຂົ້າໃນແຜນບຳບັດຄວາມທຸກຍາກ,ກໍໄດ້ອະນຸລັກວັດທະນະທຳຊົນເຜົ່າສ່ວນໜ້ອຍເຫຼົ່ານີ້.
ທ່ານວາງຊືຕ້າຍ ຮອງປະທານສະມາຄົມສິລະປິນພື້ນເມືອງຢຸນນານບອກນັກຂ່າວວ່າ,ຈີນໄດ້ເອົາໃຈໃສ່ນຳການອະນຸລັກວັດທະນະທຳຊົນເຜົ່າສ່ວນໜ້ອຍໂດຍຕະຫຼອດ,ຫຼາຍປີມານີ້,ແຂວງຢຸນນານໄດ້ເພີ່ມຄວາມແຮງໃນການອະນຸລັກຫຼາຍກວ່າເກົ່າ.ທ່ານເວົ້າວ່າ:
"ປີ2000,ແຂວງຢຸນນານກໍໄດ້ປະກາດໃຊ້ກົດຂໍ້ກຳນົດກ່ຽວກັບການອະນຸລັກວັດທະນະທຳດັ້ງເດີມ ພື້ນເມືອງແລະຊົນເຜົ່າແຂວງຢຸນນານ,ນີ້ແມ່ນກົດບັນຍັດທ້ອງຖິ່ນກ່ຽວກັບການອະນຸລັກມໍລະດົດວັດທະນະທຳທີ່ບໍ່ແມ່ນວັດຖຸສະບັບທຳອິດຂອງຈີນ.ຈາກນັ້ນມາ,ແຂວງຢຸນນານໄດ້ ສຳຫຼວດແລະຂະໜານນາມສິລະປິນພື້ນເມືອງແລະຊົນເຜົ່າກ່ອນແຂວງອື່ນ."
ທ່ານກ່າວວ່າ,ບາງຊົນເຜົ່າສ່ວນໜ້ອຍຂອງຢຸນນານຍ້ອນວ່າມີປະຊາກອນຫຼາຍ,ມີຕົວໜັງສືຂອງຊົນເຜົ່າຕົນ,ມີຄວາມຕື່ນຕົວຫຼາຍໃນການອະນຸລັກວັດທະນະທຳ,ແລະດຳເນີນໄດ້ອ່າວໄວ,ບວກກັບອົງການປົກຄອງໃຊ້ມາດຕະການຕ່າງໆ,ຈິ່ງໄດ້ຮັບຜົນດີສົມຄວນໃນການອະນຸລັກວັດທະນະທຳ.
ເຜົ່າອີແມ່ນຊົນເຜົ່າສ່ວນໜ້ອຍທີ່ມີປະຊາກອນຫຼາຍກວ່າຊົນເຜົ່າສ່ວນໜ້ອຍອື່ນໆຢູ່ແຂວງຢຸນນານ,ຄືມີ4ລ້ານກວ່າຄົນ,ຢູ່ປະເທດລາວກໍມີກິ່ງງ່າຂອງເຜົ່າອີ.ເຜົ່າອີມີພາສາແລະຕົວໜັງສືຂອງຊົນເຜົ່າຕົນ,ມີຕຳລາພາສາອີບູຮານຈຳນວນຫຼວງຫຼາຍເຊິ່ງມີເນື້ອໃນອຸດົມສົມບູນ.ໃນຊຸມປີ80ສະຕະວັດແລ້ວນີ້,ກິ່ງແຂວງສູສົງເຜົ່າອີປົກຄອງຕົນເອງເຊິ່ງເປັນບ່ອນດຳລົງຊີວິດຕົ້ນຕໍຂອງເຜົ່າອີແຂວງຢຸນນານກໍໄດ້ສ້າງຕັ້ງອົງການຄົ້ນຄວ້າແລະອະນຸລັກວັດທະນະທຳເຜົ່າອີໂດຍຈຳເພາະ,ຂຸດຄົ້ນແລະຄົ້ນຄວ້າຕຳລາວັດທະນະທຳບູຮານແລະເອກະສານກ່ຽວກັບຊີວິດການເປັນຢູ່ແລະຮີດຄອງປະເພນີຂອງເຜົ່າອີຢ່າງຮອບດ້ານ.
ພາຍຫຼັງໄດ້ປະກາດກົດຂໍ້ກຳນົດກ່ຽວກັບການປົກປັກຮັກສາວັດທະນະທຳດັ້ງເດີມຂອງພື້ນເມືອງແລະຊົນເຜົ່າແຂວງຢຸນນານແລ້ວ,ອົງການປົກຄອງກິ່ງແຂວງສູສົງໄດ້ສຳຫຼວດສິລະປິນດ້ານດົນຕີແລະດ້ານການຟ້ອນເຜົ່າອີ,ໄດ້ຂະໜານນາມໃຫ້ຜູ່ສືບທອດວັດທະນະທຳເຜົ່າອີຫຼາຍສິບຄົນ,ສະໜັບສະໜູນພວກທ່ານດ້ວຍເງິນທຶນເພື່ອໃຫ້ພວກທ່ານສອນຊາວໜຸ່ມ,ເຜີຍແຜ່ວັດທະນະທຳເຜົ່າອີ.ນອກນີ້,ມີຫຼາຍປະເທດຄືຈີນ,ອາເມລິກາ,ເຢຍລະມັນ,ຝະຣັ່ງ,ຍີ່ປຸ່ນລ້ວນແຕ່ມີນັກປາດຄົ້ນຄວ້າເຜົ່າອີສຶກສາ,ຈັດງານສຳມະນາສາກົນເຜົ່າອີສຶກສາ.ທັງໝົດເຫຼົ່ານີ້ລ້ວນແຕ່ໄດ້ເສີມຂະຫຍາຍບົດບາດສຳຄັນຕໍ່ການອະນຸລັກວັດທະນະທຳເຜົ່າອີ.
1 2
|
